2018年10月21日星期日

樸生 Bobsang:一樸多食

早前睇過齣韓劇「一起吃飯吧3」,集集都講食韓國特色好嘢,仲要拍到好鬼滋味,搞到小弟都心癢癢想食番餐韓國菜。韓國菜其實都好多元化,今晚走到嚟「樸生」,就喺為咗一次過可以試到多啲嘢,因為,依家逢星期五至日及公眾假期,都轉咗做任飲任食形式。
咪睇個門面好似唔喺好大,其實,入到裡面個鋪位好長、好深,地方都頗大吓,加上樓底稍高,環境光猛企理,第一印象真喺幾唔錯。
雖然,門口有大大個廣告牌寫住「自助晚餐」、「韓式火鍋任飲任食」,原價$338,秋日試食價為$248 + 10%,但實際喺點玩法,真喺要介紹吓。
首先,坐落店員會有張「點餐紙」俾你,韓式炸雞喺任食,韓式火鍋亦喺任食,每兩個人可以揀一個鍋底:人蔘雞鍋或海鮮部隊鍋,而後者就更有4款湯底可揀;而每位客人仲有一款限定美食:芝士焗濟州元貝或迷你燜牛肋骨煲。此外,仲有堆追加食品、飲品、甜品,不過就需另付收費。個人就覺得都無需額外使呢啲錢,因為出面已擺放咗好多任食嘅食物。
餐具、紙巾、濕紙巾早已放晒晌枱上,唔使勞煩店員,自主方便。雖然好多嘢都喺自助,不過,其他服務都好唔錯,食物補充幾快手,啲店員亦好有禮,尤其門口接待嘅後生哥仔,主力招呼我哋嘅妹妹,真喺超有笑容、超有禮。
bowl韓式炸雞
雖然可以任點,但考慮到仲有好多嘢食,所以,店員提議先落單兩隻,因為,佢哋嘅炸雞真喺堅大隻,而且,都喺新鮮即叫即做。最驚喜喺啲炸雞伴醬,有成6款之多,而且甚具特色,仲另有6款配料添。
小弟就揀咗青檸牛油果醬及黑糖梅子醬,果然好有特色,前者口感綿滑,帶青檸嘅清香;後者就酸酸甜甜,而酸味感覺醇厚。啲炸雞亦好出色,新鮮熱辣夠脆口,卻喺唔油膩,啲肉又夠嫩喎。
bowl芝士焗濟州元貝
個人對客芝士焗元貝感覺一般,因為,個白汁底太厚身,沖淡晒啲芝士香味,還好嘅喺啲元貝幾爽口,不愧老遠過嚟嘅濟州貨。
bowl迷你燜牛肋骨煲
真喺好,迷你版本,試得到又唔會太飽。對比客元貝,件牛肋骨確喺正好多,燜到啲肉好鬆化,味道濃郁,就連底下嘅白蘿蔔、甘筍都入晒味。
bowl韓式火鍋鍋底
最正斗喺嗰兩款韓式火鍋鍋底,就晌門口擺咗實物你做參考,由於個雞鍋喺原整一隻雞,真喺怕得兩個人食完個雞鍋都再食唔到啲乜嘢,所以,就要個部隊鍋,仲要喺減碼,等我哋可以再試多啲其他嘢。
而枱上嘅電磁爐有晒使用指引,以控制火力,簡單易用,更重要喺,多加一句溫馨提示:「愛惜地球、不要浪費」!所以,我哋都食得好有節制,絕無浪費。
bowl海鮮部隊鍋
雖然減碼,但樣樣食材有啲,最後嘅份量都喺唔少,而我哋揀咗蝦汁芝士湯,所以,湯底呈奶白色,味道都唔錯,有啲鮮味,又有啲芝士香。咁叫得部隊鍋,就喺大堆頭啦,又蝦、又蜆、又餐肉……配公仔麵,喺奢華嘅「公仔麵」。
究竟出面有幾多嘢食,逐樣介紹吓先。餐廳中央,有張大枱,擺放咗好多生、熟嘅食物。醬料區,就正如平常酒樓啲任食火鍋咁,自己混醬自己搞,相信港人非常熟悉呢個玩法。
bowl特選牛肉
話就話幾款肉喺可以任點,但3款肉少試牛刀各點一客試試就夠。啲牛肉睇落唔喺話好似平時食涮涮鍋佈滿油花,但啲肉質都真喺唔差。
bowl雞柳
由於啲雞柳切成一片片,又唔太厚身,都較易控制灼熟所需時間。灼過之後,啲雞柳入口確喺幾嫩滑細緻。
bowl黑毛豬
啲豬肉用上腩位,而且,睇落又幾靚仔,色澤紅潤。而黑毛豬果然喺有質素,食落好有肉味及脂香。
bowl火鍋食材(蔬菜)
食完啲肉,就介紹吓出面任攞任食嘅食材。有好多蔬菜種類及公仔麵,其中一款仲喺少見嘅羽衣甘藍添。食完部隊鍋,再嚟「烚吓烚吓」之用。目測所見,啲蔬菜都幾新鮮,有光澤。
bowl火鍋食材(其他)
暫時跳一跳去另一邊,因為有一組大雪櫃,擺放多款丸類、香腸、蜆、餃子、魚柳……等等,同樣喺配合食部隊鍋嘅食材。就算樣樣只揀少少,都食到你飽上心口呀!
前前後後都食咗唔少肉,所以,我哋後段揀火鍋食物主要都喺食番多啲蔬菜,以平衡番餐飯嘅營養、纖維。
bowl熱食1
無論炸雞、部隊鍋、烚吓烚吓嘅食材都要時間等,如果想即時有嘢落肚都無問題,4款熱辣辣美食已一早就緒等你試,包括:關東煮、辣炒年糕、韓式果醬雞翼及港式嘅咖喱魚蛋豬皮,但講真,今次對呢幾樣嘢嘅興趣就唔大。
bowl熱食2
反而,隔離另外幾款熱食就有興趣啲,包括韓式海鮮煎餅、泡菜煎餅及天婦羅野菜。啲煎餅又真喺幾好食喎,天婦羅野菜亦唔差,至少唔油膩,不過,就無小弟心水嘅蕃薯同南瓜,其實唔知有無供應,不過,走過幾轉都唔覺有。
bowl中式老火湯
遷就番香港人口味,特設一鍋中式老火湯,唔喺咩特別湯水,似喺青紅蘿蔔粟米煲豬骨一類,味道都唔錯,都夠老火,但就覺得油咗啲啫。
bowl石鍋飯或韓式拌飯
大枱上最後一類美食,就喺石鍋飯或韓式拌飯,枱上有好多配料配個人喜好嚟配搭,如黑豆、菠菜、大豆芽、泡菜、韓式辣雞、韓式烤豬肉、韓式烤牛肉、海鮮雜綿……等等,全程自己動手搞,究竟想食石頭鍋飯定拌飯,在乎你揀個咩兜,前者就要揀個石鍋,再埋位以電磁爐加熱至飯焦效果。
雖然我都鍾意食石頭鍋飯,但一攞就一鍋,肯定食唔晒,盞嘥!故此,就拎咗一小兜配菜,當喺前菜咁食,過吓口癮都好吖。
bowl飲品區
有3款現成調好嘅特飲冰茶,食炸雞及火鍋,有啲涼快嘢入口的確幾爽,不過個人覺得有少許偏甜。而其中一款更加入真露,不過,酒精度唔高,大可放心飲。
但如果唔飲得凍飲,又想飲啲熱飲,點算好?齋飲熱水?小弟有計,就喺晌炸雞醬裡面,有一款柚子醬,試過根本就喺柚子蜜,自行加熱水成為一杯熱柚子蜜即可。
bowl甜品區
自詡為自助餐,又點少得供應甜品!甜品區正正設晌入門口附近,喺進入內堂嘅必經之路,款式唔算好多,但部份做得頗精緻。計有朱古力噴泉、多款樽仔甜品、棉花糖、芋圓、仙草……等等。
之前,一路都食得比較克制,無非都想臨尾試多幾樣甜點,一口氣拎咗芒果拿破崙、宇治金時蛋糕杯、石板街、椰奶黑糖仙草,因為同樣以小玻璃樽裝住,更顯的骰。味道亦比預期好,尤其芒果拿破崙、宇治金時蛋糕杯,都喺新派演繹,配搭出色。
最後,貪口爽,追加多一小份芋圓,配上椰奶及黑糖水,而芋圓、南瓜圓都煙煙韌韌,好有咬口。
有去開日本住溫泉旅館嘅朋友都知,例必「一泊兩食」,即喺一晚住宿就包埋晚上及早上兩餐,嚟到「樸生」,就「一樸多食」,食乜、食幾多都可以自由控制,唯獨喺無韓燒啫,否則,就滿足晒咁多個願望喇。

個人評分
味道:8/10
環境:8/10
服務:8/10
抵食:7/10
平均每人消費:HK$273

餐廳資料:
樸生 Bobsang
青衣青敬路33號青衣城1樓119B號舖
3105 9836

沒有留言:

發佈留言