2018年9月2日星期日

The Americano:回到味來

八、九十年代,有一套經典嘅科幻電影「回到未到」,一系列共3集,由米高霍斯主演,唔後生嘅朋友應該都知有幾經典。嗰時睇就覺得好天馬行空,就算十多、廿年前都無諗過啲智能電話可以發展成依家咁啦。就連食物都發展到加入高科技元素,講嘅喺「未來漢堡」,再唔喺芋頭扮魚、黃豆扮雞嘅層次。是日星期日,近近哋專登帶老婆過嚟「The Americano」見識吓呢種高科技漢堡「牛肉」。
由於小弟數年前錯到訪過,所以,對餐廳嘅環境唔陌生。雖然,餐廳外圍都喺工廈格,但踏入餐廳內就喺煥然不同嘅感覺。地方寬敞、環境闊落,予人空間感十足。以黑白為主色調,帶少少工業風,整體感覺都幾雅致。
餐廳尾喺3組卡位,遇着呢日咁好陽光,我哋又嚟得早,當然揀卡位啦,一來好坐,二來光線足,人都開朗啲,影啲相都靚啲。
事隔幾年,本餐牌靚仔咗好多,食物嘅種類亦多咗好多,就連海鮮拼盤、斧頭扒都有得賣。
此外,其他類別仲包括沙律、小食、多款特色漢堡、意大利飯、意大利麵、特色推介及甜品,選擇認真唔少。
當然,今次我哋嚟喺為着一試佢哋嘅「未來漢堡」,單賣$88一個,實在唔平架。再加$28可以升級為套餐,多咗汽水、薯條及廚師沙律。不過,呢個升級優惠就只限點未來漢堡,主餐牌上嘅所有菜式都唔可以享用;仲有,個升級喺只可以點汽水,唔可以轉其他嘢飲,補錢都唔得,好缺乏彈性。
而飲品就晌另一張小餐牌上,如咖啡、朱古力、果茶、奶昔……等等。
順便介紹埋個早午餐餐牌俾大家當參考,除漢堡、意大利麵,仲有啲全日早餐,唔包飲品,但可以加錢配送。咪以為叫早午餐就喺11:00am左右開始供應到晏晝,查實餐廳喺開12:00pm,我哋12:15pm到咗餐廳,見啲店員應該都未完全準備好晒添。
bowl洋甘菊柚香綠茶 $28、可樂(跟餐)
老婆嘅漢堡包餐只可以配可樂,所以,可樂就由小弟飲咗去,而佢就揀咗杯熱飲「洋甘菊柚香綠茶」。初時睇個名以為喺幾樣嘢溝出嚟,原來只喺一款茶包嘅口味,初段未出味,好淡口,飲到中段先似啲樣,洋甘菊陣味幾清雅,不過完全無乜柚香喎!
bowl未來漢堡 $88 + $28(升級為套餐)
上網翻睇吓啲資料,「未來漢堡」(Beyond Burger) 喺由美國食物科技公司「Beyond Meat」 研發,主要成份為豌豆蛋白,並特別加入紅菜頭汁及椰子油嚟營造真肉質感,喺全球首個以植物原料製成嘅漢堡扒。其實,好一段時間前已經由「Green Monday」,早前同老婆去「Green Common」食飯都有見過。老實講,件未來漢堡真喺有色香味,口感媲美真牛肉,唔講會當喺一件牛肉漢堡;而整個漢堡仲配有生菜、蕃茄、牛油果、芝士、炸薯圈(初時睇見仲以為喺炸洋蔥圈添),所以,食落唔會太膩,口感豐富,仲伴有一大條酸青瓜幫你再解吓膩添。此外,一小兜紅菜頭西芹沙律,清清爽爽,味道唔錯。
bowl瑞士拉可雷特芝士漢堡 $118
我就揀呢一款漢堡,從餐牌所知,由6安士煙燻牛肉、勃艮弟火腿、瑞士拉可雷特芝士、蘑菇、生菜、波本威士忌洋蔥蓉、蛋黃醬組成,拎上手真喺份量好足,非常墜手。中間嚿牛肉真喺成吋厚,有肉香,又富肉汁,而睇啲食材嘅陣容就知,一口咬落去幾咁惹味,味道極豐富,包身又夠晒鬆軟喎。只喺食完個包,餡料中提及嘅波本威士忌洋蔥蓉就唔多覺嘞。個漢堡仲配上炸薯條,熱辣香脆而唔油膩,但就無配酸青瓜條。
順帶一提,餐枱擺有一張支持環保嘅購買環保飲管單張,因為小弟無支付寶關係,就無支持呢個活動。但點可樂時我都有叫店員「走塑」架,罐裝可樂,唔需要飲管啦!
睇番以前嘅食評,最初呢度唔收加一,我亦見餐牌無提及需加一服務費,不過,今次再訪,就已改為需加一服務費。整體嚟講,環境唔錯,食物亦具質素,而個「未來漢堡」確喺幾令人以假亂真,頗有癲覆感。

個人評分
味道:8/10
環境:7/10
服務:7/10
抵食:8/10
平均每人消費:HK$145

餐廳資料:
The Americano
荔枝角長沙灣道883號億利工業中心1樓12室
3709 9626

沒有留言:

發佈留言