2019年10月12日星期六

Vivienne Westwood Cafe:慢「Wood」午餐

好耐無跨區渡周末喇,所以,專登同老婆拍拖更過嚟銅鑼灣、天后一帶行吓,食吓嘢,而午餐選上由知名品牌「Vivienne Westwood」所開設嘅Café,皆因睇過食友嘅食評,讚口不絕,晚市有點貴,所以,就嚟試試午餐。
店舖共分兩層,地下喺品牌嘅服裝及配飾店,樓上則喺帶點英式風格嘅Café。踏進店內,環境好特別,先喺近門口位放置一啲飾櫃,擺放咗一套套英式餐具,別緻好睇。
此外,近門口嘅另一邊,喺超吸引嘅餅櫃,裡面放咗唔少款式嘅蛋糕,賣相亮麗。
經過水吧位,走入啲就喺用餐區,第一眼就見到好「吊詭」嘅13小時大鐘。有人話,如果每日多一個鐘用就好喇,其實,如果一個人嘅時間管理得唔好,多幾個鐘都喺無用。
其餘嘅用餐區,透過唔同嘅擺設及裝飾,有猶如攝影棚或行貓步嘅舞台,又有仿宮廷般嘅畫廊,不其然似喺劃分咗幾個區域,但同樣喺富有心思。而個人感覺嘅最佳位置,當然喺窗邊位啦,感覺開揚,更可以睇睇街景。
午市嘅套餐好簡單,就喺一份主菜配一份餐湯,定價為$138-$208,飲品剛需要另外加配。
bowl南瓜忌廉湯
首先第一眼好眼熟就喺啲餐具,正正就喺求先擺晌飾櫃裡面嘅餐具。橙黃嘅南瓜忌廉湯好香甜,南瓜味又突出,口感細膩滑溜,但又飲得出唔會落太多忌廉而變得好「漏」;碟旁嘅小包初時以為喺士乾嘅一類,但咬落好軟熟。
bowl牛油果多士 $138
老婆飲食一向都講健康,所以,揀咗呢一道較為清新嘅牛油果多士,賣相無預期以牛油果鋪天蓋地咁擺出嚟而嘩嘩聲,不過,放咗一大隻流心蛋上面,就有少少意外驚喜。件酸種麵包好好食,皮脆而有咬口,富麥香,牛油果蓉只薄薄一層,相反,加咗好多酸香嘅蕃茄莎莎,以及好厚身嘅黑醋,食落甚醒胃。
bowl海鮮意大利飯 $188
我就死梗少少,始終覺得煮意大利飯先考到師傅手勢,所以,有得揀,都揀番道海鮮意大利飯一試。賣相唔會好浮誇,夠平實,睇落啲飯粒濕潤得嚟唔會太過水,入口果然唔錯,有咬口,飯心又唔會感覺太生,可講喺恰到好處。而幾款海鮮,都新鮮鮮甜,尤其啲大蝦,爽彈有蝦鮮味。
bowl舒壓花草茶 $88
唔使多講,揀得呢款花草茶,一定喺因其功效,以多種花草、乾果、天然草本香料混合而成,功效多多,尤其可以舒緩壓力、寧神安眠。茶色淡淡,味道幽香,飲落好舒服、順暢,如配點點楓糖,感覺更好。
bowl玫瑰拿鐵 $65
其實,心底裡覺得啲定價喺有啲貴,不過,見到外觀咁靚嘅拿鐵,都無所謂啦。咖啡面嘅飛碟,正正喺品牌嘅標誌,入口順滑,口感平均,咖啡味醇厚而滲出陣陣玫瑰花香,讓人稱心。
真喺一段時間無咁悠閒晌星期六食午餐,今次嘅午餐感覺好寫意,尤其晌呢排動盪嘅氣氛中,實在需要多一點生活調劑,珍惜每一刻,活在當下。

個人評分
味道:9/10
環境:8/10
服務:8/10
抵食:7/10
平均每人消費:HK$265

餐廳資料:
Vivienne Westwood Cafe
銅鑼灣百德新街27-47號Fashion Walk 1樓F-8號舖
2799 5011

沒有留言:

發佈留言