2019年2月12日星期二

欣圖軒 Yan Toh Heen:摘星有欣

農曆年後,總有幾餐同朋友一齊聚一聚嘅開年飯,其中一餐就印象好難忘,就喺晌香港洲際酒店獲米芝蓮兩星嘅「欣圖軒」,從餐牌內頁嘅介紹,更喺福布斯五星嘅食肆。雖然,小弟唔會全然信晒啲乜星物星,不過,今次到訪過「欣圖軒」食午餐,享受咗一次粵菜藝術,就知其摘星有因,絕非僥倖!餐廳嘅入口位就位處食自助餐嘅「港畔餐廳」側旁,門面其實有點唔顯眼,不過,入到去你就知咩叫做深藏不露。
原來餐廳剛由另一邊位置搬過嚟,屬全新面貌,由門口入到大廳,就會輕易發覺都喺以優雅嘅玉石做主題,中國人對玉石可謂情有獨鍾。先介紹吓接待處對出呢個位置,最初匆匆入去大廳時都無為意,以為只喺一個淺池,之後再細看,天花垂落嚟呢個其實喺印章,「欣圖軒」三個大字正正清晰鮮明倒映晌水池中,非常有心思。
再經過由墨綠色玉石砌成嘅大門框後,影入眼簾就喺一條長長嘅長廊,長廊兩旁喺以人手鑲嵌咗用珍珠貝殼刻畫嘅圖案,一邊抽象咁展示出海岸、山脈……等等意境線條,另一邊則勾畫出富中國色彩嘅松樹與梅花,喺對中國文化嘅一種重視。
此外,沿路、以及大廳,都放置咗唔少藝術品,雖然,小弟對藝術嘢一竅不通,但予人更感高雅脫俗。
卒之嚟到大廳用餐區,感覺豁然開朗,因為,原來餐廳嘅對出景觀就喺「星光大道」,適逢「星光大道」工程完結再開放,加上落地大玻璃,令景觀非常開揚,燦爛嘅陽光映照入嚟,予人心懭神怡、精神倍添嘅感覺;而且,枱與枱之間編排闊落,亳無拘束感。
而整個「大客廳」,可細味嘅裝修何止一、兩點?就好似啲絲綢屏風,唔介紹都唔知,除咗人手製作之外,屏風均用咗6種唔同層次嘅綠色絲線,以構成6層絲網,形成三維嘅層次效果;仲有,當中更以中國其中四種最能代表四季嘅花卉作主題,並以蘇州雙面刺繡、珠仔同青銅金屬定製,所以,前後睇都喺一樣咁精細,令整體更具古雅盎然。
其實除環境寫意外,枱上嘅擺設亦顯出高雅精緻,好似小小一盆粉紅蘭花,襯啲插花技巧,已營造出好寧靜感;而一整套玉石餐具:餐碟托板、餐巾、湯匙、筷子及筷子托,唔單單喺用嚟食嘢咁簡單,更提高觀賞價值。
平時去飲茶,坐落就更喺叫飲咩茶,呢道一樣有鐵觀音、龍井、壽眉、普洱……等等常見嘅茶葉供應,茗茶每位收$26,不過,如果你對中國茶有要求,又或好奇一啲特級嘅茶葉,依度一樣可以滿足到你。單喺講茶,已獨立有一本茗茶嘅餐牌,如大紅柑普洱茶、布朗山百年古樹普洱茶、芝蘭水仙、天山珍稀野菊、炭焙茶皇鐵觀音……等等,細看之後真喺讓小弟長知識,特聘專人搜羅各地得獎珍稀茶葉,更設有茶藝師作品茶指導,為咗將傳統粵菜與中國茗茶可以好好配合,更使人領略中國茶道之博大精深!
bowl鳳凰桂花香 $108 / 位
不過,要一嚐此等特級茗茶,就需要有多點付出。呢一款「鳳凰桂花香」睇餐牌嘅介紹,屬半發酵烏龍茶,來頭唔小架,榮獲2011、2014年香港茶藝博覽會烏龍茶組冠軍,亦喺茶藝師嘅推介之一,功效有消脂去膩、強化血管、降胆固醇。色澤清澈而金黃,性平淡雅而清香。
bowl琥珀合桃
餐前等待點心之際,一口清幽嘅烏龍茶,一口琥珀合桃,一清一濃,平衡不過。啲琥珀合桃喺自家製,入口非常香脆,而且,去足衣,完全無苦澀味,再者,合桃面蓋上薄薄一層糖漿,恰如其分,絕無過甜嘅問題。
bowl醬料6式
一般而言,到酒樓食點心,慣性不外乎辣醬,就喺豆瓣醬,但「欣圖軒」貴為星級酒店嘅中菜,豈會咁平凡。待點心送上前,先嚟6款醬料,左邊一組喺浙醋配薑絲、陳皮梅子醬、自家配方海鮮醬油,右邊一組喺海南黃椒醬、港式香辣醬、濃香豆瓣醬。究竟點配搭,簡單而言,隨心就得嘞,無需太拘束。
bowl極品三式海鮮餃 $168
嚟到「欣圖軒」,點心嘅賣相都會預期喺極盡心思,就好似呢一道以長型蒸籠嘅出品「極品三式海鮮餃」:黑松露帶子餃、金箔燕液龍蝦餃、長腳蟹肶菜苗餃,單喺睇食材用料已知有幾矜貴,再加上別出心裁嘅配搭,每一件都好有個性,而且,手功好細緻,餃皮薄而柔韌唔黏牙、原片黑松露散發陣陣幽香、帶子清甜富鮮味、龍蝦肉鮮爽彈牙、菜苗刴得細膩清新……,將食材嘅鮮味原原本本咁帶出,真喺美食嘅藝術。
bowl至尊香脆三重奏 $168
另一道招牌點心喺香脆為賣點嘅「至尊香脆三重奏」,3道點心分別喺杏片蜜桃海鮮筒、鴨肝香芋白玉佩、香芒牛油果焗蟹盒,貌似平平無奇,其實,貫徹配搭有心思。海鮮筒以米紙卷做成,入口十分香脆,鴨肝夾香芋,出奇地襯喎,而焗蟹盒內填滿咗絲絲蟹肉,混入芒果及牛油果,令味道更豐富。
bowl柚子明蝦角、黑松露和牛咸煎堆、星斑海鮮金魚餃
今次無放啲餐牌資訊出嚟,因為上返佢哋官網就有齊晒。而其實,以上3款點心都喺散點嘅點心嚟,每客各3件,賣$75$88$88,不過,如果有部份點心好想試,人少少又點唔得幾多籠,喺可以事先跟餐廳經理溝通吓作出預訂,做成一份份「自定」三小碟、四小碟嘅點心小拼盤。明蝦角外皮包得摺紋細緻而香脆,加入柚子肉令味道清爽咗,和牛咸煎堆喺小弟最欣賞嘅點心,幽香得嚟有份鹹脆,而金魚餃造型像真,裡面嘅星斑肉堅喺滑溜到不得了!
bowl花膠燉響螺 $280
有時食嘢,如果有留意啲細節位,就會發覺一道菜嘅好與壞,除咗用料,仲有就喺心機。當一打開蓋,湯色絕對喺清澈見底,喺清到半滴油都無,可見隔油嘅工序幾用心,而味道卻喺清甜且滋潤;撈上嚟睇睇有花膠、響螺,都喺大件嘅靚貨,咬落去花膠嘅膠性更有少少啜牙嘅感覺,響螺卻喺爽口帶韌勁,最好就喺沾少少海鮮醬油吊吊味。
bowl脆釀鮮蟹蓋 $238
餐牌中有一系列「劉師傅巧手推介」,劉師傅喺邊個?餐牌中有介紹,佢就喺「欣圖軒」背後嘅靈魂人物,有超過30年粵菜經驗嘅行政總廚劉耀輝師傅。至於「脆釀鮮蟹蓋」喺巧手推介之一,整個蟹蓋炸得金黃,面層做得薄而香脆,卻喺全無油膩感,炸功了得,咬開裡面,啲蟹肉唔喺一絲絲,而喺一梳梳,白汁底又唔會太杰身,恰到好處,叫人食得十分暢快。
bowl蒜片青尖椒爆和牛 $300
依個亦喺另一道「劉師傅巧手推介」菜式之一,查實晌餐牌中標價喺$600,怕一客太多食唔晒,但又想試,可以向餐廳查詢一下可唔可以做半份,眼前呢一客就喺半份嘞,其實話半份,一樣唔少,賣點就喺用上好靚嘅和牛,仲切得比一般大粒啲,所以,入口更具口感,且甚有油香;其餘嘅細節位亦無馬虎,如青尖椒炒到爽脆不辣,啱晒我,更伴以不少雞脾菇,就連啲雞脾菇為求美觀都切成精條狀且大小均一架。
bowl櫻花蝦八寶焗飯 $148 / 位
講到啲飯麵,要留意一下,就喺部份菜式喺以每位計,部份喺碟頭計。「櫻花蝦八寶焗飯」以小瓦煲上枱,既古雅,又能更有效保溫。八寶焗飯喺以烤鴨肉、芋頭、瑤柱炒成,本身已經好夠味,再加埋啲櫻花蝦,就當然更有畫龍點晴之效啦,最正喺飯粒分明,入口有份清爽感。
bowl香芋奶凍伴糖心紫薯 $100
最後,嚟一道甜點「些牙」吓,但最估唔到,原來「欣圖軒」晌甜品方面都下咗好多苦功,唔喺單單兩、三中式糖水咁簡單應酬吓,而喺有多款中西式甜點,部份更用上特別嘅食材。我哋呢個奶凍,香芋味非常突出,奶凍嘅質感柔滑而挺身,啲糖心紫薯則煙韌有咬口,好有薯香。
餐後,餐廳更會送上一份小禮品以示謝意,希望客人用餐愉快,冀再次光臨。而小禮品裡面喺茉莉花茶茶葉,可謂物輕情意重,此外,因時值農曆新年,更有一封利是,仲以為會唔會喺啲餐廳優惠券,原來喺一張紅卡及一個朱古力金幣,前者以英文介紹乜嘢喺豬年?利是又喺乜?後者則帶點祝賀的意思,實在好有心思。
「欣圖軒」嘅用餐環境予人舒服寫意喺無庸置疑,而服務更絕對喺酒店應有嘅級數,亦會為客人嘅需要而盡量作出安排。據介紹,如果晚上嚟用餐,更有點像品嚐法國菜般高級餐飲(Fine Dining)嘅細膩。食物方面,除用料精、廚藝紮實,更有好多創新嘅意念,當然,晌度食一餐飯絕不便宜,但加上環境、服務,仍喺物有所值,遇上特別嘅日子,確喺一個很好嘅選擇。

個人評分
味道:9/10
環境:9/10
服務:9/10
抵食:8/10
平均每人消費:HK$1,100

餐廳資料:
欣圖軒 Yan Toh Heen
尖沙咀梳士巴利道18號香港洲際酒店地下
2313 2323

沒有留言:

發佈留言