2019年4月3日星期三

柏景餐廳 Café on the PARK:三重滋味柏住上

就算無正式統計,相信要票選香港人去得最多嘅地區,離不開日韓台,除咗因為地理位置跟香港唔遠之外,又有唔少吸引嘅景點,而講到飲食,就更喺特色多多。最近,就嚟到「柏景餐廳」嘆自助餐,因為餐廳嘅主題正正做緊「我♥日韓台」三重滋味自助餐,一晚就試到加入三地特色元素嘅美食。
由於食物枱分隔晌唔同多區域,有效分散人流,而餐廳簡約時尚,地方寬敞,座位又編排得闊落,絕對無逼逼夾夾之感,加上燈光柔和,舒服自在。
對上一次嚟,因為做正「懷舊」主題,場地佈置上有比較多打卡位;不過,今次「日韓台」主題,亦同樣有唔少相應主題嘅裝飾,如日本嘅清酒桶,韓國嘅大鼓。
bowl飲品區
成個酒吧格局嘅就喺飲品區,罐裝汽水、啤酒、橙汁、健怡排毒嘅維他命水(Detox Water)呢啲當然成晚無限量供應啦,但較特別嘅喺,今次嚟到又見到上次有提供嘅鮮打紅菜頭雪梨汁,飲到尾有唔少果渣沉底,夠晒高纖,「睇」得出真材實料,故此,小弟都飲多幾杯。
但講到關連番主題,就提供咗啲台式芝士奶蓋烏龍茶,少量少量製作,最好就喺細細杯,啱飲就再添。其實我都幾鍾意飲台式茶,杯芝士奶蓋做得唔錯喎,烏龍茶茶底幾香,奶蓋打等綿密又帶點點芝士鹹香,一於扮啤酒,啤一啤佢。
bowl沙律區
雖然佢哋嘅沙律菜及配料陣容唔會令人嘩聲嘅感覺,但供應4款沙律菜、十多款配料,已足夠砌出一份豐富嘅沙律。之不過,小弟就覺得亮點喺啲醬汁,如藍芝士汁、檸檬青檸醬、香橙牛油果汁……都非常有特色。
bowl冷盤區
除上述嘅自助沙律吧,屬懶人包嘅仲有啲預拌好嘅沙律,如薯仔忌廉沙律、華都夫沙律……等等。其中以青蘋果為主嘅華都夫喺老牌西餐嘅沙律,亦喺小弟嘅心水,食落寧舍清爽。其餘嘅冷盤小食都有唔少選擇,大多都做得的的骰骰,如吞拿魚配紅洋蔥莎莎、鮮淮山蟹肉沙律金杯、日式芝麻醬伴秋葵、涼拌韓式茄子、芝麻醬蝦肉豆腐、莎樂美腸、雜凍肉腸、燒牛肉、煙三文魚、刁草醃三文魚……等等,絕對搵到啱口味嘅。
事不宜遲,講咗咗多喺起動嘅時候,慣性,先嚟一大碟DIY鮮果沙律,順帶一帶,啲鮮果喺晌甜品區嗰邊拎嘅,雖然話飯後果,但小弟就較喜歡拼埋啲沙律當頭盤食,健康又開到胃。份沙律唔想太雜,主打幾款沙律菜拼少少配料,重點喺淋上香橙牛油果汁及藍芝士汁,味道層次立時昇華。
既然有咁多冷盤,無理由唔追加一碟冷盤拼盤架,執啲想試嘅,已經砌出一大份。重點想講嘅喺吞拿魚配紅洋蔥莎莎及鮮淮山蟹肉沙律金杯,前者晌紅洋蔥襯托下,更突出魚鮮味;後者嘅鮮淮山喺近年大熱嘅養生食材,兼啖啖蟹肉。
bowl人蔘雞湯
「柏景」另一賣點,就喺佢哋嘅燉湯,非常搶手,如果星期五六日嚟,隨時無得似,所以一聽到突如奇來嘅拍掌聲就要醒目喇。個湯好香濃,蔘味亦好突出,真材實料嘅湯水。
bowl中西餐湯、咖喱
唔喺人人都頂得住啲蔘味,晌另一邊就有中式嘅蓮藕花生豬骨湯及西式嘅南瓜忌廉湯俾大家多個選擇。此外,晌呢區仲有幾款美食,如煙三文魚芝士撻、印式炸蔬菜、印式薄脆及咖喱。
bowl海鮮吧
飲咗碗蔘湯暖暖胃,再食生冷嘢都唔驚,亦喺時候介紹有咩凍海鮮款式,包括長蟹腳、龍蝦鉗、小龍蝦、凍甜蝦、翡翠螺、青口,跟上次嚟嘅都無分別,屬但4風險嘅款式,一一以冰鎮住,配以泰式海鮮汁、咯嗲汁、檸檬角,不時經過都見補給快手。
樣樣海鮮都要啲,湊成一碟自家迷你海鮮拼盤,雖然無生蠔,但啲凍海鮮都勝在夠鮮味,尤其長蟹腳及龍蝦鉗,啖啖肉,啖啖鮮味,正呀喂!
bowl刺身、壽司、和食
雖然自助餐嘅刺身或壽司我都唔喺咁大興趣,不過,刺身或壽司仍然喺唔少港人嘅喜好。晌度都有多款刺身、壽司、卷物,並有迷你丼飯、冷麵、冷烏冬及少量漬物、小食供應。由於小弟無試過,就不便評論,但睇刺身嘅色澤、食身嘅賣相,感覺都唔差得去邊。
bowl即煮粉麵、中式蒸點
位處刺身旁就喺即煮麵檔,幾款麵條,多款配料,作自由配搭;而呢期因為主題關係,更特別推出台式嘅紅燒牛肉麵,因為同枱無人肯同我「些牙」,怕太飽而唔敢叫。另一邊廂,就有啲中式蒸點,包括素粉果、豬仔樣嘅叉燒包、金銀蒜蒸海鮮……等等。
bowl熱盤區
跟住要介紹最大陣容嘅熱盤喇,L長形雲石枱,擺放十多款中西美食及多款主題菜式,憑相片及記憶就試試一口氣介紹有乜:炒韓式年糕、賽螃蟹、醬爆三椒炒象拔蚌、台式麻辣烤沙巴龍躉、避風塘廣島蠔、韓式炸雞、風味炒高麗菜、清酒煮青口、印式咖喱魚、韓式泡菜白汁焗龍蝦、日本清酒芝士扒扇貝、法式慢煮紅酒和牛面頰、扒香草羊架……等等,當中部份菜式更會不時轉款。
bowl天婦羅專區
晌熱盤區中,另有設立天婦羅檔口,睇住師傅密密炸出新鮮嘅天婦羅,但由於有佢「睇場」,又唔會炸得過量,適時又補充,天婦羅喺新鮮炸起先好食。
bowl燒烤專區
除天婦羅現場即炸之外,亦設有燒烤檔,有多款即製燒烤食物,如秋刀魚、牛仔骨、茄子、菠蘿、台式香腸、雞翼……等等。師傅無間斷咁燒,引發香氣四溢,吸引唔少食客。
bowl慢烤原條牛肉眼
唔使多講,原條烤肉喺自助餐嘅必備,是晚所見就喺原條肉眼,燒得外觀焦香,加上燈光,又喺一款極盡誘人嘅美食。此外,仲有多款烤蔬菜作配搭。另外,除一般嘅燒汁、黑椒汁、洋蔥汁、芥末外,更備有幾種特色醬汁,如泰式甜辣醬、泰式魚露及菠蘿莎莎,喺俾大家食燒烤嘢時更添美味。
第一份熱盤就先嚟一大件燒肉眼,再拼兩款主題菜式:避風塘廣島蠔、日本清酒芝士扒扇貝,搭多少少烤蔬菜及燒菠蘿,全部都喺心水美食。肉眼燒得恰到好處,富肉香,廣島蠔及扒扇貝都夠晒厚肉好食,前者更帶微微清酒香,加咗絲絲鰹魚絲更討人歡心,後者惹味無得輸;燒菠蘿睇見啲炭火坑紋就已知喺好嘢,暖暖嘅菠蘿味道非常清甜。
再下一城,第二份熱盤拎咗主題菜嘅韓式泡菜白汁焗龍蝦,絕對喺呢碟「主菜」嘅亮點,再加埋法式慢煮紅酒和牛面頰及扒香草羊架,組成自家DIY嘅「Surf & Turf 」。波士頓龍蝦蝦肉爽口,沾滿泡菜白汁,估唔到味道幾特別喎;至於啲牛面頰超軟腍,有紅酒香,就連啲薯蓉都特別好食,羊架呢?肉質仍然帶點紅潤,卻喺半點血水都無,口感細緻柔嫩,好掂。
bowl自助啡茶
除咗上文介紹到嘅多款果汁、汽水、特飲外,晌餐廳最尾嘅食物區(甜品區之後),仲有自助即磨咖啡機、冷熱紅茶、檸檬片提供。去到尾聲,喺掃甜點嘅時間,有番杯芳香嘅即磨咖啡嚟襯吓,絕對喺美好嘅結局嚟。
bowl甜品區
相對好多自助餐而言,「柏景」嘅甜品絕對屬多選擇、多元化及質素中上之列。先介紹左邊嘅一區,有自助班戟機、薑汁糕、花生糊、豆腐花、酥皮蛋撻、焗葡式蛋撻及大人唔多食,但小朋友最鍾意嘅糖果同朱古力噴泉。
此外,雖然唔喺甜嘢,晌呢區仲放埋幾款新鮮生果及特色芝士盤:Gruyère、Brie de Meaux、Emmental,並配有克力架及乾果,鍾意食芝士嘅朋友就啱晒嘞,其實小弟都鍾意,只喺太多美食,試得唔晒咁多啫。
再介紹堆右邊嘅甜品櫃,最欣賞喺成個餅櫃擺出嚟,仲有師傅長駐晌度,逐少逐少甜點補充,唔會放到啲甜點吹乾晒。而呢區嘅甜點都以的骰為主,兼且唔少喺主題式甜點,味道極之少見,細數之下,足足有15款之多:日式豆腐芝士蛋糕、開心果蛋糕、香脆黃梅杏仁撻、伯爵茶朱古力蛋糕、鳳梨牛油蛋糕、日式芝士蛋糕、人蔘焦糖燉蛋、紅豆羊羹、人參奶凍、珍珠奶茶奶凍、巨峰提子啫喱、芒果布甸、士多啤梨意大利芝士蛋糕、白酒果凍、桂花糕……等等。後期,更加插少少餅店嗰邊嘅件裝蛋糕,更具吸引力,所以,款式又豈止15款呢!
睇過小弟嘅自助餐食評都見,小弟都算喺甜魔之一,睇見有咁多款甜點,真喺急不及待。一口氣,按心水、喜好,掃咗10件返嚟慢慢嘆。好食,真心喺好食,真喺想逐件評一評,但今篇食文都已經頗長氣,故簡單少少,特別推介幾款個人認為咪走雞嘅款式:開心果蛋糕、鳳梨牛油蛋糕、人蔘焦糖燉蛋、人參奶凍、珍珠奶茶奶凍,食落喺有意外驚喜。
bowlMövenpick雪糕櫃
今次唔見有上次架Mövenpick大雪糕車喇,不過,依然有成6款Mövenpick雪糕供應,仲有即製格仔窩夫及多款配料、糖漿俾你玩。作為甜點嘅死粉,又點會錯過Mövenpick雪糕吖。
食自助餐,除咗食物多選擇之外,就喺好玩。揀咗青檸檸檬雪葩、焦糖、意大利奶凍及楓糖合桃4款口味襯窩夫,再淋上朱古力及楓糖糖漿,灑下大量奧利奧曲奇碎、合桃粒及杏仁片,不單次味道多變,口感亦富層次,小弟呢一份雪糕窩夫拎出嚟賣喺咪值六、七十蚊呢?
整體嚟講,「柏景」今次嘅自助晚餐,唔單止主題菜式做得有水準,食材嘅配搭亦見心思。依家外間想食得有質素啲嘅自助餐,動輒六、七百蚊喺等閒事,而呢度嘅自助晚餐查實都唔喺平,成人定價$618-$688,但難得有網上65折優惠券,不過,最抵玩嘅,直接晌官網訂,有成5折優惠咁筍(另原價加一,好似我哋咁閒日嚟,成人每位只喺$382.8),但前提喺需要俾晒全數先作實。

個人評分
味道:9/10
環境:8/10
服務:8/10
抵食:9/10
平均每人消費:HK$383(官網預訂5折優惠)

餐廳資料:
柏景餐廳 Café on the PARK
尖沙咀廣東道33號中港城皇家太平洋酒店園景翼2樓
2738 2322

沒有留言:

發佈留言