餐廳位處告士打道嗰邊，喺晌一家新嘅精品酒店樓下，地點算喺旺中帶靜嘅位置，由銅鑼灣港鐵站行過嚟都喺5分鐘左右步程。門面用上大量五光十色嘅霓虹光管，尤其入黑，非常搶眼。門口兩旁更設有開放式吧位，方便嚟只喺「歡樂時光」下嘅客人，或喜歡睇街景嘅朋友。走入店內，同樣有用霓虹光管做裝飾，睇見「食鬼」，堅喺有種集體回憶，嗰時打街機唔喺咁普及架。
店內整體裝修好有氣氛，燈光柔和得嚟唔會太昏暗，加上高樓底，空間感十足。全店都以高腳枱櫈為主，少量吧枱位，喺欣賞調酒師表演嘅位置，而其他位置都喺啲二、四人座。
甫坐低一陣，店員就遞上餐牌作出介紹，原來店子開咗無耐，餐牌都喺屬臨時性。先講講飲品餐牌，選擇相當多，紅白餐酒、雪莉酒、啤酒、西班牙水果酒、汽水、果汁、多種烈酒……一應俱全。
食品方面，主打就喺多款冷熱西班牙小食（Tapas），數一數有成14款之多，而且，定價唔算貴，此外，當然唔少得西班牙海鮮飯及特色甜甜啦。
White Sangria $45 HH / $60 NH
講到西班牙飲品，好自助想起西班牙果酒（Sangria），呢度除咗有紅，仲有白，更提供無酒精版本，難得同同學仔聚一聚，就梗喺揀款少飲嘅White Sangria，其實當經晌尖沙咀嘅「Playa de Papagayo」都飲過一次，感覺好唔錯。以白酒取代紅酒，並用上青蘋果，店員更話加咗荔枝汁，所以，非常之易入口，賣相就更晶瑩。先喺陣陣果香，繼而散發出一股酒勁，整體卻喺冰涼清爽，夏天飲感覺特別襯。
Tanqueray $75 HH / $108 NH
Ivan兄就揀咗一杯Gin & Tonic做嘅特飲，賣相甚有東南亞風，原來，店員介紹時話呢款特飲喺用咗一款泰國嚟嘅Gin酒，故調酒師就將其加入菠蘿汁、香茅、檸檬葉作配搭。佢試過之後，大讚極具風味，味道確喺好特別。
見到隻餐碟，就知喺介紹啲食物嘅時候。拎上手就知啲刀叉喺靚嘢嚟，而餐紙巾都設計過，配合店名都喺以幾何圖案做主體。最值一讚喺啲服務，而且，啲店員好專業，上親菜都會稍作介紹，有問必答，有答必詳。
蕃茄脆包、醃白銀魚、蒜蓉蛋黃醬 $48
先上嘅一道白銀魚脆包做得好小巧別緻，色彩配襯好好，店員作介紹時，特別提到脆包喺由西班牙空運過嚟再烘焗，小弟印象中都好似曾經食過一次，此外，醃白銀魚同樣嚟自西班牙，並以醋醃，非意大利嘅油浸。
塊麵包果然好香脆，塗上大量鮮蕃茄蓉，茄味好鮮活；白銀魚肉質緊致，帶點酸醋香，令人好醒胃，而面面嘅蒜蓉蛋黃醬喺自家調製，令味道增加層次，酸香有序。
薄切慢煮八爪魚 $78
薄切八爪魚絕對唔喺咩新奇嘢，以往都曾經食西班牙菜時食過，但當店員介紹呢道菜嘅八爪魚，喺晌捕獲後由當地即時慢煮5個鐘，之後再空運過嚟，就知道個賣點晌邊。
首先，啲八爪魚片得好薄，塊塊都厚薄均一，喺師傅刀功嘅表現，塗上自家做嘅蕃茄蓉、淋上初榨欖油、撒點香草，令味道油潤清新，最驚喜喺啲八爪魚質感，超軟腍，卻不失咬口，仍帶有八爪魚嘅鮮味，好得喎！
棒棒鵝肝 $78
一客有3支，做得好精緻。唔喺店員講番，真喺無諗過細細粒嘅鵝肝丸隱藏咗咁多心思，啲丸搵白酒蒸過，再搓成丸；而底下綠綠啡啡嘅粉粒，原來喺開心果仁、喜瑪拉亞岩鹽及黑胡椒粒，真喺要認真細味。
咬落去，鵝肝嘅質感附合預期，好軟腍，但鵝肝嘅濃郁味就比預期勁，可以講餘韻長；而沾滿啲果仁碎、岩鹽、黑椒後，味道變得複雜及多層次，喺好有趣嘅小食。
西班牙薯仔蛋餅 $78
講到西班牙小食嘅經典，相信西班牙蛋餅都當之無愧，近乎家家西班牙菜館都有呢一道菜式。而眼前呢道蛋餅，份量之大，當女生嘅主菜都不為過架，因為，確喺做得好厚身，唔喺講笑，目測都肯定佢有成吋厚囉！
蛋餅煎得金黃，份外吸引，將其切開一睇，仲有少少流漿嘅情況，所以，啲蛋入口都幾軟熟嫩滑；內裡填滿好多薯仔粒，甚有薯香，而餅面塗上蒜蓉蛋黃醬，撒上紅椒粉、新鮮香草，令食味唔單一，而唯一挑剔，就喺因為多薯仔粒，切出嚟較易散開啫。
巴塞隆拿式烤紅蝦 $88
另一道熱小食，喺以西班牙式煎烤嚟自阿根廷嘅紅蝦，最鍾意喺佢哋以小煎盆作為餐碟，再將煎好嘅紅蝦排列好先奉客，做菜、擺盤都做得一絲不苟，製作認真。
睇相你就見，啲紅蝦非常大隻，雖然蝦頭唔算膏多，但蝦肉肉質挺身，味道卻喺頗鮮味，夾雜少少香草，直接變得更惹味。同學仔仲話，一客5隻只賣$88，感覺十分划算。
咦，做乜又影隻碟？就喺想順帶一提，店員待我哋食完西班牙小食部份，當喺前菜嘅完結，準備上下一道主食，就自動波幫我哋換過一套餐具，喺貼心嘅服務。
西班牙海鮮鍋飯 $138
除咗西班牙蛋餅，西班牙海鮮飯應該喺另一西班牙菜嘅經典，由於傳統嘅都會以一個巨型大平底煎鑊去煮，故好多人都戲謔呢道菜叫「大鑊飯」，不過，依度嘅海鮮飯就絕對唔可以叫「大鑊飯」，因為餐牌標明喺一人份，所以，以「小鑊」呈獻。
話就話喺一人份，但嚟到就知喺兩個人都夠食有突，飯面鋪滿海鮮，有大蝦、青口、大蜆，用料不賴，每款海鮮都鮮甜好食；紅紅嘅飯底充滿香味，入口濕潤，當然，唧埋少少檸汁食起嚟就更清爽，唯一美中不足嘅喺，我哋兩個都覺得有點濕得滯，部份飯粒有點爛嘅感覺。
西班牙水果茶啫喱配夏日雜莓 $58
一講到西班牙甜品，十居其九都想到喺西班牙油條，小弟呢幾年都算叫做試唔少，故此，今晚就試咗餐牌中另一款甜點「西班牙水果茶啫喱」。
水果茶味嘅啫喱好清香，味道感覺自然，而且，質感啱啱好，唔會太削，又唔會太實，內裡混有好多雜莓果肉，清甜酸爽，確喺幾襯夏天享用。同埋，之前食咗咁多濃味菜式，呢杯啫喱正好可以清新一下味蕾！
除咗環境舒服、輕鬆之外，西班牙小食款式多而特別，兼且做得甚具水準；而最欣賞喺啲服務，每個細節位都認真對待，一道菜接一道菜，讓客人食得輕鬆自在。故此，呢度的確喺好值得同好友嚟把酒談天嘅好地方。同學仔喺識食之人，講明遲啲佢老婆生日，就帶佢嚟翻兜！
個人評分
味道：9/10
環境：8/10
服務：9/10
抵食：8/10
平均每人消費：HK$410
味道：9/10
環境：8/10
服務：9/10
抵食：8/10
平均每人消費：HK$410
餐廳資料：
Tapa Room
銅鑼灣告士打道218號君臨海域酒店地下A舖
2881 8877
Tapa Room
銅鑼灣告士打道218號君臨海域酒店地下A舖
2881 8877
沒有留言:
發佈留言