喜膳燒 Happy Q：一喜串燒吧！

雖然早排食過大阪炸串，亦晌間日式食堂食過串燒，不過，港式串燒印象中真喺好耐無食過，要數都可以喺成年前葵涌嗰次。友人介紹，晌尖沙咀寶勒巷有家串燒店「喜膳燒」，除咗有點質素外，亦有啲特色嘅串燒。寶勒巷可謂喺一條自然而成嘅食街，不知不覺間，短短街仔已經有好多食肆插旗，平貴、西式、日式、東南亞、印度……乜都有。今晚，同友人一起串燒吧！

如果唔講佢喺間串燒店，話佢喺酒吧都無人唔信，因為鋪前已放咗座「麒麟」生啤櫃，入到裡面，燈光昏黃，全場都喺高脚枱櫈，水吧位之上更放滿唔同嘅支裝酒。

不過，整體地方就唔喺好大，如果坐滿人反而幾有氣氛。其實，如果細心留意，有啲地方都花過心思裝修，好似天花燈、雀籠。

晌門口，已見到有個螢光燈牌，有多款串燒推介。

而餐牌，亦即喺點菜紙，雖然簡單，但選擇十分之多。單喺類別，就有店家推介、海鮮、牛肉、其他肉類、特別串燒、丸類、腸餃、蔬菜瓜果，仲有特色小食、烏冬、飯品（唔怕食極都唔飽），雖然甜品都有，就只喺雪米糍而已。

另外一張紅色長形嘅，喺飲品餐牌，如近年大行其道嘅手工啤，仲有雞尾酒、紅白餐酒、生啤、沙冰、梳打、花蜜茶、汽水……等等。最特色當然喺多款「麒麟」嘅果味生啤。

剩番一大張白色嘅餐牌，喺各種日本清酒，如果好清酒之人，應該都不愁無選擇。

可口可樂 $18

打鞭爐同食串燒，我覺得汽水喺最夾嘅好朋友。所以，我就要罐可樂，友人就要罐零系，熱辣辣串燒配冰凍可樂，爽呀！

先嚟一轉共4款串燒，包括燒芝士翠玉瓜、海鹽燒牛肩胛、沙嗲燒厚魚肚及燒芝士響鈴，排列整齊，最正喺以一塊熱石板㷫住，塊石板堅熱，好辣手吓，足夠成晚將啲串燒保持一定溫度，唔會咁快攤涼晒，可以慢慢嘆，依啲咪港人嘅靈活變通囉。

燒芝士響鈴 $19

嚟得「喜膳燒」目的都喺為啲特色串燒，響鈴唔使多介紹，有打過邊爐都知喺乜，但燒你又試過未？響鈴由腐皮炸出嚟，本身都好脆口，依家燒一燒就更香，而且裏面嘅芝士溶透產生拉芝效果，好得喎。話時話，會唔會考慮埋燒山根呢？

沙爹燒厚魚肚 $45

魚肚亦喺唔陌生嘅食物，不過，拿嚟做串燒小弟就第一次遇上，估唔到好有驚喜。魚肚果然大件又厚身，好有口感，軟腍得嚟又有咬口，啲沙爹汁好入味，定價唔平，但喺值喎。

燒芝士翠玉瓜 $24

燒翠玉瓜唔喺咩特別嘢，去啲任食BBQ通常都有供，配上車打芝士，令清爽嘅翠玉瓜多添一份鹹香感。順便講講，師傅做串燒嘅手勢真喺幾好，成晚試咗咁多串，熱辣辣卻唔會燒到乾晒，每類串燒拿捏時間準。

海鹽燒牛肩胛 $48

今次揀肉類嘅串燒唔多，本想燒份羊架，友人唔食羊，不如試吓牛肩胛，因為都冷門少少，再者，又喺店家5隻手指公嘅推介。的確喺有質素嘅牛肉部位，一來無燒過籠，腍滑而富肉汁，二來好有肉香，唔會食咗都唔知咩肉，鹽燒就最好，最能食出肉味。

食完第一轉串燒已覺得好滿意，期待後續嘅串燒，第二轉有燒麵根、沙爹手打魚皮餃及燒韭菜。而後上嘅串燒，並唔會一次過上晒，會逐樣上並放晌石板上保溫，所以，反正有保溫，我都等埋晒一齊影番張合照先食。

燒麵根 $18

除響鈴，第二想試就喺呢道燒麵根，睇見我都覺得好搞嘢，可選沙爹或香辣口味，友人唔食得辣就當然揀後者啦。燒出嚟嘅效果好得意，軟軟腍腍又帶點煙韌，充滿沙爹香，又有種食魚腐嘅感覺，過癮得意。因為好奇，事後問店員點整，原來都有啲功夫，先浸軟，再醃，然後先拎去燒。

沙爹手打魚皮餃 $25

又喺打邊爐常見嘅火鍋食材，我覺得喺繼燒賣之後，另一款火鍋料搞串燒嘅神奇食物。一客4粒，燒過後外皮添一份脆脆韌韌嘅口感，滲透惹味嘅沙爹香，食味唔錯。

燒韭菜 $18

除咗翠玉瓜，蔬菜類就揀多串韭菜，可以揀孜然或鹽燒，當然前者較有特色啲啦。大大排嘅韭菜，散發陣陣孜然香味，入口又唔會「乾爭爭」，好食。

泰式鹽燒烏頭 $138

海鮮類就揀條燒烏頭，賣百三蚊真喺抵食，因為依家一條烏頭本身都唔平，去啲潮州鋪食條凍烏頭百五喺普遍起錶價。

烏頭喺原條鹽燒，講明泰式，所以，見肚內插滿蔥及香茅。撕開魚皮，就喺啖啖魚肉，雖然，唔似蒸魚嗰種滑溜，但肉質細緻柔嫩，鹽燒嘅鹹味啱啱好，又滲出少少香茅香。跟魚仲伴有一款泰式醬汁，酸中有辣勁，更能提鮮，配搭真夾。

其實，以食咗咁多嘢計，消費都唔算貴，不過，肥媽話齋，要食平啲，無問題，指定日子10:00pm後嚟，全單七折，堅慳好多架，啱晒啲夜鬼。

整體服務唔錯，上串燒嘅速度算幾平均，唔會太急，又唔會等太耐。而幾款「本土味」重嘅串燒，確喺有賣點，值得一試！加上地點就脚，真喺幾個老友記約埋隊吓啤酒，食吓特色串燒，已經可以喺件好開心嘅事啦。

個人評分
味道：9/10
環境：7/10
服務：8/10
抵食：8/10
平均每人消費：HK$205

餐廳資料：
喜膳燒 Happy Q
尖沙咀寶勒巷10號地舖
3468 2234