2019年6月7日星期五

富園豐海鮮酒家 Wealthy Garden Seafood Restaurant:街坊豐味

一班親友大部分都喺住晌長沙灣一帶,所以,做節飯都喺安排晌呢頭,近年,食嚟食去都喺嗰好幾家,所以,都少咗寫。但今次唔同,表姐揀咗呢家「新酒家」,其實都唔新,個鋪位一直喺做酒樓,只喺轉名又轉名,依家新名字叫「富園豐海鮮酒家」,唔知可以做幾耐!
酒樓環境如一般酒家,雖然,個場就未吸引到人擺婚宴,但壽宴之類應會有捧場客,皆因啲裝修新簇,光猛企理。
今次表姐揀呢度,一來就腳,二來主因喺佢哋新推嘅全包宴確喺好超值,就算喺假期,一圍都喺$2,288,除勻每人兩嚿水都唔使,提早落訂仲有燒雞升級為燒鵝,堅喺俾成隻鵝,包12位茶芥連加一服務費,8罐汽水,2支大樽裝啤酒。
bowl紅燒竹笙海皇翅
我哋食頭輪,估唔到唔喺啲燒味嚟先,一起手喺個翅,當喺廣東人嘅習慣,先嚟食啖湯,不過,小弟無食翅多年,就只好睇住大家「起筷」先。個翅份量唔少,分足12碗都喺滿碗,而且,用料十足,據大家講,味道唔錯,推得唔會太稀或太漿,但翅嘅份量就肯定有限咯!
bowl上湯焗美國龍蝦(3隻+伊麵底)
睇樣你就知道龍蝦無縮皮,堅喺落足3大隻美國龍蝦,啲鉗大大隻,夠厚肉,又爽口,真喺意外地做得好喎;至於啲伊麵,亦煮得爽身,無過籠煮腍晒嘅問題出現。
bowl翡翠蝦仁鳳片
繼續保持大份量嘅出品,翡翠就用咗翠玉瓜,都貼題啦,而啲瓜都炒得仍有爽脆感;蝦仁既大隻,又鮮甜,食得出唔喺雪藏貨嚟,而雞肉亦都嫩口,唔會「嚡烚烚」,整體味道亦無酒樓常犯過鹹嘅弊病。
bowl鮮淮山杞子浸菜苗
再嚟又喺上多一道素菜,呢一味絕對喺健康菜式,因為有齊爽口嘅鮮淮山、木耳,又有少少杞子,不過,菜苗就喺較細嫩嘅白菜仔,配以清甜嘅上湯,其實,用料睇落就普通,但整得唔錯呢!
bowl清蒸大金花尾躉
菜單寫得算老實,唔會就咁生猛海鮮,而喺花尾龍躉。睇外型應足3斤重有多,雖然咁大條,蒸得火候啱啱好,無熟唔透嘅問題,中心位一夾就離骨,肉質嫩滑,富鮮甜味,所以話呢,食魚鮮,都喺清蒸最好。
bowl大紅衣金袍
食到中尾段,先至送上乳豬全體,隻豬真喺好「乳」吓,因為睇其身形真喺好細隻。師傅手勢真喺燒得唔錯,外皮十分之香脆,啲肉又無醃過鹹;雖然睇落層皮下脂肪唔厚,但其實一口咬落都有少少油膩。
bowl日式沙律米網卷
有別平常晌酒宴所食到嘅沙律卷,卷身用啲米網做,體形較大碌,入口卻鬆脆不膩,呢一點已予人有個好印象;裡面釀入嘅都喺啲雜果沙律粒粒,無話好驚喜,但勝在整體食起嚟有份清新感。
bowl潮蓮燒鵝皇
換咗燒鵝真喺正好多,睇落仲要喺原隻獅頭鵝,一來份量上就肯定比燒雞多咗,二來燒鵝味道較特別,又富油香,的確,隻鵝都燒得好好食,肉質細緻,外皮極之香脆,讚!
bowl富豪炒飯
最後,一次過上晒炒飯、蟠桃及糕點,所謂富豪炒飯,講真就有啲似楊州炒飯,加入大蝦仁及迷你帶子粒,雖講唔上驚喜,但就絕對炒得有水準,飯粒分明爽身,食到最尾都唔會見碟底有油,啲蝦仁又爽,又混了啲翠玉瓜粒,添加咗口感。
bowl龍母蟠桃
食咗咁多道菜,都覺得班師傅做菜無「求其」,就連呢籠「蟠桃」都做得似模似樣。每個包,除滿滿嘅蓮蓉,仲加有鹹蛋黃,可以講喺落足料,包身又蒸得軟熟,真喺唔錯呀。
bowl精美糕點
而是夜嘅糕點喺紅棗糕,糕身夠挺,唔會太過軟腍腍,入口帶點煙韌嘅口感,最正喺嗰陣紅棗味,真喺幾濃郁吓,用料不賴喎。
今晚餐飯,唔止抵,質素更比預期嘅好,除落足料,做菜都有心機。雖然出菜嘅次序有啲亂,中後段嘅時間都慢咗,但啲侍應阿姐經常唔好意思前,唔好意思後,非常有禮貌,唔會好似有啲酒樓咁,認為做節飯喺咁架啦,出菜亂,上菜慢,喺指定動作。

個人評分
味道:8/10
環境:8/10
服務:8/10
抵食:9/10
平均每人消費:HK$190

餐廳資料:
富園豐海鮮酒家 Wealthy Garden Seafood Restaurant
長沙灣順寧道273號日輝大廈2樓
2831 0013

沒有留言:

發佈留言