唐宮小聚 Social Place：宮力不減

呢餐家庭飯，既喺慶祝姨仔完晒個課程，可以甩難，又喺補祝我老婆嘅生日，而用餐地點，就由姨仔發辦，佢喺荃灣地膽。佢之前試過荃灣店嘅「唐宮小聚」，專登推介我哋一齊嚟試吓，仲問有無人試過，為免掃佢雅興就無特別出聲，其實，兩年多前曾同老婆光顧過中環店喇。

主打摩登中菜嘅「唐宮小聚」近幾年越做越出色，所以，呢晚星期日嚟到，門口已經有唔少人晌度等位，入到裡面，更可以用座無虛席嚟形容。

雖然枱櫈拍得有啲密，但因為樓底比一般餐廳高，未至於太侷促。而一室湖水藍襯白，拼上琥珀色雲石餐枱，加上柔和嘅暖黃色燈光，整體予人感覺摩登得嚟又親和。

而入門口位，擺放咗好多店家嘅招牌公仔點心，雖然都喺睇得唔食得，但都夠晒趣緻得意。

得意嘢唔止啲點心，枱上嘅餐碗都好搞嘢，一眼望落去啲碗惹晒蟻喎，哈哈哈，其實碗底嘅黑蟻喺假嘅，只喺畫上去，但就呃到唔少人架。

講到食物，呢度有唔少選擇，而且，改名都花過心思，全部食物都喺「四字詞」（飲品除外）。除有「金獎之選」及「必食之選」外，分類為小潤、小吃、小點、小炒、小菜、飯麵、小甜、口渴，全部都喺得兩個字，真喺唔易諗架。順帶一提，茶芥$8位，另收加一服務。

有機豆漿 $19

有黑豆豆漿或黃豆豆漿可揀，亦可以揀凍或熱，都喺同一個價。無論乜豆，豆味都好濃郁，就算要凍嘅，都唔會太冰，幾好飲。

松露香菇 $39

呢個喺店家嘅招牌嘢，造型絕對喺神似，就連底下嘅菇椗都做埋出嚟。入口包身鬆軟唔黏牙，內裡塞滿刴得幼細嘅菌粒，更加入黑松露醬，味道幽香，不愧招牌。

紫蓉豬豬 $19

呢個純粹貪得意叫俾個小朋友，因為豬豬個造型確喺好意得。以紫薯蓉做內餡，搓得好柔滑，味道亦算喺唔錯嘅，一客一件賣$19，氹吓細路仔都好。

麻辣燒賣 $39

一客4件嘅燒賣，外觀跟我哋平時晌酒樓食到嘅有少少分別，長身啲，而最大分別喺餡料棄豬肉而用上糯米，口感黏糯，麻辣味就幾搶吓。

蟹粉麻球 $79

一客有3球，唔講以為喺煎堆仔，因為圓卜卜，外層又沾滿黑白芝麻。咬開一口，其實裡面喺混有蟹粉嘅豬肉餡，雖然蟹粉嘅味道唔算好突出，但肉丸鬆化又富肉汁，感覺不俗喎。

脆蝦雲吞 $39

一客有3件，相中呢個喺兩份嚟，做得幾的骰，咬落極之脆口，又唔算好油，內裡嘅蝦肉亦非常爽彈，而且，有少少芝士絲。

自家雲吞 $39

食咗個炸嘅，又試試個湯嘅，樣貌同晌港式麵檔食嘅無乜分別，一客印象中好似6隻，隻隻都包得大隻餡多，餡料富鮮甜味，用料唔馬虎，雲吞皮又好滑。

白玉王鴿 $29.9 / 隻（限每人一隻堂食）

雖然喺特價賣咁平，不過，我哋都喺點兩隻嚟過吓口癮。每隻都炸得金黃，色澤均勻，皮脆肉嫩又唔油膩，卻充滿甘香，超抵食，不愧喺金獎之選。

炒蝦腸粉 $69

叫得炒蝦，就真喺堅有一隻隻鮮蝦，而唔喺我哋平時食蝦腸嗰啲搞嚟炒，只喺一般炒腸粉再加入鮮蝦仁。不過，蝦低好爽，又用上XO醬炒，微微辣，卻十分惹味。

秋葵淮山 $69

炒菜類就點咗一客秋葵淮山，做法簡單，都只喺清炒，但前者黏滑，後者有點爽脆，最緊要喺兩者都喺好有益嘅食材。

荷花蒸飯 $89

之前都曾經食過，覺得喺性格比高嘅蒸飯，所以，翻兜推介俾大家試吓。上枱時散發出點點荷香，而飯內有鮮蝦、火鴨、雞丁、瑤柱，非常豐富，加上飯粒鹹香軟熟，水準依然。

粉墨登場 $89

舅仔仲未夠飽，再追加多一道墨魚汁炒飯，飯粒雖然烏黑，但有光澤，入口飯粒分明軟綿，三約嚿八爪魚仔，爽口好食。

甜品拼盤 $59

最後，以一份甜品拼盤作結，任揀3款下，就揀咗椰汁紅豆、木糠奶凍及冰糖紫燕，3款甜點都以小樽盛載，的的骰骰。幾款嘅味道都唔錯，老婆喜歡椰汁紅豆，因為下層嘅紅豆軟糕好清甜，有紅豆香；我就最鍾意木糠奶凍，木糠其實喺奧利奧朱古力餅碎，奶凍做得柔滑富奶香。

時隔兩年有多再訪，兼喺唔同分店，但水準都無走樣，功力不減，而且，服務貼心，收費相宜，菜式又有特色，繼續喺值得翻兜之選。

個人評分
味道：8/10
環境：8/10
服務：8/10
抵食：8/10
平均每人消費：HK$160

餐廳資料：
唐宮小聚 Social Place
荃灣楊屋道1號荃新天地1期UG層43及81號舖
2808 0910