阿珠嬤 Azhuma：公「珠」同好

美麗嘅誤會通常始於溝通上，不過，有時有啲嘢又確喺好易令人誤會嘅，就好似早前有食友約我食飯，選址位於西營盤嘅「阿珠嬤」。初時都無為意，見個名以為喺賣韓國菜，嚟到先見喺賣台灣菜，幸而台菜都好啱我。

走進店內，環境一眼睇晒，店鋪呈深長形，屬小店格局，裝飾簡約光猛，亦富時代感，有別一啲台式餐廳玩古早味。

不過，要解釋點解間店叫「阿珠嬤」？其實，真喺有得解，就晌餐牌內頁頭版，就印咗名字嘅由來。

而且唔止名字特別，佢哋仲大有來頭，當中嘅清燉牛肉麵、紅燒牛肉麵，都得過獎，可謂深藏不露。

食物方面，確有不少選擇，如牛肉麵系列、小食、手路菜系列、私房拌麵、行家精選、國民飲品……等等。

鳳梨綠茶 $20

平常大多數會揀珍珠奶茶，不過，遇見到一款鳳梨產品，反而，想試試新嘢。大大杯嘅鳳梨綠茶，色澤金黃，定價又唔貴，茶味好清幽，茶味中滲出菠蘿嘅清甜，最驚喜喺底下沉澱咗啲菠蘿蓉，即喺啲菠蘿汁大有可能喺新鮮貨。

黑糖珍珠鮮奶 $32

友人喺黑焗7粉絲，但意外地擺咗個烏龍，以為喺珍珠奶茶，點知原來喺鮮奶嚟，幸而佢對鮮奶都啱。加入黑糖後，令賣相好吸引，奶香頗濃，珍珠又咬口，更可以揀甜度添。

秘製牛蒡絲 $15

先嚟一碟牛蒡絲過過口癮，每條都切得纖細，淋上秘製醬汁和黑芝麻，入口爽甜又有幾分惹味。雖然，小弟食嘢都唔喺太講健康，但牛蒡本身有多種養生之效，多食亦無妨。

西螺黑豆醬油滷豬腳 $40

賣到$40一客，原以為都有一碗，其實只喺有兩大隻，不過，豬手滷得又香又入味，好有一種醇厚感，豬皮軟腍得嚟帶點爽，咬落有骨膠原大爆發嘅感覺。事後上網再查查，原來「西螺」喺雲林縣一個地方，其出產嘅黑豆醬油寧舍醇和，皆因水質好、氣候佳。

滷味拼盤 $58

再追加一客滷味拼盤，以滿足我哋對滷水嘅喜好，一客有齊牛肚、牛腱、翅小腿（即喺雞鎚）、豆干，滿滿嘅一大碟，滷得色澤深沉。 牛肚口感柔韌，牛腱好鬆化，非常入味，雞鎚相對幾樣則普通少少，豆干口感實淨有咬口，整體都有水準。不過，個人感覺就喺欠咗隻滷蛋囉，哈哈！

冠軍清燉牛肉麵 $78

最後以一碗台式牛肉麵嚟墊底，通常我都偏向揀紅燒，因為濃香惹味，不過，見佢嘅清燉牛肉麵以「冠軍」名之，好奇下又想試試佢。而麵條方面，可以揀刀削麵或陽春麵。

成品確喺比較清，先試一口湯，見佢泛起少少油花，但入口又算喺清而不濁，味道還可以；再試試啲刀削麵，滑溜而有韌勁，又耐浸，其厚身嘅麵條食落寧舍有咬口感；啲牛肉又點先？出奇地軟腍，口感鬆化，甚具肉香，而且，份量都唔少架。

提一提，如果點麵食、飯品，飲品都有減$6嘅優惠，又唔收加一，所以，定價都相宜。此外，招呼都好唔錯呀，阿妹又主動收拾好枱面喔。

個人評分
味道：8/10
環境：7/10
服務：8/10
抵食：8/10
平均每人消費：HK$120

餐廳資料：
阿珠嬤 Azhuma
西環皇后大道西305號地舖
2537 3248