怪唔之得有咁多客人捧場啦，當晚所見，可以講全場滿座，仲見有啲枱已翻咗一、兩轉，可見香港人喺幾鍾意食日式燒肉。好多日式燒肉店嘅裝修都喺走簡單路線，又帶點工業風。
而個人覺得最緊要嘅喺抽風，佢哋嘅抽風用咗上抽式，個人咁多年食韓式、日式燒肉嘅體驗，下抽式嘅效果會好啲。然而，佢哋加咗個透明大膠蓋，效果算喺理想啲。不過，搶火起上嚟，都一樣好大煙吓。
除此之外，銅鉗、鉸剪、醬汁、調味料……等等，已放晌枱上，一齊準備就緒。
環境、用具介紹完，就講講有咩選擇，其實，翻一轉餐牌，就見到有好多嘢食，不過，唔知點揀，晌門口處楝咗個牌，就有啲人氣系列，不妨當個參考。
而細看餐廳，選擇確喺非常之多，部份配有圖片，十分吸引。由前菜、小食、沙律、牛肉、豚肉、雞肉、海鮮、野菜、食事、甜品……等等，都一應俱全照顧到。而肉類選擇多到花多眼亂，當中，有用上澳洲M9、宮崎黑毛和牛，海鮮亦選用唔同國家嘅靚貨，更特別之處，有唔同嘅調味可選，如汁燒、柚子胡椒、香草醬、味噌……等等。
另一組細餐牌，就提供各式各樣嘅飲品，主打喺酒類飲品，提供清酒、燒酌、紅 / 白酒、梅酒、啤酒、果酒，甚至威士忌都有；唔喜歡飲酒嘅，可以揀揀梳打、汽水……之類。
蜜桃梳打 $45
食燒肉點都要飲住杯凍飲嘅，揀梳打就最夾架啦，梳打口味共有5款，蜜桃就喺心水之一。睇色澤，應該喺白桃嚟，入口清爽冰涼，陣陣清甜嘅白桃味，感覺不俗。
和風菠菜 $32
趁未燒肉類之前，先有啲前奏，就喺食啲前菜或沙律嚟開開胃。呢小碟和風菠菜，有啲韓式前菜嘅感覺，菠菜簡單調味，再糝上大量生產芝麻，簡單而清新，啲菠菜又亳無澀味，而且，又可以作為肉與肉之間嘅間場。
薯蓉沙律 $38
搵薯仔做沙律，聽落普通，但確喺又喺不過，做得好嘅一樣可以好好食。將薯蓉做成波波咁，自然好睇咗，而薯蓉做得綿滑，加入啲甘筍絲後，增添口感，淋上胡麻醬，令味道唔單調，真喺可以返到屋企試做吓。
特上牛胸腹肉 $98
呢個喺一心想試嘅部位，因為睇見標示「鑽石」標誌，表示喺希少部位。上枱時見到啲牛胸腹肉鮮色紅潤，感覺「新鮮」，燒到帶點焦香，入口牛味濃郁，質感軟腍細嫩，脂肪唔會太多，甚具肉香，正呀！
蔥燒鹽香牛舌 $98
牛脷喺小弟喜愛嘅部位，亦喺餐牌中嘅「牛繁」推介，而牛脷亦有多款口味供選擇。呢一款口味則以薄切再加少少醬汁醃過，輕輕燒至表面乾身已OK，入口仍有少許牛脷嘅韌勁，以及獨有嘅羶香。
極上厚切和牛板腱排 $198
採用澳洲M9和牛嘅貨色，自不然有一定嘅質素，而且，油花分佈平均，色澤又靚，睇見都心郁啦。簡單以鹽同黑椒調味，所以，食落既食出肉嘅原味，更充滿油香而不過火，細嚼肉質嘅纖維真喺有種入口即化嘅感覺。
特上厚切牛肋條 $168
又喺採用澳洲M9和牛，亦喺「牛繁」推介，長長嘅牛肋條已經鎅晒花，以燒汁及味噌醃過，更加入味。我哋原條咁燒，燒至兩面都「上晒色」就覺得差唔多。剪開一小嚿一小嚿咁食，裡面仲喺嫩紅色，肉質軟腍，外層焦香，配點蔥花，好食。
嚴選雞頸肉 $78
豬頸肉就食得多，見有款雞頸肉，好奇唔知咩料，就試試其柚子胡椒口味喺點。單睇外觀，同平常食嘅雞柳唔喺太大分別，燒過之後，個樣亦喺，亦無預期好似豬頸肉咁爽爽哋，不過，口感就好腍好滑，而且，帶有柚子清香，又OK喎。
特選豬五花 $68
食咁多牛，又試埋雞，點都要試試佢哋嘅豬肉嘅，五花腩就最有代表性喇，以味噌簡單醃過，睇落都只喺有一層層窄身肥膏，但猛光燒後，逼出油脂，入口又唔算好肥，反而，有一份甘香感。
大人氣！霧島溫泉蛋飯 $48
食事裡邊，呢一款喺「牛繁」推介，講開霧島，我都識架，幾年前計劃去南九洲時，就有打算去霧島，不過，我哋唔識揸車，搭公共交通過去又好煩，先緣慳一面。講番個飯，賣相幾有心思，將中間掏空打隻半熟溫泉蛋，而飯面加上唔少飯素、芝麻同紫菜，撈勻嚟食，好好味。不妨配嚿燒肉，自製燒肉壽司，更加正呀！
溫馨提示吓，入門口有個牌寫到明，用餐時限為90分鐘，不過，當晚嘅感覺，都喺先小人後君子，都無嚴格執行。不過，一般嚟講，個半鐘嘅用餐時間都差唔多。順帶一提，啲招呼幾好，主動幫手調校火力，先後幫忙換咗3次鐵板。
一次過試咗咁多款牛肉，「牛繁」嘅肉真喺幾得，至於肉類以外嘅食物，都一樣做得唔錯，值得翻兜。
個人評分
味道：8/10
環境：7/10
服務：8/10
抵食：8/10
平均每人消費：HK$320（信用卡9折）
味道：8/10
環境：7/10
服務：8/10
抵食：8/10
平均每人消費：HK$320（信用卡9折）
餐廳資料：
牛繁 Gyushige
尖沙咀金巴利道40號MW Plaza地舖
2638 8099
牛繁 Gyushige
尖沙咀金巴利道40號MW Plaza地舖
2638 8099
沒有留言:
發佈留言