2018年9月4日星期二

CHOO CHOO:西日聯乘

表姨甥女將會開畫展,雖然並非個人畫展,而喺聯合畫展,但對佢嚟講都喺一件大事。所以,專誠走過嚟同佢食餐飯,幫佢打打氣,壯壯膽,希望佢嘅畫展成功。兩年幾前曾同佢嚟過「Choo Choo」食飯,一來近佢,二來佢覺得呢度做菜有水準,所以,今次喺屬於舊地重遊。
入夜之後嚟到順寧道、保安道一帶就會幾靜吓,不過,就算今晚喺閒日嘅星期二,踏入「Choo Choo」原來喺好熱鬧。店內地方唔大,但一室坐滿客。
環境模樣無太大變化,依然喺以蒸汽火車為主題,兩旁嘅電視屏幕營造出窗外嘅風景,「車窗」更架設幕簾、行李架,甚至大件、細件行李在其上,夠晒似模似樣。
每張櫈下加置咗一個籐籃,方便客人擺手袋、背囊,印象中初初嚟喺好似無嘅。
跟旅遊相關嘅裝修又豈止於樓下,到餐廳尾,拾級而上到二樓洗手間,沿路可發現唔少主題擺設,非常有趣。
平時話啲餐牌設計精美、圖文並茂已經好好,但店主晌餐牌上就好有心思,設計成一本旅遊圖冊,極有趣味。店員仲講話本本都有啲唔同,喺喎,我同表姨甥女所揸嘅兩本,部份牌頁確喺有啲唔同喎。
先睇睇午餐,單睇菜式名字及食材配搭,都喺啲高質素嘅菜式,定價為$78-$98,奉送餐飲一杯,並有其他加配或轉配優惠。不過,店員就略略一提,午餐稍後會轉餐牌,都唔緊要,攞個概念大概知價格喺點。
而繼續睇睇內頁,啲分類都好有心思:Catch of the Day、Group Tour、From the Sea、Grab Up for the Long Trip、Long Traveller from the Land、Sweet Memories……,唔會好似一般餐廳咁餐湯、沙律、頭盤、主菜呀嚟分類,感覺趣味多咗。
近尾就喺幾版飲品,熱茶、咖啡、特色果汁……等等,更有埋多種酒類飲品供應。熱茶一欄,我更見表姨甥女本餐牌喺黐埋相關茶包嘅招紙牌,顯得特別得意。
除此之外,佢哋晚市一向唔做套餐,但原來最近加推咗一款試菜套餐,6道菜,包餐飲,定價$388位,需兩位起計。據店員介紹,話大廚剛去完西班牙,所以,就想出呢個西班牙菜跟日本菜聯乘嘅套餐,由於新出仲喺晌試探客人反應階段,故此,仍有啲微調(真喺要微調,因為「試菜」一詞意外地打錯字)。
bowlToast w/ Cherry Tomato
晌微調之下,套餐再加多一款前菜烘多士,店員話麵包都喺自家即日新鮮製,做得外脆內軟。而食法唔介紹都唔知,喺西班牙一種普遍食法,將車厘茄搽晌多士之上,再塗一層自家製嘅香草牛油。第二塊小弟就索性唧出茄肉,再塗牛油,因車厘茄頂已鎅咗十字,一唧就唧出茄肉,咁食令茄香及牛油味更突出,再者,牛油內更混有少少乾蕃茄,更提味,更好食。
bowl36-Mth Iberico Ham + Greenhouse Honeydew Melon
巴馬火腿配哈蜜瓜食得多,今回喺以西班牙伊比利亞黑毛豬火腿配上日本溫室蜜瓜,配搭已採用高質素食材。唔單止啲火腿睇落已喺油潤閃亮,加上少少花苗,添加啲田園氣息,更令賣相非常吸晴,就連後面嘅泡沫亦唔喺可有可無,而喺分子料理做成嘅蜜糖泡沫,真正睇得又食得。但講到啲蜜瓜,超清甜,配上黑毛豬火腿,跟其鹹香拼湊出一份和諧感。此外,火腿上仲放有少少蜜餞李仔肉(我同表姨甥女食落都認為喺),感覺幾得意。
bowlAmaebi Tartar w/ Rice Cracker
再上一道前菜,較有西班牙小食風,做得頗精緻。以日本甜蝦切成細細件,但又未喺刴成他他咁,保持咬口感,而口感黏柔有蝦鮮甜味;配上鹹鮮嘅三文魚籽、油潤嘅乾蕃茄,拼上自家製嘅米餅,薄脆又有點米香,夾埋一齊成件事都好有新鮮感,而且,味道富層次,很有心思嘅組合。
bowlStrawberry Gazpacho
幾道前菜後嚟一款湯品,西班牙有咩特色湯品,咪就喺凍湯囉。有別傳統,唔喺以蕃茄入饌,改用咗士多啤梨,兼且非一般賣相,以清酒酒樽盛載登場,更加入乾冰、食用花嚟營做出意境,感覺一流。而士多啤梨凍湯,晌近期嘅灼熱日子,入口就更喺涼透心,酸酸甜甜,正好清清味蕾,去迎接接落嚟較濃味嘅主菜。
bowlUnagi Kabayaki Paella, Allooli
西班牙海鮮飯近年食咗唔少,不過,加入日菜元素嘅又會喺點呢?因為唔喺以海鮮為主打,只用上蒲燒鰻魚,所以,店員都強調少少呢個喺西班牙飯,再加上日本枝豆、煙肉及香蒜蛋黃醬,不過,就有別於以小煎鑊做盛器。個飯好惹味吓,由於用咗鰻魚及煙肉,比較油香感,飯粒分明又爽身,有幾分食臘味飯嘅感覺。只喺,我哋同時都覺得喺油膩咗少少。
bowl100% Iberico Pork Ribs, Smoked BBQ Plum Sauce w/ SaGe Sweet Potato Mash
第二道主菜喺伊比利亞黑毛豬肋排,晌主餐牌都有呢道菜式,不過,單睇名字就似乎喺升級版,採用全橡果級別嘅黑毛豬,又加入日本梅子去處理個汁。
對比起之前嘅菜式,賣相就顯得實而不華,雖然只有兩支肋排,但做出嚟嘅效果鬆化到不得了,寧舍富肉香;個醬汁味道亦好特別,既有煙燻味,又有少少梅子嘅酸香;至於啲甜薯蓉,日本貨即喺日本貨,粉甜得嚟極有薯味,而且,口感食得出大廚並無搓到太蓉,保留咗少少薯粒嘅口感。
bowlWinter Wish
嚟到甜品,初頭睇菜單個名真喺有啲複雜,事後店員話其實佢喺有個名字:「Winter Wish」,雖然有排都未到冬天,但一身雪白嘅造型,吸晴嘅賣相,都想冬天早日來臨,驅走炎夏嘅悶熱。
由上而下分別喺做成蜂巢嘅白朱古力,無一般白朱古力嘅死甜;中層喺乳酪味雪糕,軟滑而帶陣陣乳酪嘅酸爽,予人感覺好清新;下層喺白朱古力慕絲,超幼滑,最驚喜喺底下仲做咗一層熱情果果蓉,又有少少脆脆,令整道甜品更富層次感,喺好手工嘅一道甜點。碟邊仲灑咗少少分子料理做成嘅乾乳酪粒,煙煙韌韌咁,但就比較黏牙。
bowlLatte、Cappuccino
我同呢個表姨甥女都喺咖啡迷,就算嚟到夜晚都唔怕飲咖啡,最緊要啲咖啡質素好。「Choo Choo」嘅咖啡上次都已經飲過,知道喺高水準,所以,今之襯道甜點,就一定點番杯至愛嘅鮮奶咖啡。雖然拉花未喺十全十美,但沖調嘅手勢確喺唔錯,無需要加糖,入口平衡順滑,濃縮咖啡跟奶泡都融和均勻。
晚事隔兩年半多再訪「Choo Choo」,水準唔單止無跌,仲加入咗新元素,而且,無論食材用料、配搭概念、烹調手法都喺高水準。此外,服務貼心,環境又有特別,真喺無怪乎佢個位咁吊腳,都坐過滿堂紅,正如上次食文嘅總結,只要做到質素,自然好有競爭力。

個人評分
味道:8/10
環境:8/10
服務:8/10
抵食:8/10
平均每人消費:HK$430

餐廳資料:
CHOO CHOO
長沙灣順寧道364-368號昌暉大廈地下1號舖
3707 1034

沒有留言:

發佈留言