一起食堂：無故失「漬」

收工，得一支公食咩好？記得早前有食友幫襯過呢間「一起食堂」台式餐廳，台灣菜啱我吖，就食番餐好嘅，慰勞吓近期嘅辛勞。

走進餐廳內，格局深長，一室木系，若非掛上啲燈籠，台灣電影海報，單從裝修都未必知佢賣台菜。然而，枱與枱之間有點逼，快閃食餐飯就可以，坐耐少少傾吓偈就唔多方便，人多時，仲需要有搭枱嘅心理準備。

有啲外賣單張攞，就索性掃描完貼出嚟，就一次過睇晒有啲咩嘢選擇，都離不開台式小食、麵條、便當、甜點……等等，雖然有唔少特色茶飲，但反而無珍珠奶茶。

三色海鮮茶漬飯 $109

餐牌已註明三色海鮮有蟹肉、廣島蠔及鯛魚，都喺喜愛嘅料，同埋茶漬飯食落清爽，啱晒呢個時候食。整碗茶漬飯甚有睇頭，份量十足，3大隻廣島蠔之外，仲加咗唔少飯素同紫菜，不過，蟹肉呢？鯛魚呢？

與其話茶漬飯，其實應為湯飯，因為明顯倒入嘅喺上湯，幸而，個湯都清香不濁，配飯食都唔差。而且，啲廣島蠔好得，大隻肥美，有蠔香。

如果細心啲留意，幾抹蟹肉就放晌碗邊，但由於有少少碎濕濕，所以，第一眼真喺唔覺。蟹肉都幾鮮甜，不過，都喺兩炷仔就食晒。

撈兩撈，都喺搵唔到啲鯛魚，反而有啲大大粒嘅蟹籽，唔知喺咪無晒鯛魚，但應該落單前跟客人解釋番個情況。再者，俾幾粒蟹籽，感覺比起俾鯛魚似乎蝕底好多。

仙草冬瓜茶 +$12

雖然無珍珠奶茶，但見到有款冬瓜茶，都喺小弟嘅心水之選，再加入滑嘟嘟嘅仙草，味道又無過甜，合晒心水。

店家有甜品供應，就喺啲芋圓，由於碗飯確實大大碗，食完都頗飽，所以，就無點個甜品喇。環境有少少擠，服務普普通通咁啦，食物就有點未符預期咁，所以，整體而言，只可以打個合格俾佢。

個人評分
味道：7/10
環境：7/10
服務：7/10
抵食：6/10
平均每人消費：HK$121

餐廳資料：
一起食堂
中環域多利皇后街2號地舖
6722 1639