飯意冰室 Rice Love Cafe：飯泛之輩

我哋兩公婆逢星期六都會選擇出街食早餐，所以，造就唔少篇「我的星期六美孚早餐」，寫吓寫吓更成為一個系列。不過，今次嘅外出早餐既唔喺星期六食，又唔喺晌番美孚區，而喺跳過嚟荔枝角區，事緣趁假期過嚟逛吓，順便食埋個早餐，而餐廳亦只喺隨意搵，就咁就入咗「飯意冰室」。其實，門口連招牌都無，應該喺攞廠廈食堂牌。

忽然間，乜乜茶餐廳無晒，新開嘅絕大部份都改為乜乜冰室，其實，都喺茶記一間。但難得「飯意」嘅環境無一般茶記咁逼夾，我哋覺得可以排多行枱櫈，但都無咁做，唔知喺咪食堂牌嘅消防要求唔同啲，所以，感覺都舒服啲。

餐枱插住多款早餐餐牌，而刀叉、紙巾都已經放晒晌枱，如需額外調味料，就要向店員索取。

早餐有咩揀，一個餐牌就睇晒，話多唔多，話少唔少，總之，就嚟唔開晌茶記精常見嘅款式。然而，呢度都有少少賣點，如鮮濃蕃茄通、鮮油菠蘿包。

全新蕃茄早餐 $34

老婆食嘢講健康，就梗喺揀呢個，因為有招牌蕃茄濃湯米製通粉，不過，初頭無太留意，以為都喺一貫嘅通粉，食落再睇番個餐牌，原來喺米通粉，口感似食米線咁，佢就覺得麻麻哋。之不過，個湯底夠晒濃郁，蕃茄味鮮活，配上炒滑蛋，簡單而好食。而另外件奶油豬，唔知佢喺咪有自知之明，無寫「脆」豬，咬落得個韌字，一啲都唔脆。

火腿炒蛋鮮油菠蘿包 $30
好耐無食過菠蘿油，見佢配個火腿炒蛋，真心以為喺菠蘿油配一份菠蘿油配一份火腿炒蛋，喺自己會錯意，原來喺按字面解一個包夾晒火腿、炒蛋、牛油做成嘅菠蘿油「漢堡」，賣相其實幾標青靚仔，不過味道未及預期，個人而言，感覺咁食法唔喺好夾，亦「漏」咗少少，加上個包身喺凍嘅，菠蘿油嘅風味打咗折扣。

熱奶茶、熱檸水

又喺熱奶茶、又喺熱檸水，嚟茶就飲熱奶茶永遠喺錯不了嘅選擇，就算唔喺絲咁滑，一般而言，茶底都唔點失禮。「飯意」嘅奶茶都OK架，茶底都幾芳香。

服務方面都唔差，見佢哋出餐都喺推餐車咁送，我覺得幾好，一來可以大量咁出餐，有效率，二來，比手捧4、5碟嘢來得安全啦，又唔使啲員工做得咁辛苦。其實兩份早餐都唔叫差，但亦只屬泛泛之輩嘅水準而已，加上揀得無咁啱食，只可以俾個OK佢。

個人評分
味道：6/10
環境：7/10
服務：7/10
抵食：7/10
平均每人消費：HK$32

餐廳資料：
飯意冰室 Rice Love Cafe
荔枝角長沙灣道883號億利工業中心地下3和5號舖
2267 8080