2018年12月8日星期六

堤岸酒吧及餐廳 Pierside Bar & Restaurant:值得一堤

為慶祝老婆啱啱完咗一個學期,辛苦捱埋個試,一於帶佢食餐好嘅,更順便慶祝埋聖誕,不過,佢一向鍾意食得精大過於量,度吓度吓,就不如一齊去嘆番次「高茶」。睇到有食友推介「堤岸」嘅新下午茶,「堤岸」我未光顧過,但睇完人家嘅食評,就覺得好吸引。

餐廳位於酒店海景翼嗰邊,所以,對海一排窗邊位喺揀手位,訂位記得要預留窗邊位。而環境寬敞闊落,氣氛幽靜,兩公婆嚟到嘆下午茶真喺好寫意。唯可惜今日天氣麻麻,外面一片灰濛濛,跟黃昏日落景緻緣慳一面。
原來,今次嘅下午茶主題「縱情櫻花 ‧ 寵愛甜杏 ‧ 醉愛下午茶」喺美髮天然品牌「Aveda」聯乘,所以,客人獲贈櫻花甜杏輕柔系列體驗套裝乙份,不過就數量有限,送完即止。對於啲護髮嘢小弟只喺識條鐵,但一講老婆就話喺國際知名品牌,所以,帶啱人嚟嘆呢個下午茶都喺重要。
整份套餐,包括4鹹8甜做得精緻嘅美食,並奉送Aveda舒緩茶或粉紅氣泡酒,非常豐富。資訊性一提,下午茶收費為$468/2位(需加一,但HSBC信用卡又有番9折),做到一月尾左右,但只限星期六、日及公眾假期(3:00pm-5:30pm)供應。
目測所見,同場嘅客人絕大部分都喺嚟嘆一嘆呢份「高茶」,等無耐,我哋嗰份都「紅粉」登場,一眼睇落就知喺以粉紅為主色調,以配合櫻花嘅主題。而且,利用一啲小道具,擺放得非常之靚女(平常會用靚仔嚟形容),每樣都做得的骰,更以糖霜灑出「Pierside」及「Aveda」字樣以示兩者聯乘。
bowlAveda舒緩茶
先嚟一壺Aveda舒緩茶,花茶就啱我老婆啦,侍應並介紹呢隻茶唔單止有機,仲不含咖啡因,多飲都絕對唔會瞓唔到。入口涼涼哋,又似喺有啲甘草味,飲落確喺有種舒緩感,感覺又幾舒服,甚具寧神安舒作用。
bowl粉紅氣泡酒
深紅卻晶瑩嘅氣泡酒,放上兩粒野莓,外觀雅致迷人。入口酒精度低,微微嘅冰涼感,襯啲鹹點,效果出奇地好。
既然無乜心水次序嚟食,我哋就一於跟番個餐牌次序,先介紹4款鹹點。
bowl皇帝蟹肉魔鬼蛋
唔知點解叫佢魔鬼蛋,染咗少少粉紅,外觀不知幾可愛,而蛋內塞滿皇帝蟹肉,鮮味到嘩嘩聲,以酸忌廉作調和,味道襯晒,喺一道好有驚喜嘅鹹點小食。
bowl老虎蝦、牛油果醬、法式多士
小小一件百吉包用到虎蝦,自然升價咗,其實呢件鹹點都好簡單,塗上柔滑嘅牛油果醬,再鋪上虎蝦而已,但好食在料靚,蝦肉好爽,有蝦鮮味,驚喜位喺仲加咗少少芒果蓉。
bowl雞肉、蜜糖芥末三文治、香脆杏仁
唔睇餐牌真喺唔知呢件喺乜,因為被薄薄嘅青瓜片包住,試4面又灑滿香脆嘅杏仁片。其實叉起一睇,就見裡面薄麵包捲住工整嘅雞肉條,襯以蜜糖芥末醬,清爽中滲出香甜味,有趣。
bowl迷你西班牙奄列、帕爾瑪火腿、櫻桃油醋汁
西班牙奄列近年食唔少,咁迷你就第一次見,亦喺首次試,入口既有蛋香,又嫩滑,但櫻桃油醋汁唔喺太明確,不過,單喺配上鹹香嘅帕爾瑪火腿已經夠照。
跟住就再介紹8款甜點,甜點都好多元代,有熱香餅、奶凍、甜甜圈、馬卡龍……等等。
bowl紅菜頭熱香餅、燴士多啤梨醬、蜜糖乳酪
橫睇掂睇,都唔喺好覺有紅菜頭元素,一來個餅又唔喺帶有任何紅色,二來切開裡面亦無紅菜頭嘅蹤影。相反,啲士多啤梨醬同蜜糖乳酪就好正,前者士多啤梨嘅酸香好鮮活,後者則清甜中滲出醒胃嘅微酸,只恨得兩小件熱香餅。
bowl櫻花意式奶凍
做成小杯裝嘅奶凍,一身粉紅,入口挺身而軟滑,帶有濃郁嘅奶香,猶如少女肌膚;面層仲有一小球晶瑩嘅櫻花水信玄餅,如再放下一片櫻花花瓣,美到絕點喇。
bowl櫻桃紅桑子朱古力
睇嚟感覺似喺平平無奇,實質喺食質素,先講個撻殼,又脆又有濃郁可可香,而中間喺櫻桃紅桑子做嘅軟漿,絲滑細緻,甜與酸都好平衡。
bowl粉紅佳人
其實即喺紅石榴芝士蛋糕,由粉到白漸變嘅身軀,加上餅面櫻花造型嘅果凍,真喺可以以嬌俏可人嚟形容。入口有芝士香卻唔太重,感覺輕盈。
bowl迷你甜甜圈、士多啤梨朱古力、迷迭香
一般而言,美式嘅冬甩、法式嘅馬卡龍及歌劇院都喺偏甜之物,安排到最後先食喺正確嘅鋪排。不過,呢個甜甜圈,就無一味死甜,咬落有韌勁,夠個性,灑吓幾粒迷迭香香草,有種喚醒味蕾嘅功效。
bowl紅桑子開心果馬卡龍
馬卡龍好多人嫌佢太甜而唔喜歡,小弟就好鍾意食,因為嗰份外脆而煙韌嘅口感確喺好特別,除表面沾上少許開心果仁碎,咬入去先知仲有一層紅桑子果蓉凍,酸香立時跟甜度拉勻,喺好有水準嘅馬卡龍。
bowl迷你櫻桃歌劇蛋糕
歌劇院蛋糕可以講喺法式甜點中嘅經典之一,而且,層次多,工序繁複,不過,眼前嘅「歌劇院」就未算多層,但味道卻喺做得唔錯,濃濃嘅朱古力跟醇香嘅咖啡互相交融,甜度亦相應減低咗,實在唔錯。
bowl牛油杏仁曲奇
初時睇餐牌時話有杏仁曲奇,一直睇晌邊度有,因為早被自已框架框住,諗住啲曲奇一小件咁,其實就喺整份下午茶中間嘅大曲奇。都睇咗好耐,唔知啲朱古力線代表喺乜,後來先知原來喺劃成一把髮梳,以配合Aveda呢個美髮品牌。但講到件曲奇,意外地咁脆口,而且,混有好多杏仁碎,如果有杯咖啡就襯到絕。
其實,甚至連墊底嘅薄片都喺搵朱古力製作,堅可以食得架。
雖然,今日嘅天氣麻麻,灰濛濛未能睇到日落,不過,因為天氣都唔太凍,走到出中港城嘅平台睇睇海景,遠眺吓戲曲中心及西九龍站(高鐵),感覺不錯呀!

個人評分
味道:8/10
環境:9/10
服務:9/10
抵食:7/10
平均每人消費:HK$235(信用卡9折)

餐廳資料:
堤岸酒吧及餐廳 Pierside Bar & Restaurant
尖沙咀廣東道33號中港城皇家太平洋酒店海景翼大堂高座
2738 2398

沒有留言:

發佈留言