2019年8月9日星期五

8鍋臭臭鍋 8Pots HK:一鍋「豐」

近年,台式嘅一人火鍋好似雨後春筍咁,越開越多。多年前晌天后光顧過一家具質素嘅台式一人火鍋店「一鍋」(可惜已結業),回想嗰次應該喺第一次接觸呢類台式火鍋店。今晚到訪嘅「8鍋」,喺台灣過江龍,自然有一定嘅實力,嚟到門口,見咁多人排隊等安排,就知實力不凡啦。
等得唔耐,就有枱,馬上內進,一室都坐滿人,好不熱鬧。裝修簡約,水泥地、仿紅磚柱、昏暗嘅電燈泡……等等,都令整個環境都添加上點點氣氛。目測所見,在座嘅絕大部份都喺年青人。
食物嘅選擇好簡單,餐牌一頁喺9款鍋物套餐,雖然叫套餐,都只不過喺一款鍋物,再配白飯或粉絲,可以加$12轉滷肉飯。
反轉餐牌另一面,就印有數款小食、加點材料及各式各樣嘅台式飲品,整體嚟講選擇唔少。雖然,配飲品就無咩優惠,但食火鍋,點都要搭杯凍飲嘅。
bowl荔枝冰沙 $33、芒果冰沙 $35
本來都想試芒果,但諗諗吓,荔枝清爽啲喎,所以,小弟就揀咗荔枝冰沙,其實,同平常飲嘅沙冰都喺咁上下,質感幾幼細,唔會有啲冰粒感,荔枝味果然好清爽,加上啲冰沙夠凍,襯火鍋一流呀。
bowl滷肉飯 +$12
我哋其中一客轉為滷肉飯,睇睇佢哋嘅質素做成點?唔喺講笑,誇張啲講真喺滷肉多過飯呀,啲滷肉煮得好油亮,好入味,所以,非常之香濃,不過,感覺都喺油咗少少,唔怕肥嘅客人,碗飯絕對稱得上佳品。
好快,兩大鍋鍋物就送上,而枱旁就送有醬油、辣椒油沙茶醬、豆瓣醬、蒜蓉,而餐牌亦有有建議混合嘅比例,當然,口味嘅嘢,隨自己喜好啦。
bowl沙茶牛肉鍋 $112
佢哋嘅餐牌會寫晒成個鍋包咩食材,有娃娃菜、牛肉片、米血糕、牛丸,心型魚豆腐、沙白、粟米、金針菇、炸枝竹、粉絲、鳴門卷、花枝丸、蕃茄、甜不辣同青豆,十多樣材料,真喺一鍋「豐」,絕對童叟無欺,否則,都唔會大鍋成咁啦,相信唔少女生應該清唔晒一鍋。
個沙茶湯底唔錯喎,頗惹味,臨尾用嚟淥麵就正晒,不過,我哋無咁做,因為單喺兩個鍋加埋碗滷肉飯已經好飽;而啲食材亦唔差,堅喺份量十足,好似啲牛肉片咁,唔會得一、兩炷就無晒,仲好嫩滑;花枝丸又好有墨魚味,吸咗沙茶味嘅枝竹亦份外好食。
bowl芝士牛奶鍋 $112
另一款鍋物,加入牛奶做湯底,所以一身奶白色。同個沙茶鍋一樣,材料豐富,從餐牌所列出嚟嘅就有娃娃菜、白豚肉、日本南瓜、心型魚豆腐、台灣貢丸、麻吉燒、沙白、香菇、蟹柳、金針菇、炸枝竹、鳴門卷、雞蛋、烏冬、芝士片、蛋餃,雖然無認真咁對過,食落確喺有食過以上食材,無欺場。
面面放上一大片芝士,待溶透之後,打散埋隻蛋,但湯底立時變得又滑又香;由於我同老友共享兩個鍋,而部份食材只有一人份,就唔喺樣樣都試到,但所試到嘅,質素都喺唔差,好似啲豚肉、南瓜、蛋餃都好唔錯。清晒兩個鍋之後,大家都大叫飽到上心口。
材料豐富,份量十足,質素又唔錯,真喺唔怪得餐廳嘅生意咁好,座無虛席。服務更喺貼心、細心,唔喺隨口噏,因為是夜工作關係遲咗,趕到餐廳一身汗,有個妹妹仔竟然即時遞上抹紙及冰水俾我降降溫,真喺貼心;而食到中段,加湯就慣常啦,但有店員都細心留意到我哋個爐無晒火,幫手加番啲火酒糕,就連我哋自己都無為意呀!

個人評分
味道:9/10
環境:8/10
服務:9/10
抵食:8/10
平均每人消費:HK$167

餐廳資料:
8鍋臭臭鍋 8Pots HK
尖沙咀金巴利道77號地舖
2885 7867

沒有留言:

發佈留言