2018年12月30日星期日

王家沙 Wang Jia Sha:因家得減

都話近排旺上海菜咯,短短一、兩個月就到訪過4家上海菜館。其實,又一城嘅「王家沙」就無預喺幫襯嘅,我哋一班細胞小組朋友,原打算去「翰騰閣」飲茶,本身都知星期日午市無得訂枱,已有組員一早去攞位,但等吓等吓都45分鐘啦,無人理,又講唔到仲要等幾耐,所以,建議不如轉場,飲餐茶啫。
雖然時值午飯旺市,但「王家沙」都算大鋪,啲客人又快上快落,所以,上到去等唔使5分鐘即有枱。啲細路已經好肚餓,所以,「嗱嗱淋」剔紙仔落單,餐牌都唔得閒影。
bowl蘇軾鮮肉小籠包 $52
睇落外皮有啲厚,摺位亦明顯唔細緻,所以,入口就較為實,多少都影響咗整體嘅口感。還好嘅喺淨肉餡都做到肉鮮、汁多,又幾鬆化。
bowl蟹粉小籠包 $78
同樣,外皮都喺做得麻麻,不過,啲豬肉餡確喺做得唔錯,搓得鬆化唔死實,咬開都幾爆汁,加埋蟹粉,入口絲絲蟹香,用料不賴。
bowl鮮肉生煎包 $48
對比起小籠包,生煎包及鍋貼就做得好好多,包面沾咗少少白芝麻,個個飽滿大隻,包底煎得甘香鬆脆,包身咬落唔黏牙,而內裡豬肉餡如小籠包咁,做得有一手。
bowl鮮肉鍋貼 $48
跟生煎包差唔多,只喺包皮換上餃皮,同樣鍋貼底煎得焦香脆口,餃皮黏糯筋性,配上多汁嘅鮮肉餡,自不然好食。
bowl王家沙鹹粢飯 $42
好耐無食過粢飯喇,雖然一客有2條,但每條都好細,但勝在餡料多,內裡塞滿油炸鬼及豬肉鬆,鹹香,口感又有層次。
bowl王家沙擔擔麵 $68
一般嚟講,由於擔擔麵出於四川,都會帶少少辣勁,不過,王家沙嘅擔擔麵就唔同,濃濃嘅湯汁帶花生香,卻喺無咩點辣,而麵條夠韌性,浸耐咗都唔會腍晒。
bowl嫩雞煨麵 $68
咪睇碗麵好似無乜餸,其實,啲雞丁沉晒晌底,而且,數量唔少,亦做到幾嫩,麵條同樣富韌勁。而個奶白色嘅湯底,入口鹹鮮,只喺質感就稍為有啲薄身。
bowl揚州炒飯 $88
對比兩碗麵,個炒飯就顯得普通啲,雖則喺咁,個炒飯嘅質素都唔差,炒得飯粒分明,又有幾多料吓。
bowl紅油抄手 $58
咪睇碟抄手上面淋上啲紅油好紅就會好辣,但查實辣度輕微,唔太嗆喉,而抄手皮幾滑溜,啲肉餡又唔會太多肥肉,確喺幾好食喎。
bowl家鄉炒年糕 $88
其實即喺傳統嘅上海炒年糕,煙韌有咬口嘅年糕,配上濃厚醬油,做到基本有餘,亦反映出上海菜濃油赤醬嘅神髓。
補充多句,茶位收$12個,細路都要,花生就$12碟,我哋一行8人就收兩碟錢,另外,仲有加一服務費,卻喺人手唔喺好足,無乜服務可言。今次人唔太齊,但方便到轉場,否則,食完「王家沙」都未知「翰騰閣」有位未呀!再者,晌「王家沙」嘅消費肯定平過「翰騰閣」一大截,總算喺因「家」得減番啲開支。

味道:7/10
環境:7/10
服務:7/10
抵食:7/10
平均每人消費:HK$110

餐廳資料:
王家沙 Wang Jia Sha
九龍塘達之路80號又一城 G23鋪
2265 8488

沒有留言:

發佈留言