山區裡的走走趯趯: Cossi：si絲回味

2018年10月9日星期二

Cossi：si絲回味

不時都會嚟荃灣食飯，尤其晌荃灣廣場、荃新天地一帶，因為小弟家住美孚，又近西鐵，一個站5分鐘唔使就過到嚟荃灣西站，極之方便。今晚就同朋友嚟到大壩街頭嘅「Cossi」用餐，貪其位置方便，近排又風評不俗，甚有潛力嘅食店。

「Cossi」雖屬酒吧餐廳，但一啲都唔雜，嚟食飯嘅反而有少量家庭客。餐廳門面細細，其實內在環境狹長而深，下層近門口嘅喺用餐區，超高樓底及富情調氣氛喺賣點；入少少就設有酒吧區，嚟輕酌吓就啱晒。

而上層小閣樓就喺另一個用餐區，感覺無下層咁正，但就靜局啲，店員更話呢度有包場服務，細細哋包個上層都唔錯。講開服務，真喺值得一讚，店員知我哋啲主菜喺「些牙」嚟食，就問我哋想分開上定一齊上，家下好多餐廳都「求求其其」，有乜上乜無晒次序；此外，小弟意外打翻個醬油碟落地，呢啲情況，遇到店員黑面不時都有，但同一位店員除咗叫話等佢處理之外，仲反問我有無整污糟啲衫褲，所以，服務一環又點可以唔俾滿分吖。

打開餐牌，內頁第一版就有介紹店家名字「Cossi」嘅由來，原來喺源自意大利文，愚意追求愜意、夢想嘅生活態度，亦期望客人可以感受到生活中嘅情趣。

再繼續翻開餐牌，食物嘅選擇頗多，有前菜小食、特色頭盤、自家製安格斯漢堡、意大利松露系列、意大利麵、意大利飯、多國不同菜系嘅主菜、甜品……等等，一應俱全。

但凡點主食類，如漢堡、松露系列、意大利麵、意大利飯、主菜等，都可以加$38變成套餐，即喺多咗沙律、餐湯及基本餐飲。此外，更可加$20由是日餐湯升級為蘑菇湯或龍蝦湯，餐飲同樣可以加$20/$35轉為雞尾酒。

而最後幾頁，就喺一系列飲品，果汁、汽水、啡茶就基本架啦，既為酒吧，酒類飲品又點少得，啤酒、紅白餐酒、雞尾酒、無酒精雞尾酒同樣有供應。

蝦多士
突然間，送上一小客蝦多士，原來逢星期一至四（假期除外），惠顧晚市都會送廚師精美小食一份，是晚就喺香脆嘅蝦多士。面層喺用上自家打嘅蝦膠，感覺唔及用上一隻原蝦咁有睇頭，但味道唔錯，咬落亦爽口。

最後，我哋揀咗一客意大利飯及一客主菜，同樣加$38轉為套餐。見就算轉埋湯都唔算貴，索性加$20轉埋特色餐湯，欣賞佢哋喺一次過成套沙律、餐湯、麵包送上枱。

麵包（跟餐）

最別緻喺以一隻小竹木伐載住啲意大利香草包，更伴上自家調配嘅麵包醬，鹹香軟滑，但個人就覺得麵包稍為焗得乾咗少少。

沙律（跟餐）
簡簡單單嘅田園沙律淋上油醋，雖然無特別添加其他配料，但啲沙律菜入口新鮮爽脆，當然，如能加啲烤車厘茄或意大利蕃茄乾，就變得錦上添花啦！

黑松露蘑菇湯（跟餐）+$20

睇個名就知有幾堅啦，而確實，個湯睇表面已見有好多細微嘅蘑菌粒，未飲都聞到陣陣松露香，飲落菌味果然濃郁，質感柔滑。同埋，幾鍾意裝湯嘅小砵，好有一種天然感。

龍蝦湯（跟餐）+$20

橙紅色嘅色澤，睇落就好對辦，先試一口，雖然未喺一入口就嘩嘩聲，但啲蝦味頗為突出，口感同樣幼滑細膩，而且，湯內更混有少少蝦肉，絕無欺場。

烤南瓜、海鮮、芝士意大利飯 $128

咦，點解無烤南瓜嘅？撈勻成碟，飯底下有好多海鮮料，有大蝦、青口、魷魚圈，正所謂寶物沉歸底，而且，啲海鮮不俗，食得出有鮮甜味，喺新鮮貨而唔喺雪藏嘢；佢哋嘅意大利飯喺汁醬做得濃稠啲，飯粒濕潤且有咬口，飯心帶煙韌嘅口感，呢個時候，就知所謂「烤南瓜」晌邊，原來汁底喺南瓜汁，清甜而濃郁，與其喺咁，不如改為烤南瓜「汁」就仲貼切啦！