Coffeelin：品味閒情

西營盤呢區，甚至西環一帶，雖然唔多到訪，但有時從飲食雜誌，或食友口中，都收到唔少有關呢區個性特色小店嘅消息。最近，到訪嘅「Coffeelin」就喺其中一家，店家嘅地址雖然標明晌高街，其實鋪位面向住大斜路嘅西邊街，對面仲有座小教堂，街上遊人唔多，有種小區悠閒嘅感覺。

餐廳以綠色為主調，唔止鋪面以青綠為主，更襯以很多攀藤植物，驟眼所見，就連外賣嘅紙杯亦用上相近色系。而踏進餐廳內，則以綠白相襯，掛上少少植物作點綴，配以簡約嘅裝修，令整體環境予人感到輕鬆、舒服。再者，除近門口有一排吧位，走進裡面，座位亦唔太多，令空間感足，加上餐廳嘅樓底唔矮，唔會有侷促嘅感覺。

此外，一邊牆畫上巨型彩繪，喺推開窗戶望出去似喺水都威尼斯嘅景色，畫功相當好，不過，如果再畫低啲，跟客人坐低時嘅視平線看齊嘅話，就更有種好似置身現場嘅視覺效果。

如大多數咖啡店，都會兼營咖啡豆零售，晌度你都會見到有啲意大利品牌Griso嘅咖啡豆賣；仲有，下面仲擺放咗一啲咖啡嘅相關書藉或雜誌供客人閱讀，小弟就拎咗本「咖啡職人」嚟八吓，兼扮扮偽文青。

店中所沖泡嘅咖啡就採用上述提及嘅兩種咖啡豆，從餐牌中，就詳細列出呢兩種豆嘅特性，以及來源地。

而講到咖啡，選擇真喺唔少，多款意式咖啡、手調咖啡，更有一啲非咖啡類嘅果茶、朱古力……等等。最近，更新出一款桂花冰啡，坊間應該未見過，不過，小弟喺鮮奶咖啡嘅死粉，最後都喺揀番鮮奶咖啡。

食物方面，暫時就只有兩款意式三文治作為鹹點供應，分別喺Porchetta Panini及Truffle Mushroom Panini。小弟就幾鍾意佢個餐牌，以彩繪代替相片，額外有種文化氣息。跟店員傾開偈，店主有打算引入烘焙及甜點產品，咁到時配咖啡就更正。

順帶一提，佢哋有提供組合優惠，就喺一款意式三文治配一款飲品（指定特色咖啡除外），只賣$80，喺十分吸引嘅優惠。

Latte（正價$42）

睇見個拉花，線紋細緻，又拉得對稱，已對此有一定嘅期望。先細飲一啖，完全晌無攪過情況下，已飲得出嗰份均勻感，喺撞奶泡手勢夠好，而咖啡醇厚帶微微果仁香，整體算得上喺一杯高質素嘅鮮奶咖啡。

Truffle Mushroom Panini（正價$62）

從餐牌所見，都已知成份有黑松露醬、蘑菇及莫沙里拉芝士，但入口比預期好食好多喎。一來烘得個包面極之脆口，二來松露嘅香氣十足，再者，用上莫沙里拉芝士除更具意大利風之外，唔過份濃嘅芝士香，正正跟黑松露陣味好和諧，而啲蘑菇食得出喺新鮮貨炒製，非罐頭嘢。

除咖啡產品，店家嘅另一主打就喺意式雪糕，都喺自家製，質素有保證外，味道睇落亦比較特別，當刻所見，口味有桂花、鹽味焦糖、朱古力及意大利杏仁餅乾條，據介紹時，話仲會不時轉款，或久唔久創啲新口味。

店家提供試食，不妨試一試，啱口味嘅話真喺值得幫襯。4款口味都幾有個性，尤其隻桂花及鹽味焦糖，前者桂花味非常突出而清香，後者焦糖味則濃郁而豐厚，而每款嘅質感好柔滑，極富奶香，可見用料不賴。

當西環呢一邊由於有港島西延線而不斷變化，但走上少少，仍有不少開設晌社區內嘅小店，令每一個社區都有其個性，不致於變成倒模式模樣。趁假日晌度遊走、探索、尋味，寫意人生，可以就喺咁簡單！

個人評分
味道：8/10
環境：8/10
服務：8/10
抵食：8/10
平均每人消費：HK$80

餐廳資料：
Coffeelin
西環西營盤高街99號地下3號舖
6099 3635