泰昌餅家 Tai Cheong Bakery：每況月下

早前晌飯聚中，送上少少心意作為生日賀禮，但友人好有心，趁中秋送上一盒月餅作回禮，實在太客氣喇。月餅禮盒出自「泰昌餅家」，以紫色加暗花，襯上粉藍，再配以金線嘅圓月，印上「盈月」二字，簡單，卻有種雅致，送禮而言，確喺幾好睇。

反轉盒底都唔見印住喺咩月餅，但打開就見都喺咩口味嘅月餅，內附有一張以牛油紙製作嘅標籤，名為「四式迷你月餅」，並詳列各月餅嘅成份及其他資料，但有別傳統嘅蓮蓉或奶皇餡，都喺以該口味嘅食料做成內餡。

「四式」包括迷你黑芝麻流沙月餅、迷你榴槤芝士月餅、迷你甜蜜紅豆月餅及迷你紫薯月餅。每款只得1個，全以獨立包裝處理，包裝袋更印上月餅口味及食用日期。

迷你黑芝麻流沙月餅

最易認嘅一款口味，成個都喺「黑媽媽」，由於餅皮及內餡都喺黑色，所以，都唔喺好睇得出餅皮薄唔薄，雖然頗有芝麻香，但口感比較實淨，兼無預期嘅流心。

迷你榴槤芝士月餅

睇成份招紙時，發覺呢款口味有超多化學成份，感覺唔多好。口感唔似奶皇嗰種奶滑，味道方面，榴槤及芝士味都淡薄，尤其榴槤味，唔講真喺完全唔覺，較為失色。

迷你甜蜜紅豆月餅

4款月餅中，就以呢個紅豆月餅最正路、紅豆味最清甜，除以豆沙做餡之外，仲有粒粒紅豆混在其中，只喺豆沙餡未及柔滑，皮亦有啲厚。

迷你紫薯月餅

紫薯產品近年大熱，以紫薯做月餅印象中亦非首次試，之但喺，「泰昌」嘅出品真喺麻麻哋，餅皮及紫薯餡都太乾，感覺唔到紫薯蓉應有嘅「新鮮」感，就好似擺咗好耐被風乾咁。

雖然有肥彭撐佢啲蛋撻，其實我都覺得麻麻，而今次啲月餅產品，算喺今年試到嘅最普通、水準最低。感覺自從「泰昌」被「稻香」收購之後，只顧不斷開分店，相反，食品嘅質素就有跌無升嘅感覺，認真每況愈下。

個人評分
味道：4 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
泰昌餅家 Tai Cheong Bakery
九龍灣偉業街33號德福廣場一期P24-25號舖
8300 8303