打開主餐牌，選擇非常之多，由炸雞、小食、湯品、沙律、部隊鍋、韓式韓肉、韓式煎餅、炒粉絲、炒年糕、韓式拌飯……等等，甚至兒童餐，諗得到嘅韓國菜大部分都有。
此外，更有啲季節限定菜式，如鰻魚及醬油蟹，不過，唔知點解前者喺春季限定，但依家已經喺仲夏，都仲有供應，大抵韓國仲喺春季啩！
而上次所見嘅素食餐牌，則仲有供應，相信素食元素已經喺恆常化，但睇落款式好似轉咗唔少。
至於飲品方面，款式多之餘，亦甚具特色，好似我哋所揀嘅款式就知啦，而且，更有多款含酒精類飲品。
見枱上楝咗個牌，推介一款4℃手拉冷麵，早排睇過韓國綜藝節目「一日三餐（第四季）」，有見過文晸赫整個豆漿冷麵，李瑞鎮同尹鈞相都食得津津有味，勾起要試試嘅心態。
巔峰狀態 $68
落單後，食物就要等等，但飲品好快就到。小弟要咗呢杯以羽衣甘藍、牛油果、芒果及香蕉打成嘅特飲，面頭仲灑咗少少黑芝麻做點綴。入口質感好豐厚、好綿滑，感覺好飽肚，而味道偏向芒果及香蕉嘅香味。
冰Storm馬格利（菠蘿） $58
親友就揀咗無酒精版嘅，如果加酒精（韓國馬格利甜酒）嘅就賣$68，不過，如果無加酒精，佢話就有啲似飲鮮菠蘿汁，而果汁內仲混有少少果肉，兼且以冰鎮住，飲到尾都咁清涼冰爽。
黑糖玫瑰花茶 $68
老婆一向都揀熱飲多，呢一款就喺我幫佢揀嘅，壺玫瑰花茶本身都頗幽香，而黑糖就由客人自己添加，甜度自主，佢就話加咗黑糖後嘅玫瑰花茶，感覺更滋潤清甜。
素泡菜芝士薯條 $78
之後，陸續上菜，先喺份炸芝士薯條。以往，芝士薯條都試唔少，加咗泡菜元素，真喺唔知會點。上枱時，跟餐牌嘅相好唔同，泡菜喺做成醬汁，另裝起再沾，都好，可以自己慢慢試個辣度。薯條好香脆，帶濃香嘅芝士，沾咗啲泡菜汁，酸酸辣辣，而辣度都好中和，唔會太刺激。
牛油果開心果素炸雞 $188
上次嚟就試過一款「韓式甜辣素炸雞」，感覺幾得，所以，今次專登點嚟俾老婆試吓，而揀呢一款口味，皆因佢好鍾意牛油果、開心果呢兩種食材，正好開正佢嗰瓣。單睇賣相，落足牛油果醬，又糝咗唔少開心果仁碎及芝士粉。
啲素雞炸得金黃，口感相當似雞肉，入口又唔油膩，混合埋啲香滑嘅牛油果醬、開心果仁碎及芝士粉，味道豐富並相當富層次，細味下仲有微微青檸香滲出，確喺好食無失望。
韓式嘅冷麵並非第一次食，但亦唔多試，對上一次就喺晌「炑八韓烤」食到嘅八爪魚冷麵，晌夏天食真喺好清爽。「The Joomak」嘅冷麵可選原味手拉麵或手拉蕎麥麵，醬汁則可揀傳統豆花醬汁或薑柚豉油汁，而且，都有特定食法，所以，可以先睇睇餐牌嘅指引作為參考。
素水晶豬肉冷麵 $168
先登場喺素水晶豬肉冷麵，晌盆底加入乾冰，極有仙氣之效，加上擺盤花過心思，增加賣相亮點。純素水晶豬肉據店員介紹喺自家製，配咗傳統豆花醬汁，仲伴有綠豆粉及胡麻醬，而同時亦會送上冰粒，務求令你涼透心。
啲手拉麵咬落仲保持住韌勁，口感絲滑，撈埋啲甘筍絲、青瓜絲，令口感更清爽；至於個傳統豆花醬汁本身都幾杰身，待啲冰粒溶溶哋就啱啱好，其豆味幾清純；啲素水晶豬肉都幾得意，口感確喺有幾分似，但稍嫌碎濕濕啲啫。
韓烤牛肉冷麵 $168
另一款就喺韓烤牛肉冷麵配薑柚豉油汁，除有甘筍絲、青瓜絲及泡菜外，更多咗溏心蛋，伴上紫菜碎，同樣營造出陣陣煙霧，保持仙境嘅感覺。
我哋都唔喺點太跟足指引，都喺隨心自己左撈右撈，而薑柚豉油汁配冷麵確喺幾好，酸酸鹹鹹，保持清爽嘅口感；韓烤牛肉相比起啲素水晶豬肉就更啱我口味啦，啲肉幾香，腍滑可口。
雖然是夜有唔少客光顧，亦有翻枱情況，但招呼算唔錯，上菜亦快手。如果喜歡試新嘢，呢度確喺幾多特色菜，此外，迎合潮流，加入好多素食，鍾意食得健康啲或輕盈啲嘅朋友就啱晒啦！
個人評分
味道：8/10
環境：8/10
服務：8/10
抵食：7/10
平均每人消費：HK$290
味道：8/10
環境：8/10
服務：8/10
抵食：7/10
平均每人消費：HK$290
餐廳資料：
The Joomak
尖沙咀廣東道3-27號海港城海運大廈3樓LCX 34號舖
2111 0851
The Joomak
尖沙咀廣東道3-27號海港城海運大廈3樓LCX 34號舖
2111 0851
沒有留言:
發佈留言