2019年1月19日星期六

J.Co Donuts & Coffee:變種冬甩

一個月一次,又喺細胞小組嘅一大棚組員嚟聚一聚嘅日子,趁過年,就不如當喺食團年飯,搞番餐。之不過,我哋有成17人,出去食就頗麻煩,所以,叫啲到會、薄餅速遞、自家製食物……等等,返咗教會搞大食會就仲好,睇下圖就知有幾豐富。其中一位成員,就買咗「J.Co Donuts & Coffee」嘅冬甩甜甜圈當甜點。
呢個品牌嘅出品都喺第一次接觸,組員就一口氣買咗兩大盒冬甩過嚟,先介紹第一盒嘅迷你「冬甩」,但正確啲嚟講,佢正名叫「Cronut」(酥皮牛角冬甩)。
其實即喺咩嚟?即喺將牛角包(Croissant)嘅酥皮做成冬甩(Donut)嘅甜甜圈形,賣相睇落就猶如一般冬甩嘅色彩繽紛、味道五花八門,但食落嘅口感就會多咗一種酥化感!一盒共有12個,款款口味不同,同場啲細路睇見都不知幾開心。
而盒邊,就有介紹點樣翻熱喺效果最理想,令你食到暖笠笠嘅甜甜圈,襯杯咖啡真喺一流。
另一盒,就喺傳統呎吋及做法嘅甜甜圈,組員就揀咗其中3款,雖然話喺甜甜「圈」咋,但其中兩個喺無「圈」架,成個麵包咁,唔講唔知嚟自冬甩店嘅產品。
bowlYin & Yang $15
應該喺解「鴛鴦」啩,面面以太極嘅陰陽為設計圖案,不過味道就唔喺奶茶溝咖啡,而喺軟熟嘅朱古力包包配上奶茶味忌廉,中間嘅忌廉食落豐厚不膩,而且味道都好夾,難得整體少有唔喺傳統甜甜圈咁勁甜。
bowlAl Capone $15
中間呢個叫Al Capone,主要配搭喺比利時白朱古力配加州杏仁,即喺甜甜圈上層塗上一層白朱古力漿,再鋪滿杏仁片。由於加入白朱古力,味道偏甜在所難免,不過,大量嘅杏仁片令口感添上香脆,味道多一份層次。
bowlTira Miss U $15
擺到明喺意大利芝士餅口味啦,最欣賞喺拎咗Tiramisu嘅諧音做個冬甩名,夠晒抵死,不過,如果單喺睇樣就未必估到喺意大利芝士餅口味。面頭再糝多啲唂咕粉就似樣嘞,而內裡嘅馬卡風芝士忌廉感覺輕盈,確喺幾唔錯。
事後先知呢間冬甩店喺源自印尼,以特許經營模式在世界各地發展,以往都見過有過江龍冬甩店晌香港插旗,但最終都喺結業收場。但見「J.Co」同時賣埋咖啡、漢堡,相信應該有得做。

個人評分
味道:7/10
環境:-/10
服務:-/10
抵食:-/10
平均每人消費:HK$15

餐廳資料:
J.Co Donuts & Coffee
將軍澳唐德街9號將軍澳中心地庫1樓B15號舖
2328 6511

沒有留言:

發佈留言