2018年12月4日星期二

食雞 Winner Winner Chicken Dinner:放題雞煲

冷峰嚟喇!冷峰嚟喇!卒之有啲寒意,既然咁凍,食火鍋就正晒啦,都好耐無食過雞煲,一於食個暖笠笠嘅雞煲迎冷冬。選址新開無耐位處大角咀洋松街嘅「食雞」,順路過埋隔離嘅大角咀市政大廈拍卡,搭地鐵慳番兩雞,哈哈。
大角咀不斷轉變,近年更陸續有啲新樓落成,不過,洋松街呢一截相對都喺比較靜,而門面光猛嘅「食雞」就顯得明亮。亦有唔少食肆睇準呢啲二線社區嘅轉變,趁租金未喺咁瘋癲,想嚐試搶灘一下。
嚟得早,所以都未有客人入座,而餐廳地方都頗大,樓底又高,裝修無咩花巧,簡約平實,枱櫈都排得較為闊落,故此予人感覺寛敝。
以往食過幾次雞煲,因為都喺以賣質素嘅關係,都喺以散點形式,但「食雞」就唔同,以任食嘅形式。$258 + 10%一位,除雞煲,仲有多款配料任食,飲品任飲。
而新開張關係,仲有6送1優惠,但就要齊腳覺先享用到,對小眾嘅客戶群就唔吸引。唯最正喺以「放題」形式嚟講,而無限時吖嘛,可以輕鬆慢慢食,唔使趕。
先講個秘製雞煲,可以自行選擇雞煲風格,辣度、芫荽、洋蔥、大蔥嘅多寡都由自己話事。
因應唔喺個個人都喜歡花椒呢椒嘢,入口會有種麻麻哋麻痹嘅感覺,所以,店主刻意另上,更用個小石樁嚟俾客人玩吓。
引入雞煲已經多年喇,相信唔少人都知佢個「玩法」,不過,如果唔識,枱上嘅墊枱紙都有介紹,其實,一早店員都已經有介紹。
bowl秘製雞煲
我哋嘅雞煲卒之登場,雖然已經叫做煮好晒,但趁未再熱番先影張靚相,而雞煲嘅份量確喺唔嘢少。加上煲面鋪滿芫荽、洋蔥……,熱力逼出香氣。
滾起搞勻就食得,睇見到流口水,先試幾口,由於我哋要少辣,辣度輕微,店主亦話少辣啱大多數人。而啲雞仲喺好嫩身,極之入味,味道香濃有層次,唔敢講話喺咪全城最好,但亦肯定喺有水準嘅出品。
食完個雞煲就輪到打邊爐,店長會幫你加入豬骨清湯,佢仲話個湯底熬咗廿個鐘,更喺真材實料,絕無添加。有個溫馨提示俾大家,雖然加咗豬骨清湯,但唔想越食越辣,呢刻最好撈起晒雞煲內嘅辣椒,否則,食到尾個湯底變得幾辣吓。
既然喺任飲,都順便介紹吓有咩選擇,餐廳尾一大個雪櫃,擺滿多款飲品,一眼睇晒,都喺本地品牌居多。不過,之前睇個價錢牌,話啤酒類任飲需每位另加$20,我哋唔好啤酒,所以,唔知喺咪堅收,我諗店員有需要事前提一提啲客人,避免不必要誤會。
睇我嘅選擇,就知喺目的喺下吓火啦,又雞煲,又打邊爐,始終喺燥底嘢,飲罐清涼爽、加多寶(王老吉)打打底。
bowl火鍋拼盤
食過雞煲之後,店員捧嚟一份火鍋拼盤,當中包括多款火鍋料:梅頭、牛小排、珍寶蟹棒、丸類五天王、扎肉片、魚皮餃、白蘿蔔、炸魚片,話喺曬冷打頭陣,睇吓喺咪咁堅。
bowl切片Prine牛小排
打邊爐又點可以無牛肉架,啲牛小排睇落質素相當唔錯,色澤紅潤,雪花紋分佈平均,輕灼十秒八秒已經可以放入口,肉嫩油香,又有肉味,果然喺高質素。
bowl西班牙Iberico豬梅頭肉
用到西班牙黑毛豬,自然有所期待。同樣色澤鮮紅,單睇外觀感覺唔會太肥,灼熟後,入口真喺好軟腍,又唔會太油膩,好食。
bowl頂級魚丸、魚片頭
點菜紙介紹為「極級丸類五天王」,先試炸魚蛋及魚片頭,兩款都食得出喺靚料嚟,除入口口感爽彈之外,確喺有魚鮮味,唔喺食到一口粉嘅貨色。不過,題外話,款魚片頭唔見點菜紙有,想翻兜再點可以點樣呢?
bowl黑椒牛根丸、墨魚丸、豬肉丸
再試就喺另外3款丸,品質喺唔差嘅,但話喺極級就似乎誇張咗少少。牛根丸同豬肉丸幾爽口,前者更喺有筋性。
bowl韓國珍寶蟹棒
真喺見識少,咁大個仔未見過咁大條蟹棒,食落唔錯喎,雖然都知喺搵魚漿做,但最緊要唔喺似嗰啲平價貨咁,入口一糰粉,乜味都無。
bowl鬼馬扎肉片、魚皮餃、白蘿蔔
食越南嘢時食扎肉就試得多,打邊爐則第一次,效果亦幾好喎,而且,扎肉內加咗少許馬蹄粒,感覺仲頗得意添;魚皮餃喺普通貨色,題外話,唔太鍾意打邊爐時啲白蘿蔔薄切,因為好易煮到腍晒、散晒,都喺鍾意角切多啲。
bowl炸魚皮
無問過喺咪自家製作,但估計都喺來貨,因為佢哋都無供應海鮮類食物,何來咁多魚皮。但質素都唔差喎,放湯浸一浸就食得,仲有啲脆口感之餘,吸引咗少少湯汁,添多分惹味。
bowl響鈴
同樣,店家無強調喺自家製嘅,即應該喺來貨,依家都有好多豆品鋪有賣響鈴,普遍嘅質素都唔差。簡單湯灼,輕輕一拖,響鈴吸咗少少湯汁,面層辣辣腍腍,內層仍有少少香香脆脆。
bowl西班牙Iberico豬頸肉、手作蝦皇雲吞、鵪鶉蛋
上文都提及過呢度肉類選項唔多,所以,另一款黑毛豬頸肉梗喺要試試啦,再加啲雲吞及鵪鶉蛋。好老實,鵪鶉蛋都喺貪得意點嚟食吓,唔會有咩太驚喜。
豬頸肉確喺唔錯,咬落有韌勁,又有啲爽口嘅感覺;但雲吞就真喺失望啲,一心諗住「手作」即喺新鮮包,但送到嚟只喺雪藏貨色,還好嘅喺味道都唔差。
餐廳一角,有一部大雪櫃,擺滿多份雜菜籃,有唔同嘅配搭,自由取用更自在,食幾多,就攞幾多,唔使等店員招呼。
由於無時限,可以食吓,又抖吓傾吓偈,又再食吓。不知不覺,食到肚滿腸肥,呵呵!整體而言,個人認為肉類嘅選擇偏少,又欠缺海產類食品,定價亦唔算平,所以,小弟就覺得性價比一般。雖然,有6送1優惠,但算喺門檻高,未必惠及到大部份食客。

個人評分
味道:7/10
環境:8/10
服務:8/10
抵食:7/10
平均每人消費:HK$284

餐廳資料:
食雞 Winner Winner Chicken Dinner
大角咀洋松街38號地下1-2號舖
9220 2291

沒有留言:

發佈留言