2018年10月28日星期日

Texas Burger:如獲至堡

好耐無同表哥一家食飯,撞啱表姪女完咗個測驗周,就約埋出旺角食餐午飯。之前一直都講過帶佢試吓啲特色漢堡,故此,晌幾間心水嘅漢堡包店中,揀嚟位處「朗豪坊」嘅「Texas Burger」,因為地點最就腳,方便到大家。
雖然唔喺第一次嚟「朗豪坊」,但印象中好少上到咁頂層,餐廳開晌12樓,大大個霓虹招牌,十分易認。12樓嘅環境,裝有巨型天幕玻璃,撞啱又好陽光喎,所以,感覺令人醒神。
餐廳採開放式,晌外面都已經見到晒整個餐廳環境,最搶眼自不然喺近外邊圓拱形卡位,可惜嚟到時已有客人,未有機會坐埋去,相信啲卡位對表姪女吸引啲。而埋面嘅位就喺活動式二、四人位,裝修亦好簡約,勝在地方大,樓底超高,雖然呢組位拍得比較貼,但仍不失空間感。
此外,餐廳尾尾仲有啲高腳枱櫈,對正嘅地方原來喺個表演舞台,日頭就無咩嘢搞,但晚上不時會有歌手表演,到時揀呢幾個位就最正,邊食邊睇表演。
店名叫得「Burger」,自然主打喺美式漢堡,而且,選擇不少;再細閱餐牌,原來新加咗唔少墨西哥嘢,此外,仲有沙律、小食、烤肋骨、意大利飯、意大利麵,以及特飲同甜品,所以,今餐晏仔不愁無選擇。
bowl墨西哥粟米脆片 $48
等大家仲度緊食乜之際,先簡單嚟一客墨西哥粟米脆片俾大家試吓過過口癮,因為佢哋一家都無乜點試過墨西哥嘢。當中有4款醬汁配搭,小弟就揀咗牛油果醬,夠健康嘛!老實講,啲粟米片都喺現成貨,夠脆已OK,最緊要啲牛油果夠熟,做出嚟嘅醬已夠柔滑。
bowl墨西哥芝士夾餅 $88
啲墨西哥夾餅口味選擇多:手撕雞、香草菇菌、燒烤手撕豚肉、脆魚柳、煎牛柳條、軟殼蟹(+$6),又可以揀軟皮或脆皮,加上兩件平少少,就不如一次過嗌兩件,唯可惜喺無晒脆皮啫。
bowl燒烤手撕豚肉夾餅
啲豚肉堅喺手撕喎,未食都睇得出,而且,塞滿晒成件夾餅之內,一口咬落真喺爆晒餡架;入口啲肉好鬆化、又惹味,感覺猶如有份碳火香,配上牛油果醬、酸忌廉及蕃茄莎莎,令味道紛陳,越食越好味;而塊軟皮柔韌軟熟,豐富咗整體嘅咬口感。
bowl香草菇菌夾餅
表哥話呢個夾餅好似夾咗好多「薯條」咁,好搞笑,的確,同樣成份夾餅夾足餡料,加上牛油果醬、酸忌廉及蕃茄莎莎,絕無欺場。咬落,啲香菇爽爽哋得嚟又有咬口,不過,原來幾辣吓,呢樣就有啲意外,雖然多添份刺激感,個辣度我亦接受到,但個名改為香「辣」菇菌會貼切啲。
bowl蜜桃菠蘿梳打 $33
個墨西哥芝士夾餅無升級優惠,如想飲嘢,就只有散叫,小弟就點咗杯梳打,貪其夠爽夠涼快。個人嚟講,就有少少失望,因為啲梳打只喺以蜜桃及菠蘿糖漿溝上梳打水,一心仲諗住有啲菠蘿粒食吓,實在喺諗多咗。
bowl未來素食牛肉漢堡 $88+ $36(升級為套餐)
之前曾同老婆試過呢種「未來漢堡」,確的好有趣,所以,大力推介俾表嫂。上枱時佢已經覺得好震撼,因為都未試過啲咁巨型嘅漢堡包,而包內唔止得塊漢堡牛肉,仲墊有生菜、蕃茄、牛油果、芝士、炸洋蔥圈及特製醬汁,味道非常豐富。佢話最正喺件「未來漢堡」真喺好似食緊真牛肉咁,質感及味道都喺,非常有驚喜。此外,佢亦好喜歡條酸青瓜,酸香爽脆,可中和一下薯條及漢堡嘅濃味。
bowl洋甘菊(餐飲)
表嫂唔喜歡凍飲,亦唔多鍾意啲古靈精怪嘢,所以,介紹佢飲清香淡雅嘅洋甘菊,雖然喺以茶包沖泡,但都用上Twinings品牌,而且,有需要可叫侍應添加熱水續杯。而佢話,呢款茶清清哋,好啱佢飲。
bowl德州燒烤牛肉漢堡 $88+ $36(升級為套餐)
表姪女都未試過啲巨型漢堡,所以,佢見到咁多特別款式,都顯得頗雀躍,心大心細之下,結果佢揀咗「德州燒烤牛肉漢堡 」,因為餐牌有張大特寫,故此就揀咗佢。以成吋厚嘅漢堡牛肉,再配車打芝士、脆煙肉、炸洋蔥圈及塗上自家秘製燒烤醬,喺香噴噴濃郁肉味嘅配搭,由於個包真喺超巨,佢話喺食起嚟少少麻煩啲啫。
bowl鮮橙汁(餐飲)
佢終喺細路,阿媽都唔喺好俾佢飲埋啲古怪嘢,所以,乖乖哋要杯鮮橙汁。
bowl藍芝士牛肉漢堡 $88+ $66(升級為套餐)
至於表哥就更鍾意濃味食物,又接受到新嘢,所以,好快佢就揀啱款「藍芝士牛肉漢堡」,其實呢個跟「德州燒烤牛肉漢堡 」有啲似,主要喺改用藍芝士,令味道變得有啲唔同。表哥大讚啲牛肉好高質素,口感鬆化肉味濃,又富肉汁,而且,個包又烘過,面頭仲脆脆哋,包內更塗上牛油,少少細節位都做到足,就連薯條都炸得脆而不膩。
bowlBerry Love(餐飲)
佢就選較貴嘅升級組合,因為餐飲可以試到是日精選奶昔,而今日嘅奶昔喺「Berry Love」,以雜莓雪糕、木莓及牛奶打成,再唧上厚厚嘅忌廉,一身淡紫嘅奶昔,加上威化花花,賣相比較花俏。表哥就話質感好豐厚而柔滑,好足料,雖然莓味唔喺話超強,但有份清甜嘅感覺。
bowl香煎焦糖蘋果夾餅 $58
表姪女喺甜品黐,所以,甜品就由佢發辦揀邊款,佢就喺見餐牌張大特寫好吸引而揀咗呢款,而且,一客4件,啱啱好夠我哋「些牙」。但送到嚟嘅成品就覺得有啲唔一樣,佢有少少失望咁囉。不過,小弟就覺得唔錯,以夾餅嚟做,帶墨西哥風,夾餅少少脆口,啲蘋果亦幾清甜,但似乎就無加玉桂粉,而且,淋上多啲焦糖漿就更合小弟心水。
我同老表久唔久都會約食飯,所以,巨型漢堡亦非第一次食,相反,表嫂及表姪女就第一次試啲咁高質嘅漢堡,故充滿驚喜之餘,亦感到萬分滿足,表嫂更讚嘆「未來漢堡」喺神奇之作,如獲至寶。我同佢講,依家唔只有「牛肉」,仲有「豬肉」嘅出現添。

個人評分
味道:8/10
環境:8/10
服務:8/10
抵食:7/10
平均每人消費:HK$175

餐廳資料:
Texas Burger
旺角亞皆老街8號朗豪坊12樓1A號舖
3488 5005

沒有留言:

發佈留言