麥金．麥金馬拉特式茶啡室 Kopitiam Makan Makan：絕不麥生

小弟前後去過兩次大馬，感覺都好唔錯，尤其檳城，有種50、60年代嘅老香港感覺，尤其嗰邊啲茶室，而對馬拉菜，亦絕不陌生，因為近年都算食得唔少。是夜，一支公走過嚟大角咀嘅「麥金．麥金馬拉特式茶啡室」，重溫晌馬拉嘅時光。

門口嘅木製小門設計已相當有地道特色，當踏入「麥金．麥金」，內裡嘅裝修，確喺頗有嗰種古舊風情，而門口嘅黑底金漆招牌，更喺種精神標誌啦！

此外，牆上掛咗唔少相片，除食物，就喺大馬跟美食相關嘅相片，而另一邊牆則掛上馬拉名特色菜名，如亞參喇沙、福建蝦麵、古仔路肉骨茶……等等。

餐牌都喺用番黑底熨金字，而食物嘅種類就肯定比當地嘅茶啡室選擇多，晌呢度可謂馬拉嘅食物應有盡有，招牌芽菜雞、肉骨茶、飯類、喇沙、湯麵、乾撈麵、風味小炒、特色小食、地道特飲。

而落單採自助形式，自己填紙仔，再交俾店員，食物亦由店員送上，咁樣落單就較少產生口傳嘅誤會。之後，再打番張單俾你核對，落錯或落漏嘅機會就大大減少啦！

順帶一提，枱上已放有多款特色調味料，包括黑醬油、頭抽、蒜蓉及新鮮紅椒碎，店員建議，如果食佢哋嘅招牌雞，最好就黑醬油搭蒜蓉及新鮮紅椒碎，效果最好。

馬拉沙嗲串燒 $40 /3串

有豬、牛、雞供選擇，如人多，亦可以揀半打份量，只喺$75。最好喺叫3串都可以3溝吖嘛，又喺屬店家嘅推介菜或，自然要試試啦。

燒到啲竹簽都燶晒，睇嚟火力十足，淋上滿滿嘅沙嗲醬，上枱時已聞到陣陣香氣，的確，啲沙嗲醬超香超好味，惹味得嚟帶少少花生嘅香甜，不過，除雞肉，豬肉及牛肉都有啲啲韌，可能燒過火少少。

招牌芽菜雞飯 $63

另一招牌菜就喺呢一道芽菜雞，因為特別印成一版彩頁，而小弟就揀咗芽菜雞飯，寫到明包咗黃薑飯、芽菜、馬拉泡菜（我依家先知馬拉都有佢哋地道嘅泡菜，食落酸酸辣辣，又幾好味），如想轉雞脾就另加$10。

初頭睇餐牌，仲以為喺會用上怡保芽菜，其實佢無講明，只喺我睇餐牌嘅招牌芽菜雞（淨餸嗰款）張相明顯喺用咗怡保芽菜而已，肥嘟嘟又短身啲，但實際只喺普通芽菜，失望就無話失望，少咗啲驚喜啫。至於啲雞，部份滑，部份又唔喺咁滑，感覺有啲奇怪，還好喺雞皮爽，皮下脂肪少，沾一點點蒜蓉黑醬油，好味提升；個黃薑飯色水似晒，但黃薑味再重啲就有個性，然而，唔喜歡食黃薑飯，可轉番白飯，或加錢轉椰漿飯或豬油撈飯，非常有彈性。

冬瓜龍眼茶 +$18

正價就要$25，但點咗個飯，就可以以優惠加配。嗰時去大馬，除白咖啡，飲得最多嘅喺凍冬瓜茶，冰涼清甜叫嘛。今次，就加埋龍眼添，香而清潤，入口更飲到少少香茅味，問過店員，原來加咗香茅及班蘭葉去煲，抵讚，唯可惜成杯嘢搵得一粒龍眼。

整體環境及服務都好好，食物嘅定價相宜，又唔收加一。如人多嚟試埋佢啲喇沙、椰漿飯及肉骨茶，就可以全面啲了解餐廳嘅實力。

個人評分
味道：7/10
環境：8/10
服務：8/10
抵食：8/10
平均每人消費：HK$121

餐廳資料：
麥金．麥金馬拉特式茶啡室 Kopitiam Makan Makan
大角咀大全街6-20號大富樓地下A2B號舖
3618 7803