2019年5月7日星期二

Kim's Bowl:韓食好路素

依家嘅素食店越開越多,就算唔喺打正旗號賣素食,一樣會加入一啲素食菜式。最近,食友試過中環嘅「Kim's Bowl」,覺得唔錯就推介俾我,而餐廳又近我公司,撞啱今晚無飯開,行過嚟食埋晚飯先返歸。
餐廳位於「花園道3號」LG層嘅零售區,晌度有便利店、咖啡店及餐廳。外面有好多露天位,但是夜落雨,乖乖留晌室內。
雖然中庭有好多梳化位,不過,全部都喺茶几枱,嘆咖啡就可以,食正餐就唔太就手;幸而,餐廳本身都有少少高腳枱櫈,但個人就覺得啲櫈矮咗啲。
晌啲日本餐廳,鋪面好鍾意擺放啲食物「樣辦」吸引客人,亦當喺俾人有個參考,而「Kim's Bowl」都有,不過,喺簡化咗嘅圖像版。
然而,想確切想知道有咩食,就要抬頭睇睇上面嘅電子餐牌。
不過,並非一次過打晒出嚟,而喺不斷轉換圖片,幸而,佢哋有啲單張,索性掃描好再貼出嚟,咁一目了然知道有咩選擇。
單張裡面,主要介紹恆常提供嘅各款菜式及套餐,此外,佢哋仲有啲「每周精選」供應。
而飲品方面,單張亦講得唔多,其實,實際有好多選擇。
除餐飲,兼營少少零售,就喺梨花園韓國傳統茶系列,如柚子茶、紅棗茶、生薑茶、蘆薈茶,以及泡菜。
bowl韓式素食拌飯 $82 
友人簡簡單單揀咗個拌飯,不過,特色在於喺素食版,但同樣有好多料,包括:素牛肉、紅蘿蔔絲、白蘿蔔絲、蛋絲、紫菜、翠玉瓜絲及毛豆粒,色彩繽紛,而白飯分隔晌底層,將所有材料拌勻就食得,啲素牛肉比預期好食,像度又高,喜歡辣辣哋嘅朋友可以問店員拎啲甜辣醬,更有風味。事後問問店員,佢話啲素牛肉喺從韓國引進。 
bowl泡菜豬肉韓式便當 $80
小弟就揀咗個豐富啲嘅便當,除咗有泡菜豬肉外,亦拌有多款韓式前菜,計有鵪鶉蛋、辣蘿蔔絲、魚仔乾、漬蓮藕、漬茄子及炒粉絲,款款前菜都各有特色,味道不俗;至於啲泡菜豬肉,有一定辣度,刺激惹味,撈飯一流,啲飯亦好軟熟。
上文都提及過佢哋有零售「梨花園韓國傳統茶系列」,原來,近來更推廣一款梨花園濟州蜜糖青橘子茶,原樽560g賣$45,唔貴喎。不過,我哋就揀咗由呢款青橘子茶做嘅特飲,散點賣$38,凡惠顧任何食品,就可以用優惠價$18買到。
bowl冷泡綠茶、雜莓樂園 +$18
前者以綠茶加入蜜糖青橘子茶及一啲香橙片,友人話綠茶味好幽香,慢慢滲出青橘子嘅清香,感覺幾特別;後者就以梳打溝埋青橘子茶,再混入少少雜莓,入口冰涼清爽,青橘子晌梳打嘅襯托下,甘甜味更突出。
「Kim's Bowl」嘅定價唔平,相信跟所處嘅位置有關,始終樓上就喺啲甲級寫字樓,鋪租都相對高。然而,喜歡韓食,又想貪方便,兼有啲質素,「金飯碗」喺個唔錯嘅選擇。

個人評分
味道:8/10
環境:7/10
服務:8/10
抵食:7/10
平均每人消費:HK$100

餐廳資料:
Kim's Bowl
中環花園道3號LG樓4A-4B號舖
2155 9820

沒有留言:

發佈留言