2018年12月2日星期日

和民居食屋 Watami Japanese Casual Restaurant:和孩共享

一個月一次嘅細胞小組活動,今趟輪到小弟負責,我搞親嘅都喺戶外嘢,所以,趁秋涼,一於帶大家行吓山。正所謂糧草先行,出發前就梗喺要食飽飽啦,拉大隊落太子嘅「和民」,貪佢地方大,選擇多,適合一大棚人嚟。
呢間店確喺好大,不過,以通花屏風間開晒,所以,睇相唔覺,實際,有好多行用餐區。此外,裝修又幾雅致,一室暖木系,雖然無乜具日式嘅擺設,但感覺好和風。
仲有一啲小區域,自成一角,擺到3、4張枱,我哋成十多人,正正安排呢啲用餐區域,一字長形拍晒啲枱,成個空間就好似喺我哋嘅獨立個室咁,又巧妙用全身鏡嚟增加空間感。
上文都講過啦,佢哋嘅菜式選擇多,單喺個冬日套餐都睇到你眼花,其實,嚟嚟去去都喺2人或4人套餐,只不過有多種級別定價,每個套餐又有好多種配搭而已。
此外,時值冬季,自不然加入季節限定嘅「冬之鍋」特集。
由於我哋人多,大家又唔嫌煩,就一於散點,揀啲心水菜式。況且,喺啲媽咪先知佢哋嘅細路口味嘛。影餐牌都有排影,同樣又喺花多眼亂,唔多講,自己睇圖啦。
bowl海老牛油果沙律 $58
顧名思義,個沙律除咗有沙律菜、燈籠椒、青瓜及車厘茄外,就仲有凍蝦及牛油果,色彩繽紛醒神,而醬汁另上,方便唔同人對醬汁嘅需要,而味道有啲似千島。整體味道幾清爽,啲食材亦頗新鮮,喺一道唔錯嘅開胃沙律。
bowl和民健康照燒雞肉沙律 $68
相對嚟講,大家就偏愛呢一款沙律,相信一來因為有照燒雞粒,惹味啲,二來淋上日式胡麻醬,令味道濃香咗,可以講喺變得色香味全。
bowl加州卷 $58
常見嘅加州卷多數都喺將牛油果捲入其中,但依家牛油果成為大熱食物,健康有營,加上吸晴嘅翠綠色,「和民」嘅加州卷索性將佢變成「主角」放上面,裡面就捲住蟹柳、青瓜絲,味道不俗,喺嫌啲飯爛咗少少。
bowl鮭魚牛油果卷 $68
既然牛油果咁有益,就再下一城點多客有牛油果搭三文魚做主角嘅卷物,同樣裡面都喺捲住蟹柳及青瓜條,面頭就放上牛油果及薄薄嘅三文魚,入口柔香軟滑,若非啲飯差咗少少,呢款卷物肯定俾佢90分。
bowl壽司卷盛 $108
本應一客卷盛有齊火炙三文、帶子、芒果、三文魚及燒牛肉共10件壽司卷,不過,燒牛肉未有貨,咁就梗喺揀帶子嚟代替啦。色澤鮮艷,不過,啲飯粒切到甩晒,唔齊口,賣相要扣分。整體而言哋,食材嘅味道鮮,尤其啲帶子,厚肉鮮甜。
bowl和風煙肉、雜菌批薩 $48
咪見佢啲薄餅賣48蚊咁平,其實,直徑大概8吋,仲喺薄批,就算一個人食晒都濕濕碎,但勝在可以試到多啲唔同菜式。個批本身做得唔差,薄身脆口,夾雜啲煙肉同雜菌,加埋啲芝士,鹹香不俗。
bowl照燒雞肉批薩 $48
而照雞雞肉就相對惹味多啲,配薄餅,一樣唔錯,尤其啲雞肉又無話焗到「嚡霎霎」,啲照燒汁又香濃,夾芝士,掂喎,所以,呢道菜我哋亦有「安哥」。
bowl北海道名物!十勝豚肉盒子飯 $78
個名講到咁明,重點就梗喺啲豚肉啦,難得有好多豚肉鋪晒晌飯面,真喺無欺場,而且,啲豚肉有啲質素喎,軟腍有肉香,咬落去唔會唔知自己食緊咩肉。
bowl滑蛋豬柳盒子飯 $68
個豚肉飯做得唔失禮,咁個豬柳丼又點呢?大大塊吉列豬柳,算得上鬆化,不過,滑蛋就變咗熟蛋,而飯底嘅珍珠米俾起做壽司卷嘅飯底好好多。
bowl石鍋黑椒牛肉飯 $58
最後,再追加多一客飯、一客拉麵。啲牛肉喺生牛肉,以石鍋嘅熱力逼熟,所以,啲牛肉頗為嫩滑,再將啲飯撈勻,底下有些微飯焦,又幾好食喎。
bowl豚骨醬油拉麵 $78
以豬骨湯加入醬油為賣點,估唔到又唔太差啫,湯頭嘅豬骨味幾濃郁,而麵條唔喺話好爽,叉燒亦偏肥,最正應該喺隻溏心蛋嘞!
咪睇我哋唔喺點好多嘢,其實,分段點,有啲好食嘅翻兜再點,似乎最開心喺啲細路仔。「和民」啲嘢唔算好高班,亦唔算差,仲偶有意外收獲添,而且勝在花款多,定價又唔算貴,可以一次過試到多啲嘢食,食飽飽,喺時候出發起行喇!

個人評分
味道:7/10
環境:8/10
服務:7/10
抵食:8/10
平均每人消費:HK$90

餐廳資料:
和民居食屋 Watami Japanese Casual Restaurant
太子彌敦道750號始創中心地庫B01A,B10-12及B14號舖
3167 7426

沒有留言:

發佈留言