翻開餐牌，選擇確喺非常之多，由第一頁嘅限定招介之後，仲有就喺湯品、小食、沙律、漢堡、薄餅、海鮮、肉類、意大利麵、意大利飯，以及兩大頁飲品。所有主食，額外加多$48就成為套餐，即多咗餐湯及飲品。
甘筍蘋果忌廉湯
是晚餐湯都幾特別，以甘筍及蘋果入饌，而且，感覺落忌廉都好輕手，因為入口柔滑得嚟，唔會太厚身，加上甘筍夾蘋果令味道頗清爽，最緊要喺啲湯夠熱嘛。
意大利香草包
上餐湯之時，都會奉送埋餐包，一個個小圓包，似喺意大利香草包，不過，食落香草味又唔喺話好強勁咁，但質感極之軟熟，仲熱辣辣添，就好似新鮮出爐咁，塗點點牛油，已好好食。
羽衣甘藍燒大啡菇黑松露野菌薄餅 $148
呢一道薄餅專登叫嚟俾老婆試，因為喺素薄餅，賣相幾靚仔架，而且，落咗多種材料，除菜名所顯示嘅食材，仲有車厘茄、櫻桃蘿蔔，故此食味豐富；餅底用上「餅乾」底，非常脆口，混埋啲黑松露、芝士，更加咗少少黑醋，味道甚富層次而多變。
香煎西班牙豬鞍扒配蘋果醋汁 $158
照顧吓我呢等食肉獸，都要點一客豬鞍嚟試試，件豬鞍燒得幾正咁，帶點焦香，伴有扒新薯、茄子。落刀都好易切開，咬落肉質都軟腍，而帶微微爽口，沾上蘋果醋汁，令入口嘅感覺更輕盈。
龍蝦汁大蝦帶子意大利飯 $158
另一道主菜就要咗道意大利飯，呢道菜性價比高，因為用上龍蝦汁去烹煮，啲大蝦及帶子都似梗似樣。先試啖飯，好得，極有蝦鮮味，又有咬口感；大蝦及帶子都喺有質素嘅食材，鮮甜爽口，唯一挑剔喺未夠熱辣，個人覺得要打少少折扣。
德國野莓茶
姨仔揀咗野莓茶，茶包品牌喺嚟自德國嘅「Teekanne」，有百多年歷史，不過，小弟對茶包嘅品牌就唔多研究，認識有限。但姨仔就話，味道雖然香就香，卻頗酸。
熱情果檸檬茶 +$6
老婆喺熱情果「粉絲」，順利成章揀咗呢杯「檸茶」，茶底喺用上同一品牌嘅伯爵茶口味去做，加咗啲熱情果果漿，微微酸，卻好清爽。
鮮奶咖啡
除非要啲特別口味，如玫瑰、榛子、焦糖，否則，嗌一般嘅鮮奶咖啡喺唔使補錢，而鮮奶咖啡就更喺小弟「飛弗」添。個拉花都好靚喔，花紋細緻，口感亦好醇和，喺一杯沖調得具水準嘅鮮奶咖啡。
整體嚟講，以荔枝角區而言，定價都唔算得平，幸而，都食得出用料喺有一定嘅質素，服務亦不俗。不過，有一點就個人覺得唔合理，本來揀呢間餐廳都有部份原因喺可以儲「亞洲萬里通」，不過，埋單時再問清楚，原來要散點所有食物先得，即喺+$48轉套餐就即時喪失資格，無奈。
個人評分
味道：8 /10
環境：7 /10
服務：8 /10
抵食：8 /10
平均每人消費：HK$225
味道：8 /10
環境：7 /10
服務：8 /10
抵食：8 /10
平均每人消費：HK$225
餐廳資料：
Little Break Coffee & Kitchen
荔枝角長義街9號D2 Place一期地下G03舖
2742 2782
Little Break Coffee & Kitchen
荔枝角長義街9號D2 Place一期地下G03舖
2742 2782
沒有留言:
發佈留言