2018年12月5日星期三

籽樂廚房 Sowergift Kitchen:籽日可待

多年前已幫襯過「有情有意」呢間社企餐廳,亦喺晌社企餐廳中,做得比較成功嘅一家,不過,正想去再次光顧之際卻發現俏然無咗。後來,從食評及FB中,發現原來佢哋晌尖沙咀山林道「重開」,並改名為「籽樂廚房」,同樣喺個讓失聰人士自力更新嘅地方,更推動聾健共融。這晚,就撐撐佢嚟食餐晚飯。
餐廳位處街尾一幢新商廈中,環境跟以前嘅「有情有意」差唔多,地方闊落,但安排嘅枱櫈唔會排得太逼,配合柔和燈光,其實就蠻有氣氛。
甫坐低,店員即時遞上一大支清水及全套餐牌。
餐牌嘅製作精簡,翻開細閱,散點嘅餐牌嚟講,類別分為沙律、前菜、主菜、意大利飯、意大利麵、薄餅及甜品,選擇都算唔少。
另一張就喺飲品餐牌,同樣選擇唔少,除大路嘅檸茶、朱古力,多款特色咖啡、花茶、啤酒,甚至紅白餐酒都有。
有啲人就唔想花腦筋諗太多,咁就可以縮窄睇晚市4道菜套餐,包前菜、餐湯、主菜及甜品,奉基本餐飲,定價有平有貴,範圍都比較闊,$178-$368。
晌門口睇唔徹啲手語手勢唔緊要,一如前店,為方便跟失聰嘅店員溝通,餐牌後都有一張簡單手語表俾大家學番幾招,我就一招走天涯,乜都喺手指指。其實,有啲店員只屬弱聽,亦講到少少嘢,所以,都溝通到嘅。
bowl黑松露蜜糖烤雞翼 $88 
啲雞翼烤得金黃均勻,又帶少少焦香,咬落外皮香脆,肉質細嫩,不過,黑松露味無預期咁香,反而嗒到蜜糖嘅清甜香味。但喺,一客只得4隻,賣$88,我哋覺得有點偏貴。
bowl香煎帶子淡蝦醬意大利飯 $148
堅喺我哋平常食蝦醬炒通菜嗰朕蝦醬味,其實搵蝦醬做西菜都唔喺第一次食,曾經晌觀塘嘅「MIC Kitchen」食過一道凱撒沙律配蝦醬汁紹興酒醃蜆肉,好有驚喜,而今晚呢個意大利飯亦一樣俾到驚喜。首先啲飯煮得啱啱好,入口有咬口,飯心唔會太硬,每粒飯均沾滿濃香而不太鹹嘅蝦醬汁,份外惹味;帶子亦喺用上刺身級,既大粒,簡單香煎,已好能夠突出其鮮甜味。
bowl帕施圖汁荷蘭大啡菇闊條麵 $148
試完碟有水準嘅意大利飯,唔知佢啲意大利麵又點?揀咗以香草醬做嘅荷蘭大啡菇闊條麵,一身青綠,每炷麵條都掛滿香草醬,而且,無平常常遇到食完一碟底喺油嘅情況,麵條亦具咬口;此外,除面頭嘅大啡菇切成一片片外,麵條內仲混有唔少野菌,入口唔會咁單調。
bowl12吋野菌焗芝士薄餅 $128
揀呢個薄餅都喺遷就我老婆口味,主要都喺素食材料,多款野菌搭芝士,焗得幾香,不過,喺邊位有少少燶。佢哋嘅薄餅喺做成薄身嘅「餅乾底」,所以,非常之脆口,蕃茄醬、野菌、芝士呢個組合,基本上都無乜點會失手,況且,落野菌都無乜點手軟啊!
門面,有幅簡單嘅畫作,入門口時都無留意,離開等電梯時先留意到畫角嘅一句說話:「好天一直在,只是有時飛得不夠高,看不到。」,蠻有意思嘅描述。事後再次上其官方FB,原來佢哋仲搞埋「包場主題體驗」、「到會服務」、「無聲飯局」……等等,更強調其理念喺「希望通過一所餐廳平台,在社區散播快樂的種子、推動社區共融的理想。」依家香港人好多怨氣,唔少人既自我,又自私,實在需要多啲正能量!希望「共融」唔喺理想,而喺指日可待嘅事情。

個人評分
味道:8/10
環境:8/10
服務:8/10
抵食:8/10
平均每人消費:HK$190

餐廳資料:
籽樂廚房 Sowergift Kitchen
尖沙咀山林道38號銀座38 3樓
2668 0450

沒有留言:

發佈留言