而全開放式廚房，睇到蠔王開蠔，亦睇到大廚做菜，做菜時嘅香氣不時四散吸引食客。
此外，環境中最特別之處，喺牆上掛咗唔少上環晌五、六十年代嘅黑白相，讓整間餐廳，更添幾分舊懷氣息。
嚟到主要嘅目的就梗喺食蠔，一入門口就見蠔王正在開蠔，而據介紹，每晚都會推出幾款生蠔，貴精不貴多，全部法國貨。而有咩款式，就會寫晒晌白板試，每款都喺賣$55隻，法國蠔嚟講，應該都喺抵食。
法國生蠔 @$55
3款生蠔都想試試，由碟邊嘅檸檬角逆時針起計，由淡至濃分別喺Poesie、Mauger及Majestic，雖然對生蠔嘅大家族唔算認識好深，但食過嘅總會對佢個名有啲印象，呢3款就反而真喺第一次接觸。嚟之前都專登上網睇睇阿John嘅資料，佢已有30多年開蠔經驗，手勢流暢熟練，可以講喺手藝非凡，而且，佢開蠔有佢獨門技術，手法乾淨利落之外，更會切斷帶子位，再將蠔肉反轉奉客，目的原來喺順帶檢查一下蠔殼內壁嘅一個污水泡，雖然有嘅機會可能只有1%，卻喺細心嘅表現，又令小弟長知識。
Poesie
呢隻蠔大有來頭架，喺奪得法國農業部金獎嘅產品，外觀肥美飽滿，蠔肉帶點爽脆，海水味唔會太濃，但回甘強。
Mauger
呢款嘅味道層次比較豐富，同樣，入口嘅海水味唔會過濃，但似喺有股香氣，慢慢滲出鮮甜味，其實我都唔太肯定，但感覺確喺有少少獨特。
Majestic
相對地，3款蠔就以呢款蠔味較濃，帶鮮甜味，回甘亦強，餘韻持久。雖然伴有紅酒醋及雞尾酒醬，但小弟都喺鍾意唧少少檸汁就最好。
而主餐牌好簡單，一版A4紙就印晒出嚟，分前菜、主菜及意大利麵，以及是日甜品，單睇菜式嘅名稱，就知同樣喺貴精不貴多。順帶一提，呢度喺無免費水供應，飲礦泉水收$40位，而梳打水就$50位。
前菜一共有8款，有蠔湯、沙律、墨西哥餡餅、西班牙火腿，較多元化。店員話嚟咗批新鮮法國青口，值得一試。
法國青口 $188
咪睇啲法國青口細細粒，其實，佢哋嘅味道好鮮甜，肉質口感比較柔嫩，無一般食其他青口咁又韌又膠，而且，青口內唔會纏住啲雜草之類嘢，不愧為法國貨。而且，以洋蔥、煙肉加白汁爆香晒，非常好食，喜歡嘅話，更可以另加$32配薯條或蒜蓉多士，因為剩低嘅白汁伴多士相信都好正。唔覺唔覺，一份嘅青口估計都上百隻，因為好似食極都有，但就幾花時間吓。
主菜及意大利麵方面，共有10款選擇，5款主菜、5款意大利麵，而主菜主要喺啲扒類，睇落且喺高質素嘅扒類，但單睇定價又唔算貴喎。
伊比利亞西班牙黑毛豬架 $208
餐牌標示為11安士，送到上枱，果然份量十足，而且，連骨嘅豬架，煎得金黃，十分有睇頭，配上蒜片、一串露絲瑪莉，令賣相更好睇。碟上仲放有玉桂蘋果粒伴豬架食，而茄醬就梗喺用嚟點薯角啦。
件豬架落刀嗰吓都幾軟腍，入口肉質唔似得肉眼、西冷嗰種軟腍，相反咬落有少少爽口感，且富肉汁；旁邊有一抹芥辣，但小弟就鍾意以玉桂蘋果粒伴食，感覺更清爽，但喺，如果做成蘋果蓉就更方便。而薯菜除有薯角，仲有車厘茄及菠菜葉，樣樣都處理過，非常好食。
是日甜品 $58
甜點，餐牌中只有一項是日甜品，相信喺滿足吓少部份客想餐後嚟一點甜。是夜嘅甜品喺「提拉米蘇」，賣相有點點似個小盆栽。滔起一匙羹，就知喺以手指餅做，有微微咖啡酒香，馬卡風芝士亦打得幼滑，帶淡淡芝士香。個人嚟講，喺嫌手指餅浸咖啡酒唔夠透，整體質素屬中等。
無論生蠔、前菜、抑或份豬架，食材用料本身都極高質素，烹調嘅手勢相當出色。服務方面亦好貼心，好似我哋點咗青口，由於殼多，侍應都主動幫我哋換咗兩次碟。喜歡食蠔嘅朋友，「八蠔吧」絕對滿足到你！
個人評分
味道：9/10
環境：8/10
服務：9/10
抵食：8/10
平均每人消費：HK$475
味道：9/10
環境：8/10
服務：9/10
抵食：8/10
平均每人消費：HK$475
餐廳資料：
八蠔吧 Raw Bar No.8
上環樂古道2號地舖
6202 2032
八蠔吧 Raw Bar No.8
上環樂古道2號地舖
6202 2032
沒有留言:
發佈留言