2018年11月30日星期五

Moo Moo:Moo遂自薦

雖然「Moo Moo」嘅地址標示晌觀塘,其實佢近牛頭角多啲,晌牛頭角站行過嚟唔使10分鐘。因公事過到嚟觀塘,加上老婆要上堂,故此,今晚一支公索性食埋先返屋企。而揀咗「Moo Moo」,喺因為仲晌呢頭返工嘅舊同事推介,否則,應該未必行到過嚟咁篤。
餐廳嘅室內環境跟好多主打賣漢堡嘅小店差唔多,地方唔大,帶點美式風,少少酒吧嘅格局,全場以高腳枱櫈為主,依家已經開始掛上聖誕裝修。
室外位就反而搶鏡少少,尤其依家天氣涼涼哋,但又唔太凍,露天位變得清爽啲,而且,幽暗嘅環境,加盞小燈晌枱上,變得有氣氛。不過,非煙民嘅客人,都喺唯有乖乖坐返去室內。
因為嚟得早,都未入晚市時段,故此客人唔多,但如果室內外都坐爆,仲有個地方有位,就喺隔離個鋪都屬「Moo Moo」,不過,睇格局完全唔同,估計可能前身屬於其他小店,依家被佢租埋或借用。
基本上,可以好似傳統咁晌櫃位先點餐、俾錢、等嗌籌攞嘢食。亦可以選電子點餐,以八達通俾錢。然而,晚市無午市咁緊張,所以,晚市都有送餐服務,而且,店員嘅服務態度又幾好。
食物選項,兩大版A4紙印晒出嚟,主打當然喺漢堡,一共8款,有肉、有魚,可另外再加配料,為顧及食素人士,更有兩款喺全素漢堡。此外,仲有沙律、小食,11:00am-4:30pm時段更以套餐形式供應。
後面一版主要喺飲品,如特飲、冰茶、汽水、奶昔……等等,更有少量酒精飲品。
酒精飲品有咩揀?另一個小長形餐牌就見晒。
此外,牆上、枱上仲貼有一啲新品,如牛肝菌松露湯、迷你可可撻、小食拼盤……等等,更提供包場服務添。
睇睇吓好多嘢想試,結果就揀咗一款漢堡,配肉醬薯條及汽水,自製「套餐」,咁先覺得完整啲。當然,如果個套餐無時限性,咁就食得更划算啦!
bowl芝士肉醬薯條 $38
舊同事話呢個薯條喺必食,因為堅好味。初時,諗住賣$38唔會好大份,但原來份量唔少,薯條新鮮熱辣炸起,灑下芝士,淋上肉醬,食落鹹香有層次,啲肉醬調校得非常好,惹味香濃。唔怪得見唔少客都有點呢道小食,而且,比坊間同一款產品平3乘左右,抵食。
bowl熱帶之堡 $63
見到有菠蘿作為配搭,已經揀硬佢啦。以優質安格斯牛肉、芝士、菠蘿、生菜、蕃茄配以千島醬組成嘅「熱帶之堡」,拎上手非常之墜手,打橫睇見件厚身嘅漢堡牛就知無欺場。
個包身好軟熟,安格斯即喺安格斯,既有濃郁肉味,又富肉汁,口感搓得鬆化;而菠蘿即煎香過,清甜多汁,令整個漢堡更清爽,呢個就喺我喜歡夾有菠蘿嘅漢堡原因;睇餐牌無話有煙肉,所以,夾埋塊脆煙肉就多分驚喜,個醬汁原以為就咁千島,入口帶微辣,變得味道更豐富。 
bowl西柚梳打 $10
初時最想揀香蕉奶昔,不過,落單前見人哋叫咗客芝士肉醬薯條份量十足,所以,怕飲埋奶昔就太飽肚,故只要罐西柚梳打襯一襯就夠,何況漢堡配汽水一向都喺老朋友。
順帶一提,餐盤張墊紙都幾有心思架,唔喺好似麥記嗰啲一味賣廣告,而喺一張讓人睇完有會心微笑嘅幽默笑話,香港人真喺要放鬆啲呀!
「Moo Moo」確喺間高質素嘅漢堡包店,環境輕鬆,食物製作認真,想過吓漢堡包癮,當然喺講想食到有質素架啦,「Moo Moo」值得推薦。

個人評分
味道:9/10
環境:7/10
服務:7/10
抵食:8/10
平均每人消費:HK$111

餐廳資料:
Moo Moo
觀塘巧明街94-96號鴻圖中心地下1A號舖

沒有留言:

發佈留言