對上一次嚟尖沙咀「Espuma」都已經喺2016年4月嘅事，環顧店內環境，似乎就無乜點變，依然一派悠閒嘅咖啡店，中間地下鋪咗特色嘅西班牙地磚，一邊全半身玻璃窗，盡收陽光嘅活力，另一邊就特色嘅彩色玻璃窗，加上天花例插好多植物，無走埋去查證真偽，但已令人感到綠化悠然。
講到明喺嚟食其下午茶套餐，所以，就唔多介紹其他嘢，單刀直入介紹吓個套餐有啲乜。呢個下午茶套餐喺二人份，賣$258 + 10%，共有11款食物，概略而言鹹甜各半。
並包多款基本餐飲，但亦可以+$15升級為指定特飲。
由於可以晌主餐升級特飲，所以，都將飲品項目都影埋出嚟俾大家參考，而我哋都轉咗果茶及特色咖啡，因為橫掂一場「見識」，就梗喺俾佢試啲特別嘢啦。
熱情果烏龍茶 +$15
雖然外面天氣熱，但表姪女一向唔飲凍飲，所以，花果茶一類就啱晒佢。小弟都試咗一小杯，烏龍茶茶底幾香，裡面浸咗好多生果，所以，入口暖暖哋而好有果香，不過，熱情果味就反而唔太明顯。
鮮奶咖啡 +$15
呢度嘅咖啡一向有保證，加上今日嚟食下午茶，就更加要杯咖啡啦。杯鮮奶咖啡嘅水準依然咁得，拉花算做得好唔錯，而正就正在口感均勻，完全無攪過，入口每口都好平均，又醇香。
因為有咁多嘢，製作需時，不過，上枱時真喺幾大陣像，一大個木箱送到啲，掗咗大半張枱，但連埋啲飲品及餐碟，都啱啱好夠擺。
打開個箱，有沙灘椅、太陽遮，真喺好有夏日感，仲跟餐牌嘅相一樣。最搞嘢喺側邊嘅紙盒，裝置咗啲發聲器，不時發出啲海浪聲，認真鬼馬。雖然無話有咩食嘢嘅先後次序，但小弟就較喜歡先鹹後甜。
迷你牛肉芝士漢堡
以迷你漢堡墊一墊肚先，做得的骰，一口咬落去，雖然包身唔算鬆軟，但啲牛肉好有肉香，又富肉汁，簡單好食。
牛油果蝦多士卷
顧名思義，就喺牛油果搭蝦肉炸成嘅麵包卷，口感唔油，亦幾脆口，但如果牛油果多啲，令口感更綿滑就仲正。
菠菜忌廉伴烤雞柳
呢個有啲驚喜喎，因為配搭頗特別，菠菜打成蓉，溝埋啲鮮忌廉，口感就好綿滑，鹹鹹甜甜咁，又無話好違和，反而，面頭粒雞柳似裝飾大於實際，但都喺好食嘅。
巴馬風乾火腿蜜瓜紅菜頭撻
相信表姪女較少接觸巴馬火腿，所以，呢道小鹹點佢覺得好特別。巴馬火腿較油潤，配上香甜嘅蜜瓜，真喺無得點輸；而紅菜頭撻就唔喺好強紅菜頭味，但勝在好脆身。
惹味釀蟹蓋
釀蟹蓋細細件，的的骰骰咁，裡面又真喺有唔少蟹肉，有誠意，都仲幾鮮味添，唔錯！
紅莓慕絲甜筒
賣相就幾靚仔，而紅莓慕絲打得好柔滑，帶點微微酸香，不過，個甜筒喺腍嘅，就令到整個甜點嘅效果大打折扣囉。
蘭香子鮮雜果布甸
蘭香子喺健康嘢，用嚟做成果凍、布甸之類外觀又幾好睇，配上鮮果，應該喺唔錯，但個人覺得個布甸（小弟就認為似果凍）就做得比較硬身，口感唔太好。
香橙果凍
呢個夠晒得意，初時睇相真喺以為擺件橙落嚟，再睇餐牌，喺橙味嘅果凍嚟，入口軟滑清甜，好有橙香，如果能用其他食材做埋塊橙皮，咁就一流。
柚子吉士撻
咁多道甜點，就以呢小件柚子撻最得我歡心，因為賣相、味道都做得好，面頭除插上一小株香草作裝飾外，仲灑上少少開心果仁碎。撻殼好鬆脆，吉士底下塗咗一陣柚子蜜，好清甜，柚味突出。
車厘子帽子蛋糕
初時睇佢寫「帽子」蛋糕，真喺唔知乜，再睇英文「Cupcake」，即喺杯子蛋糕。一小個牛油蛋糕配吉士及整粒車厘子，可以講簡單味美，蛋糕有牛油香。
青檸英式鬆餅配鮮忌廉及蜜糖果醬
最後，喺食英式鬆餅嘅時候，件自家製鬆餅做得唔錯，咬口得嚟又唔會太乾，哈哈，不過，青檸味就似乎唔好覺；而搽上鮮忌廉，再淋上大量蜜糖，清甜滋味。
第一次單獨同表姪女一齊食嘢，兩叔姪難得傾咗好多嘢，佢喺應屆DSE考生，希望佢獲得個理想成績，考到心屬嘅學科。
個人評分
味道：7/10
環境：8/10
服務：8/10
抵食：7/10
平均每人消費：HK$160
味道：7/10
環境：8/10
服務：8/10
抵食：7/10
平均每人消費：HK$160
餐廳資料：
Espuma
尖沙咀厚福街8號H8 2樓
2739 2080
Espuma
尖沙咀厚福街8號H8 2樓
2739 2080
沒有留言:
發佈留言