蘭特餅店 Yolanda Bakery：好友狂嚐曲（83）

早前同友人只喺簡單茶聚，但估唔到友人咁有心，乘過年時日，送小弟一包曲奇，當喺「新年賀禮」，實在太客氣喇。其實，能抽時間賞面聚一聚，已經好有心喇！而曲奇嚟自「 蘭特餅店」，喺好陌生嘅名字，絕對喺第一次試嘅品牌。

鮮紅色嘅包裝袋，袋面只印有店名及其商標，就算袋背、底下，都再無其他相關資料，實在低調 ，由於包裝袋都無提供曲奇口味嘅資料，下文都喺靠個人試味試出嚟。打開包裝，將啲曲奇倒晒出嚟大晒冷，一共8款口味，每款兩片，即共有16片全獨立包裝。

咖啡曲奇

每款唧花曲奇都做得頗為工整，而咖啡味亦比預期芳香突出，實在唔錯。

朱古力曲奇

除咗味道本身OK之外，烘焗出嚟嘅口感亦非常鬆化，但又唔會太流於好似「小熊曲奇」嗰種好粉嘅感覺。

？？曲奇

呢塊顏色就紫紫哋，連食兩塊，真抱歉，都食唔出喺咩嘢味，紫薯？香芋？唔會紫糯米啩，知道嘅人不妨話番聲我知。

牛油曲奇

傳統而基本嘅牛油曲奇味道，算幾香，但牛油味唔會過於太重，哈哈，可以講喺「少油」嘅牛油曲奇。

薑味曲奇

呢片初時以為喺類似杏仁嗰啲口味，一入口就知喺薑味，好強勁嘅薑味，而且，仲有啲好似薑糖嘅煙韌粒粒，掂喎。

伯爵茶曲奇

比較大路及穩陣嘅口味，伯爵茶味幾清幽，而依一款曲奇做得好鬆脆，唔會硬崩崩。

杏仁粒曲奇

曲奇底本身有少少似黑糖味，但唔明顯，所以，小弟都唔敢講實，但混有好多香脆嘅杏仁粒，就令到件曲奇好好食。

抹茶曲奇

呢件唧花曲奇未食都估佢喺抹茶味，抹茶味十分之香濃，感受到用料都唔差。

晌度多謝好友嘅心意，讓小弟一次過試到8款各有特色嘅曲奇，為是日嘅偷懶下午茶添上幾分色彩。

個人評分
味道：8 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
蘭特餅店 Yolanda Bakery
將軍澳貿業路8號新都城中心2期UG樓095號鋪
9509 0155