2019年1月25日星期五

聚好冰室 Gathering Cafe:井然有聚

剛好同夏總都無飯開,佢老婆有飯局,我老婆就公司周年晚宴,所以,兩個孤獨嘅麻甩佬就約出嚟搵間茶記食飯兼傾傾旅行嘢。就返大家收工位置,過到嚟太子嘅「聚好冰室」,貪一陣走嘅時候夠方便。
走入餐廳,環境比一般街坊茶記闊落光猛,第一印象就喺乾淨整潔,予人感覺井然有序。而個鋪位都幾深下,直入仲有好多位,而且,左側旁仲有樓梯可以上去二樓,不過,就無上去望望,唔知有幾大。
我哋就揀咗坐入啲,因為裡面有好多卡位,此外,遠離少少門口無咁騷擾。如果人多少少嘅話,近門口嘅大圓枱喺幾好嘅選擇嚟。
由於我哋都無乜話有目的想食咩,但求就手搵個地方,所以,餐牌都無咩點研究,一眼睇到個小菜餐牌就晌度揀,同夏總各揀一個。不過,呢度嘅小菜並非套餐形式,無加錢嘅配搭,白飯都要另外散點。
bowl老火湯
雖然無咩配套,但阿姐都好好人,送啲老火例湯俾我哋飲飲,是晚嘅例湯喺老黃瓜煲豬骨,好足料,飲落夠老火,難得又唔油添,真喺既大方,又有誠意。
bowl涼瓜牛肉 $78
涼瓜喺夏總嘅「飛弗」,咁我都OK嘅,炒得都有啲鑊氣,涼瓜亦唔喺好苦,帶少少甘,又爽爽哋咁,牛肉亦好軟腍,整體確喺唔錯。
bowl椒鹽蝦球 $88
小弟就想試試佢啲椒鹽菜式,揀咗蝦球,諗住正啲啩。份量唔少,啲蝦球睇落都幾大隻,粉漿又做得唔會太厚,椒鹽確喺惹味啲,有點點辣勁,唯獨啲蝦肉就覺得未夠爽口。
補充一下,絲苗白飯$8碗,飲品當散點,但唔收加一,服務算喺咁,啲阿姐都好有禮貌,當然, 如果啲小菜可加錢轉為套餐就更理想啦。

個人評分
味道:7/10
環境:7/10
服務:8/10
抵食:7/10
平均每人消費:HK$91

餐廳資料:
聚好冰室 Gathering Cafe
太子鴉蘭街2-4號地舖

沒有留言:

發佈留言