First Step Coffee：一步到胃

正所謂萬事起頭難，萬丈高樓都要從地起啦，所以，做咩都要有第一步。無第一步，你又唔知行得啱唔啱，最討厭嗰啲齋講唔郁嘅人，而小弟就應該屬於行動型。所以，今日晏晝就嚟到太子嘅「First Step Coffee」，同夏總及佢老婆一齊食晏，唔好講咗幾星期都唔行動。

餐廳位處砵蘭街一間精品酒店樓上，無專用樓梯，要乘搭酒店電梯，而酒店本身都唔起眼，酒店門口亦只棟咗一個大餐牌以表示餐廳嘅存在。

走入餐廳內，由「First Step Coffee」、「蘇媽廚房」、「家家士多」……等等所組成嘅共同社，唔單有社企嘅影子，更有種砵蘭街貼地嘅感覺，完全唔覺得自己走入一家酒店餐廳，所以，感覺輕省隨意。

由於喺以一同共用嘅空間形式，所以，感覺幾特別。裝修簡約，無太多花巧嘅裝飾，但地方大，擺嘅枱櫈唔多，樓底又高，另一邊更有個活動空間，故此空間感十足。

收銀櫃枱上嘅大黑板寫齊有咩食物選擇，當然，唔想「頭岳岳」，攞份餐牌埋位慢慢睇。基本上，4張餐牌就顯示晒有咩食物，包括：沙律、小食、主菜、甜品及多種飲品。

此外，收銀旁仲掛咗塊黑板，寫上每日供應嘅特色菜，有沙律、意粉，甚至羊架，附送熱茶，或有加配咖啡優惠。

正如時下好多文青咖啡店，採取自助模式，自己動手拎餐具，而用餐後就自己收拾。最大好處就喺唔收加一嘛，哈哈！餐具旁仲有少少調味料，供客人自行稍作調味。

基於環保理念，晌枱上你會見到「走飲管」嘅訊息，所以，等陣你會見到杯飲品喺以鋼飲管奉客。更甚嘅，佢哋更有埋鋼飲管作零售，希望客人為環保踏出第一步。同時，仲見到店家提供由植物做嘅Oatly「燕麥奶」，喺Pacific Coffee飲過一次以燕麥奶沖調嘅咖啡，味道上都OK架。

講開咖啡，除一般嘅意式咖啡，佢哋仲有單品手沖咖啡供應，是日所見就有嚟自埃塞俄比亞、印尼、肯亞及哥斯達黎加共4款豆。雖然小弟都喜歡咖啡，但情有獨鍾於鮮奶咖啡，仲未有功力識欣賞手沖咖啡，因為喺一門唔易嘅學問。

落好單之後，之會俾個訊號機過你，聽到響聲表示菜式已做好，不過，都仍然要你親自埋櫃枱取。

牛油果羽衣甘藍沙律 $68

近年多咗好多羽衣甘藍嘅蹤影，尤其做沙律，更喺近年新興。以為就咁牛油果加羽衣甘藍，原來仲加入好多食材，如：青瓜、車厘茄、火龍果、櫻桃蘿蔔，非常豐富，並淋上油醋作調味。牛油果熟得啱啱好，軟腍卻喺無暗啞瘀黑位，而羽衣甘藍爽脆到嗦嗦聲。

滑蛋煙三文魚手製貝高包 $68

以小木盆盛載登場，極有田園氣息，貝高包鋪滿黑白芝蔴，烘得脆口富芝麻香，但咬落口感帶煙韌，喺貝高包嘅特色；以生菜墊墊底，唔會讓啲蛋汁整腍個包底，而啲炒蛋十分滑溜，仲帶有少少蛋汁，配合埋煙三文魚嘅鹹味，令整體嘅味道啱啱好。伴碟有大量火箭菜及紅提子，已淋上柚子醋，味道不俗。

牛肝菌大啡菇扁意粉 $85

咪睇佢哋嘅廚房細細，做起菜嚟都有辦有眼，呢道扁意粉做得確喺有水準。因為啲扁意粉柔韌而甚咬口，每炷意粉都沾滿忌廉汁，汁底亦帶微微芝士香；意粉內混有好多牛肝菌，睇都睇得見，而且，挺有菌香，加埋一大隻多汁嘅大啡菇，都無甚挑剔位嘞。

柚子焗珍寶雞脾飯 $78

友人都算算哋喺「飯桶」，呢個雞脾飯就啱佢，話晒雞脾打人口骹軟，夏總成人車埋我去球場，點都要益吓佢嘅。唔喺講笑，隻雞脾果然好珍寶，而肉質都算軟腍，因為老友三兩吓手勢就輕易拆晒肉，方便大家食用，不過，味道方面就唔喺太夠柚子味，欠缺咗個性；飯嘅豉油汁底亦較淡口，未知喺咪因為店家都喺主素有關？！

Latte +$15

因為臨尾都會試試呢度嘅招牌甜品，加上睇店名，以至餐牌，真喺無乜理由唔試佢哋嘅咖啡囉，心水就喺我喜歡嘅拿鐵。茶杯好別緻，以小木盆及木匙配襯，甚文青；簡單嘅心形拉花，但花紋細緻，圖案亦好對稱，口感均勻，每口都同樣細膩，帶出咖啡嘅醇香。

Hazelnut Mocha +$15

友人就試試杯榛子味朱古力咖啡，同樣都做出紋理細緻嘅拉花，比較似喺想拉一朶花。據友人分享，話杯味朱古力咖啡真喺好唔錯，榛子嘅香味、朱古力嘅濃郁及咖啡嘅醇香，三者都平衡，唔會話單獨邊一方太搶。

Pineapple Ade $48

簡單嚟講，可以講喺菠蘿梳打，睇落就好似無乜特別，賣點喺以新鮮菠蘿打蓉整成，入口幾清爽嘅，唯一大問題喺支鋼飲管喺幼管，啲菠蘿蓉會塞住條管。事後同店主傾開，原來佢哋都知個問題，亦訂咗啲粗管，只喺未有貨。

蘋果UFO $78

事前睇人家嘅食評已見到呢個「UFO」，賣相吸引，亦頗有特色，以酥皮作為底層，先鋪上薄薄嘅蘋果片，一塊疊一塊已經令造型好有飛碟感，再晌面面放上原個蘋果，焗得金黃而帶點焦燶。酥皮底好脆口，富牛油香，而蘋果暖暖哋，焗過後令果肉收番少少水，顯得特別清甜。

上文都提過吓，共同社裡面仲有家「家家士多」，就順便略略介紹吓，同樣喺家社企，主力推動良心消費及合作運動。近咖啡店一邊有組大貨架，售賣唔少本土農產品、公平貿易產品，以及跟韓國最大嘅消費者合作社iCOOP KOERA結成夥伴，引入公平、有機、優質嘅日常食用品。

晌公共活動空間嗰邊有另一組大貨架，有好多本土嘅手工護膚品出售。依家較多人認識社企，及明白佢哋唔喺單純一家商店，希望有更多大眾人士支持。

環境輕鬆，上菜一道接一道慢慢上，不急不緩，嘆住咖啡，食住件蘋果酥，唔經唔覺坐咗差唔多兩個鐘咁滯。雖然，服務「自決」，但店主不時跟客人交流吓食物質素，亦都好耐心咁聽，我哋都從客人角度表達一下愚見，一家餐廳懂得咁做，已經喺走出好嘅一步。特別一提，星期日嘅營業時間喺12:00pm-6:00pm，晚市只會做預訂客！

個人評分
味道：8/10
環境：7/10
服務：8/10
抵食：8/10
平均每人消費：HK$152

餐廳資料：
First Step Coffee
太子砵蘭街372號儷凱酒店1樓
9888 3608