2019年7月7日星期日

野玩田店 Something Wild - The Farm:抵玩半自助午餐

兩年幾前同朋友嚟食過晚飯,嗰時都睇過佢哋晚餐以外嘅餐牌,知道佢哋有做半自助午餐,嗰時嘅食評仲話會搵日帶埋老婆嚟試吓,結果,「搵日」就搵咗兩年,順道慶祝埋老婆嘅朋友生日。
我哋嚟得早,12點未夠就入座,所以人唔多,但坐吓坐吓,最高峰都有八乘幾滿,大部分都喺家庭客。我哋都幾鍾意呢度嘅環境,一室以木系為主,裝修簡約帶自然系,又擺設勁多盆栽,加上高樓底,兩邊大窗又採光十足,整體環境都予人舒適悠閒。
呢度主打喺食得天然,故選用唔少健康食材,配合番個環境,就連餐枱墊都好有田園自然氣息!
午市主要喺供應半自助午餐,平日就故然平啲啦,但星期六、日、假期都唔太貴,只享用自助沙律吧及甜品吧,都喺$148,若果加主菜,定價都喺由$168-$208,無論揀邊樣,都配餐包及餐湯,更可以慢慢嘆,食到3:00pm。
此外,亦包埋基本餐飲,但想享受好啲,無問題,升級指定特飲,+$12,轉為鮮果沙冰,則+$30。
bowl甘筍忌廉湯
人齊就送上餐湯,色澤橙紅,感覺幾對辦,飲落確喺幾滑溜,不過,老實講,甘筍味唔算強,所以,初初飲幾啖都估唔到喺乜。
bowl麵包籃
份量喺人頭數,而且,啲包都喺細碼份量,咬兩啖就無,不過,就屬於高質素嘅歐陸包,無論邊款包都好食。本來都好奇啲包有無得添,不過,眼見出面都叫有好多嘢食,就無問喇 。
先講講自助沙律吧及甜品吧喺點,就晌入門口嘅左邊一排長枱,地方唔算大,收得你百零蚊,當然唔可以用酒店嘅自助餐去比,不過,如果啲嘢啱食又試勻晒,肯定可以捧肚走。
bowl沙律吧
兩款沙律菜,當然以羽衣甘藍為具賣點啲,加上藜麥、紅莓乾、橄欖、菠蘿粒、柚肉、紅菜頭、粟米粒、鷹咀豆及紅腰豆……等多款配料,以及一大碟新鮮生果,配以橄欖油、黑醋及3款醬汁,點都砌到一大碟沙律啦!如果唔想煩要左溝右溝,亦有一盆預製好嘅蘋果沙律供選擇。
小弟就例牌以沙律作為頭盤,務求等啲酸香食材幫手開開胃。晌沙律吧中,樣樣都揀啲,不知不覺間就砌出一大碟,啲食材算幾新鮮,啲菜又好爽脆。
bowl冷盤類
以五顏六色嘅小鉢裝起,擺咗多款的的骰骰嘅冷盤出嚟,包括胡麻醬豆腐、日式螺肉、黑醋柑肉、胡麻秋葵、麻辣藕片,此外,仲有兩款凍切腸及芝士盤。
冷盤就可以分兩轉食,第一轉喺搵啲凍切腸伴芝士粒,再加點生果,我幾鍾意啲芝士粒,靚嘢嚟,芝士味濃郁。
另一轉就一次過拎晒5款的骰冷盤返嚟,同枱一齊「些牙」,有邊啲啱口味嘅就再個別咁拎,可以試到多啲之餘,又絕唔會嘥嘢。柑肉同秋葵就最好,次豆腐都不俗。
bowl熱盤類
食完幾轉生冷嘢,喺時間轉戰熱盤啦。熱算類,一眼睇晒,就喺得4款,包括炒什菜、炸薯仔手指、豬肉腸及泰式魚餅。
咪睇我拎咗一大碟,其實都喺同老婆共享,因為佢唔偏少肉,所以,肉類嘢就只喺黐我少少。咪睇小啲炒什菜,炒得保持爽口感,不過啲薯仔手指就腍晒,然而,豬肉腸及魚餅就好食。
bowl香烤燒春雞半隻配野菌汁 $188
因為啲沙律吧、冷盤、熱盤、甜品都好啱食,所以,原本都打算唔加主菜,不過,見好幾款都有興趣,卒之,決定只點烤雞一款主菜。
話就話春雞,但半隻嘅份量都一啲唔少,而且,燒得外皮金黃,好靚仔,仲伴有好多薯菜,而啲薯仔唔喺普通嘢,有啲BB露筍、意大利青瓜。至於啲烤雞喺點?真喺唔喺得個樣,好入味,夠晒香草香,肉質頗嫩滑,尤其脾位。
bowl甜品吧
尾聲,喺甜點時間,唔算好多,亦唔叫好特別,一共6款,有焦糖布甸、迷你朱古力撻、檸檬蛋糕、英式鬆餅、麵包布甸及芝麻糊,明顯芝麻糊喺比較迎合上年紀嘅客人而推出。
老婆試咗啲芝麻糊,佢就覺得麻麻,有芝麻香,但質感較水。至於其他,焦糖布甸做得滑溜,仲睇到喺用雲呢嗱條做,唔喺用香精貨色,面層嘅焦糖又夠焦脆;另一款心水就喺件朱古力撻,帶有濃濃嘅朱古力香味。
bowl即磨咖啡
食甜品,又點可以無杯咖啡嚟襯吓吖,無特別加錢升級,只要杯基本嘅咖啡,入口都好香醇,不過,如果啲奶有加熱就更好。
我哋就繼續邊傾邊食,臨尾仲整多碟生果碟一齊共享,有任食好就好在呢樣,食吓停吓。除環境舒服,服務亦都好熨貼,收碟好快手,啲侍應亦好有禮貌,讓我哋有個美好嘅周日時光。

個人評分
味道:8/10
環境:8/10
服務:8/10
抵食:8/10
平均每人消費:HK$180

餐廳資料:
野玩田店 Something Wild - The Farm
尖沙咀河內道18號K11購物藝術館2樓201號舖
3755 4899

沒有留言:

發佈留言