山區裡的走走趯趯: 匡智小館 hc : Bistro：智．同道合

2019年2月16日星期六

匡智小館 hc : Bistro：智．同道合

中環「大館」開檔初期，要網上預約先參觀得，梗喺唔同人逼啦。事隔半年多，依家就唔使預約都可以參觀喇，所以，趁個悠閒周末，兩公婆拍拖遊「大館」，但估唔到場面仍然好墟撼。難得嚟到，當然順便食埋晏啦，事前已上網搜索過有咩好食，最值得幫襯都喺「匡智小館」（hc : Bisrro），而其他唔喺話質素唔得而唔值得幫襯，只喺商業味重，但「匡智小館」屬於社企，睇啲食評又唔錯，更加值得去撐吓。

由於我哋嚟到都成兩點幾，所以，食晏嘅客人漸少，隨意都搵到位，只喺近外圍熱門啲嘅「茶座」位就座無虛席。

大家都知「大館」喺活化嘅古蹟，而「匡智小館」所處嘅建築本身喺作監倉之用，故內裡嘅一石一磚都滲出歷史嘅「味道」。

小弟因工作關係，對「匡智會」有少許認識，但對大部分人嚟講，只知呢度喺間社企餐廳，簡單就以佢哋嘅口號嚟描述，就喺「匡扶智障」。

而為咗讓公眾對「匡知會」及「匡智小館」有更多認識，枱上就正正對此作出簡單介紹，等待食物送嚟時，就不妨花點時間認識佢哋。

雖然快到2:30pm可以揀佢哋啲下午茶餐，但價錢跟午餐又唔喺差好多，選擇亦較少，故此就趁仲喺午餐時段食番午餐。一共有5款選擇，輕怡可揀沙律，重口味有咖喱雞，食肉嘅可以揀豬扒或牛肉漢堡，定價$78-$133，包餐湯及基本餐飲，另收加一服務費。

是日餐湯

白色一片以為喺一般嘅忌廉湯，飲落有微微菜味，其實小弟飲完整碗都唔喺好飲得出咩味，但質感好滑溜，唔會有粉粒，帶點薑味，最後都喺要問一問店長，原來喺椰菜花忌廉薑湯。

意大利香草包

配餐湯嘅唔喺求其一個餐包，而喺意大利香草包「Focaccia」，喺小弟心水包款之一，包身鬆軟帶微微香草香。

馬蘇里拉芝士及車打芝士焗通心粉配慢煮牛面肉 $118

其中一款主菜睇中呢個焗通心粉，皆為配上慢煮牛面肉。唔講得笑，原碟焗，所以，侍應千叮萬囑咪掂面碟。咪睇佢好似普普通通，味道超好食，老婆仲勁讚。啲通粉做到極具咬口，加入大量馬蘇里拉芝士，拉出絲絲「芝」味，卻又唔會太重，而面頭再灑上車打芝士，即喺橙橙哋嗰啲，增加芝士嘅香氣；而啲牛面肉口感非常腍滑鬆軟，又富肉香，配合啲「芝通」，真喺好夾。