紅椒力量 Pepper Power：椒牌美味

雖然黃埔線開通咗好耐，但慣性問題，都喺較少過嚟紅磡、黃埔呢區食嘢。而呢一晚因為有個安息禮拜要出席，而且，又結束得早，所以，同友人打算食埋飯先返歸。自問對呢區認識淺，故此，今晚幫襯「紅椒力量」都喺友人帶路，因其工作關係，食勻港九新界。

雖然店名有紅辣兩個字，但店內環境除咗紅色牆身之外，就唔喺太多相關嘅裝飾，反而遠處位有個大樹樹枝嘅裝飾，一路撐到上天花板喺較突出嘅設計，否則，格局就似喺慣常所見嘅茶記，但卡位闊落算好坐。

睇門面，因為貼咗好多星馬泰菜式嘅圖片及套餐，以為喺賣星馬菜，其實，睇埋佢嘅餐牌，就知帶着茶記精神，乜都有，但就以東南亞為住，中西式為副，散點、套餐都有，普遍嚟講，定價都街坊，飲品又有加配優惠，所以，真喺有唔少街坊光顧。 

雜錦拼盤 $98

餐牌寫到明有蝦餅、雞翼、春卷、豬牛雞沙嗲各一串，有得幾個嚟叫拼盤就最好不過。幾款食物炸又好，燒又好，外觀就金黃靚仔，不過，中間位加多幾片青瓜、蕃茄就好睇啲。蝦餅做得彈牙，亦有蝦鮮味；雞翼同春卷就叫做穩打穩紥，算香口惹味，沙嗲就隨手揀咗串牛，睇樣就唔多分得出雞牛豬，不過，牛肉軟腍有肉香，啲沙嗲醬亦好好味。

泰式鹵豬脾飯 $62

見佢喺廚師推介，就增加興趣一試，而個飯就送埋老火例湯（青紅蘿蔔煲豬骨）。其實個飯都幾抵食，因為豬脾俾得唔少，味道方面都幾入味，個滷水都算香，加上去晒骨，啖啖豬皮（骨膠原？）、啖啖肉，伴有少少酸菜俾客人去消減吓點點油膩。

香茅豬扒撈檬 $50

香茅豬扒一向喺越南菜嘅特色食物，天口熱，食撈檬就更合適，尤其加埋啲甘筍絲、青瓜絲及銀芽，再淋上魚露，鹹鹹鮮鮮，口感清爽，寧舍啱胃口；而豬扒煎得香脆，更充滿香茅嘅香味，肉質鬆化，又喺一道有水準嘅越式粉麵。

馬拉盞炒通菜 $62

搭多一道淨菜，而蔬菜類都有好幾款選擇，做法亦有得揀，如馬拉盞、泰式、清炒、蒜蓓、鹹魚。啲通菜好嫩口吓，炒得仲喺爽爽哋，加上超惹味嘅馬拉盞，簡單而美味。

菠蘿沙冰 +$19

近排天氣實在熱爆，所以，就點咗杯沙冰降吓溫，有菠蘿味就啱晒我喇。雖然大大杯，但菠蘿味稍嫌未夠強，而且，冰感比較重，飲落有好多大冰粒，意思即喺成份中，水量佔多數所做成嘅效果。

龍眼冰 +$10

友人就喜歡龍眼冰，其實，呢個都喺我心水。大大杯嘅龍眼冰，望落去裡面唔算好多龍眼肉，友人就話OK啦，至少可以消吓暑。

飲品一環就普通啦，但幾款食物都真喺做得唔錯，份量又十足，全日仲免加一（所以，我視佢為茶記大於一家東南亞菜館），食咁多嘢都喺三百頭，可謂平靚正啦！

個人評分
味道：8/10
環境：7/10
服務：7/10
抵食：9/10
平均每人消費：HK$75

餐廳資料：
紅椒力量 Pepper Power
紅磡必嘉街紅磡灣中心12號地舖
2321 6379