2018年12月27日星期四

蟹仙:仙入為主

做人、做事都好,最怕就喺先入為主,睇嘢有偏頗,對人不對事。不過,講到食嘢,啲食材就梗喺越新鮮越好啦,而海鮮,唔新鮮嘅就不如平平哋食番冰鮮啦。由元朗開到出嚟市區嘅「蟹仙」喺老友嘅近期推介,佢話值得專程嚟幫襯,對小弟而言,就真喺要專程過嚟架。
餐廳都屬小店格局,睇落座位唔多,枱與枱之間有少少逼,最好喺入面啲卡位。鋪面、鋪內都放置唔少大玻璃缸,養住唔少生猛海鮮。而後來聽啲店員嘅對話先知,仲有二樓,不過,就唔知環境喺點。
點解友人極力推介,原來店主本身做咗幾十年海鮮批發,揀手海鮮嘅貨源一定足。此外,餐廳主要做蒸氣鍋,4種唔同價位嘅套餐,起跳價都喺$298(星期五、六、日及公眾假期額外加$28),已包8款高質素海鮮,性價比高。其次,仲有$398、$498、$688嘅價位,正所謂豐儉由人。
若然擔心套餐嘅嘢食唔夠飽,又或有其他火鍋嘢想試,佢哋仲有一大堆配料可以散點加配。
而飲品方面,汽水、啤酒自然有得嗌,但紅白餐酒一樣有得供應!
bowl醬油費 $10
翻睇返個餐牌都唔覺有寫,都喺事後晌張單先見,感覺唔喺幾好,再者,醬油其實只喺得豉油、蒜蓉及辣椒碎而已。
我哋都哋平平哋揀$298個餐,隨即,捧上兩大份海鮮,包括越南頂角膏蟹、澳洲青年龍蝦、翡翠九孔鮑魚、日本大元貝、越南貴妃蚌、泰國海中蝦、深海龍躉片及紐西蘭青口,非常有氣勢。店員仲話啲海鮮喺新鮮劏,有落單先劏,唔會為減省時間一早劏定。
蒸汽鍋呢個玩法唔使我再多介紹啦,晌香港都已經興咗一段長時間,而呢度就逐樣蒸,由店員專人負責幫你放食物去蒸、計時,基本上全程就淨喺食。由於佢哋無提供一個建議蒸食物時間表俾客人,除非,你好有信心知啲嘢食蒸幾耐,否則都喺要等佢嚟搞,個人就覺得煩到佢哋,又嘥咗我時間等。
一開波,例牌搞定個粥底先,好快已見店只將米粒、南瓜粒、排骨放晌鍋底,等啲蒸汽慢慢熬。
bowl紐西蘭青口、泰國海中蝦
相信咁多款海鮮,以青口喺最平嘢,不過,都喺每個客人得一隻,略嫌唔夠大方。但掉轉講,相信好多人對食青口都喺可有可無(除非比利時或法國青口),俾少啲都唔介意。其實,啲青口都唔差,蒸熟之後唔會好似擦紙膠咁韌,亦有啲鮮味。中蝦每人「配給」兩隻,蝦頭有唔少膏,而啲肉亦鮮甜爽口,雖然只得兩隻,當喺少食多滋味,反正靚海鮮陸續有嚟。
bowl深海龍躉片
雖然龍躉片喺貴價貨,不過,我哋得兩個人,放兩片魚片落去蒸,有啲失勢。講番啲龍躉片,入口確喺嫩滑,魚味濃,唯可惜一片真喺唔夠喉。
bowl日本大元貝
由於店員話今日嘅大蟶子返貨唔靚,所以,只供應大元貝。啲元貝果然好大隻,色澤睇落都好新鮮,唔會瘀瘀黑黑。味道真喺唔錯,好鮮甜,帶子位好彈牙。
bowl越南貴妃蚌
輪到貴妃蚌,阿姐就教我哋將蚌內嘅海鮮汁倒埋落啲粥度,等個粥更鮮甜,我哋就倒是半,就咁飲另一半,咁先真正嗒到嗰份鮮。蚌肉蒸得啱啱好,所以,柔韌有咬口,無過火。
bowl翡翠九孔鮑魚
啲九孔鮑唔喺好大隻,但勝在都夠鮮,亦有鮑味,口感咬落有韌勁之餘,亦有彈牙感,沾少少豉油味道更鮮。
bowl澳洲青年龍蝦
亮點之一出場,店長就話佢哋啲澳龍喺野生貨色,老實講,小弟就唔喺好識分,但睇到啲肉晶瑩有光澤,覺得都唔會喺下價嘢。啲龍蝦肉唔止鮮爽,又厚肉,更有唔少蝦膏,拆起啲蝦肉大啖放入口,真喺爽呀。
bowl越南頂角膏蟹
專登將店名改為「蟹仙」,蟹就梗喺佢哋嘅賣點,我哋就壓軸先嚟食佢。講到蟹,店長就有好多蟹知識分享,讓小弟長唔少知識。
我哋兩個都想試頂角膏蟹,其實,可以膏蟹、奄仔一樣一隻都得。其實,呢啲頂角膏蟹喺蟹乸嚟,所以,一定爆晒膏,不過,相對啲奄仔嘅膏,就會實淨啲,卻喺別有一番滋味。此外,白滑嘅蟹肉就實在鮮甜,蟹嘅質素確喺高質。
bowl有機蔬菜籃
食完晒啲海鮮,店員就奉上一蔬菜籃,有南瓜、粟米、娃娃菜及生菜,南瓜同粟米就最正,前者夠粉香,後者好清甜。
bowl南瓜排骨粥
最後,就以南瓜排骨粥作結,雖然唔算好綿,仲要補多少少上湯煮多陣,但算集合上述海鮮滴下嘅精華,所以,個味道真喺無得點輸。
bowl椰汁燉雪燕
食完晒所有嘢,尤其最後一人頂兩碗粥,夠晒飽,點知同場加映送糖水,唔喺紅豆、綠豆,食落似喺椰汁雪燕,夠晒誠意啦,如果熱啲就仲好。
整體嚟講,有多款海鮮都食得出具質素,用料亦有番咁上下,此外,起跳價屬低位,連加一都喺三百頭,就已經食到8款海鮮,絕對玩得過啦。溫馨提示,餐廳暫時只收現金,將來會唔會加其他支付方式就唔知喇。

個人評分
味道:8/10
環境:7/10
服務:8/10
抵食:8/10
平均每人消費:HK$340

餐廳資料:
蟹仙
九龍城龍崗道2-4號地下
2360 9718

沒有留言:

發佈留言