2019年6月16日星期日

高興+ happinesssssplus:趁高興.趁即興

近年,無乜新茶餐廳,無?唔喺啩,無錯,因為家下興用冰室,仲開到成行成市,其實都喺茶記一間,用得冰室做名嘅,都大玩懷舊。之但喺,玩懷舊又豈止冰室,最近機緣下過到嚟北角,偶遇呢家西餐廳「高興+」,裡面裝潢一樣玩懷舊,但就更具打卡性。
由於餐廳採用落地大玻璃,晌鋪外,已見到內籠地方頗大,樓底特高,非常有空間感。而講到懷舊,佢哋真喺玩得好多元化,兼且有深度,唔喺擺一、兩舊嘢就當喺,甚有70、80年代嘅感覺。好似戲院燈箱、理髮店鏡位、花地階磚、舊式收音機、古老水晶吊燈……等等。
另一邊用餐區,感覺就無咁多舊懷元素,裝修簡約,最觸目就肯定喺嗰幅手繪北角邨牆畫,以簡單線條勾畫出北角邨嘅情景。
翻一轉主餐牌,原來選擇都非常之多,小食、沙律、薄餅、主食、意大利粉、意大利飯、日式咖喱、甜品……一應俱全,而飲品,有花茶、酒精類、咖啡、沙冰、梳打、益力多特飲,以及多款鮮果汁。
bowl紐西蘭羊架 $206
一客有3支羊架,伴有沙律菜及炸薯條,賣相較美式,而沙律菜夠清爽,薯條脆而不膩;至於啲羊架,質素真喺唔差,燒得外層帶微焦,咬落甚具焦脆感,而肉質嘅生熟度燒得啱啱好,口感十分之嫩滑細緻,更喺羶味十足,啱晒我啦。
bowl焦糖拿鐵 $17(正價$34)
點咗主菜可享飲品半價優惠,所以,嘆番杯拿鐵,有數款口味供選擇,焦糖喺較心水嘅一款。拉花做得唔錯呀,線紋細緻,拉咗朶玫瑰出嚟,而口感順滑均勻, 咖啡嘅味道醇厚帶微微焦糖香,確喺有水準。
即興鋸咗餐羊架,服務又好,仲唔收加一,高高興興咁離開,滿足。下次有機會再過嚟,會試多啲嘢,迤吓迤吓咁唔好嘥咗個環境嘛!

個人評分
味道:8/10
環境:8/10
服務:8/10
抵食:8/10
平均每人消費:HK$223

餐廳資料:
高興+ happinesssssplus
北角琴行街21-23號港濤軒地下1-2號舖
3619 4600

沒有留言:

發佈留言