2019年9月8日星期日

大豐澳門翠苑餐廳:大豐吹,茶記講求快快脆。

完咗聚會,落到嚟太子,因為稍後仲要出九龍城攞嘢,所以,就隨隨便便揀間茶記食晏,務求快靚正搞掂。晌近太子地鐵一截嘅花園街,餐廳嘅選擇非常多,走入嚟「大豐翠苑」純粹近街口,費時再嘥時間搵。
環境唔多講,一圖大至睇晒,都喺慣常嘅茶記格局,枱櫈嘅排陣夠逼,而午市坐滿人,感覺就予人更逼夾,但地方算喺乾淨企理,牆上就貼咗好多澳門景點相。
嚟到食晏,焦點都喺放晌午市快餐,喺晌茶記快靚正之選,星期一至日都有供應,每日均有8款選擇,包餐湯及餐飲,定價都喺$47-$54。
bowl雪耳木瓜湯
初時以為喺例湯、餐飲二揀一,原來兩樣都包。個湯裝得大大碗,飲落感覺幾潤,覺得好足料。
bowl椒鹽豬扒飯 $47
茶記嘅碟頭飯一向都喺飯量多,多到成座山咁,平時午餐我都喺食唔多,都唔醒起叫佢哋少飯添,免浪費都會清晒去。唔止飯,啲豬扒都好多,件件炸得甘香,卻喺少少油膩咁啦,但好香椒鹽味,少少辣,無過鹹,算唔錯喎。
bowl熱奶茶
喺小弟去茶記嘅首選,用上好傳統嘅厚身瓦杯,變得特別有期望,入口甚具茶香,茶底確實不俗,口感好順厚,但滑度就未致於絲咁滑,不過,感覺已喺好唔錯。
睇到間嘢有唔少負評,大多數都喺指到服務方面,咁我又好彩,無遇到有咩唔好招呼,個阿姐都幾好口。食物方面,則跟預期茶記質素差唔多,若非啲豬扒有啲油膩,而奶茶又未夠滑,否則,我都俾個笑佢。

個人評分
味道:7/10
環境:6/10
服務:7/10
抵食:8/10
平均每人消費:HK$47

餐廳資料:
大豐澳門翠苑餐廳
太子花園街207-207A號地下
2381 8188

沒有留言:

發佈留言