2018年11月3日星期六

Backyard:悠閒小後院

10月、11月真喺行咗好多次山,都喺咁啱搵到個老友可以行啲有難度,夠挑戰嘅路段,繼上次沙田嘅黃牛山,今回就上城門嘅草山(針山舊年已挑戰咗喇)。呢日天氣一般,雖則清涼,但早上有啲毛毛雨,所以,沿路上山都好大霧,故就算攻到上頂,都一片迷霧,乜景都無。行山嘅嘢就等臨尾分享,行咗4個鐘,落番荃灣搵食,好耐之前已留意到「Backyard」嘅半自助午餐喇,平平哋百零蚊,可以輕鬆坐、輕鬆食,抵玩吖嘛。
踏進餐廳,予人感覺闊落清爽,除咗樓底高之外,對馬路嘅一邊全部喺落地大玻璃窗,而且,裝修簡約,以一室木系,再加上唔少植物,帶少少田園風,都喺予人好感嘅因數。
晌門口位已經見到,餐廳早、午餐、下午茶都以自助餐為主(午餐喺半自助),各項定價亦好親民。
半自助就最鍾意,反正全自助真喺食唔得晒幾多嘢,半自助就可以食平啲。而呢度嘅半自助午餐如大部分餐廳一樣,定價視乎所揀嘅主菜,共8款,由$118-$168,其實,淨食自助餐嘅食物都已經好夠飽。
自助食物集中晒晌用餐區嘅另一邊,即水吧位嗰頭,搵食唔使四圍走,等小弟快快手介紹吓有咩選擇。
bowl麵包、餐湯、芝士
除有啲方包、小圓包外,更有意式麵包條,旁邊更設有自動麵包翻熱機,算有心喇;而兩大壺餐湯,一款喺南瓜忌廉湯,另一款則喺雜菜湯;最估唔到,就連芝士拼盤都有提供。
bowl甜品
啲甜品就放晌餐湯旁,不過,陣容就弱啲,只得啲朱古力蛋糕仔、法式燉蛋、自製窩夫及朱古力噴泉。
bowl沙律、冷盤
再行過啲,就喺沙律吧,有兩款沙律菜、多款配料及醬汁,此外,亦有兩款預製好嘅沙律,其中一款更參入非常健康嘅藜麥。而冷盤類,除有凍切腸、燒牛肉之外,4款的的骰骰嘅小碟。
bowl熱盤
自助餐枱尾,就擺放咗多種熱食,包括:煙肉、漢堡扒、火腿、豬肉腸、雞肉腸、雞蛋、車厘茄、粟米粒、茄汁豆、炸薯餅及炒滑蛋。哈哈,完全喺可以自製一份「全日早餐」。
bowl飲品
好簡單,就喺咖啡、紅茶、熱水、檸檬,大家都明點玩具法。
bowl第一碟自助食物
先嚟清爽一下,就梗喺食沙律啦,再搭啲凍切肉腸及燒牛肉。啲食材唔算好高質,但亦不失禮,尤其啲凍切肉腸,要求唔高嘅話,絕對滿足到。小弟就志在利用頭盤嚟開開胃,打開胃納。
bowl第二碟自助食物
食完凍嘢,跟住最好就飲啖湯暖暖胃,小弟揀南瓜湯,估唔到做得又幾有水準喎,唔喺茶記啲白湯貨色,幼滑得嚟好有南瓜嘅清甜味。而伴湯嘅,就搭咗一個小麥包、芝士及水蜜桃。
bowl第三碟自助食物
見啲小碟冷盤的骰,除中華沙律外,其餘3款都拎嚟試吓。日式嘅八爪魚都喺來貨,反而,水牛芝士配車厘茄及胡麻醬茄子有少少驚喜喎,前者芝士軟綿綿清清哋,後者則做到爽口充滿芝麻香。
bowl賓尼廸克蛋配煙三文魚 $128
友人話未試過賓尼廸克蛋,所以,即時相中呢道菜式,賣相清新,而兩隻賓尼廸克蛋做得唔錯,既然有兩隻,就可以「些牙」吓。的確,隻蛋煮得啱啱好,蛋黃澎湃咁流出嚟,就連蛋白都好綿滑,之但喺,個人覺得面面啲荷蘭汁未夠酸香。至於啲煙三文魚,小弟就無試,故此就唔評論嘞。
bowl大蝦帶子意大利飯配乾葱刁草忌廉汁 $168
有留意小弟嘅食評都會發覺,我不時都會點意大利飯,因為,呢樣嘢都幾考廚師手藝,唔喺煎煎炒炒就搞得掂。而眼前呢碟意大利飯,咪睇個樣好似好濕,撈番勻就啱啱好,入口濕潤,飯心帶煙韌,最鍾意飯粒混有意大利黃瓜及青瓜,增添幾分清爽感;大蝦及帶子都睇得出用靚料,食落兩者都好爽甜,整體而言,喺有質素嘅一道意大利飯。
bowl生果窩夫、熱咖啡
午市半自助餐會晌2:15pm作為取食物嘅最後界線,點知人人都趕「死線」前整窩夫,所以,我嗰件烘得未夠時間,唔夠焦脆。不過,配點生果,淋上朱古力漿,味道還可以咁啦。
臨尾,介紹吓草山,話難唔難,話易唔易,始終都成647m高,有唔少上斜,不過,上得嚟都唔算好扯、好急,大部分路段都喺大路,至少比上次行黃牛山輕鬆得多。
遠眺,其實喺見刑獅子山。
對面山頭,其實就喺針山嚟。
今次雖然行咗4粒鐘山,又唔算好攰,可能跟天然清涼有關。之後,再食咗個咁豐富嘅午餐,邊體力都返晒嚟呀!

個人評分
味道:7/10
環境:8/10
服務:7/10
抵食:8/10
平均每人消費:HK$165

餐廳資料:
Backyard
荃灣青山公路荃灣段388號中國染廠大廈(8咪半)地下G1號舖
2388 0883

沒有留言:

發佈留言