柏景餅店 Park Deli：不說慌嘅雪芳蛋糕

細細個時都算喺物質匱乏嘅年代，食得最多嘅一喺光酥餅，一喺雞蛋糕，後來，識咩叫做「雪芳蛋糕」，都喺屋企人晌超市買番嚟嘅「嘉頓」雪芳蛋糕，仲不時當早餐添。不過，講開雪芳蛋糕（Chiffon Cake）就聯想起啲爛笑話，咩蛋糕喺最假，咪就喺雪芳（說慌）蛋糕；咩蛋糕一定喺最肥，咪就喺芝芳（脂肪）蛋糕，因為有譯Chiffon Cake為「芝芳蛋糕」，而Park Deli亦有推出數款雪芳蛋糕。

佢哋嘅雪芳蛋糕有件裝，亦有個裝，不過，如打算買個裝嘅話，就記得穩陣啲預訂，佢哋啲個裝蛋糕比較少有現貨。

士多啤梨雪芳蛋糕 $248

每款雪芳蛋糕都有分1磅（$248）或2磅（$480）份量，唔同餐廳做嘅雪芳蛋糕都好唔同，不過，主要都喺以質感鬆軟、輕綿、有回彈力為賣點，其實，就即喺我哋平時講嘅海綿蛋糕，小弟都有做餅架，咪睇少海綿蛋糕咁基礎，易學難精。而Park Deli呢一個士多啤梨雪芳蛋糕雖然賣相簡單，蛋糕面單單鋪上大量原粒士多啤梨而已，但入口就知水準甚高。

切開一睇，3層海綿蛋糕厚薄平均，而且，鋪出嚟整個蛋糕又唔會邊厚邊薄，夾晌中間又喺大量士多啤梨果肉，忌廉則唔會過多而感到肥膩，份量恰好，食到軟滑嘅忌廉卻完全無肥膩感，予人感覺更健康；至於海綿蛋糕確然鬆軟，口感輕盈，加上大量清甜嘅士多啤梨果肉，讓人有個甜美記憶。

順帶一提，近年大熱嘅「戚風蛋糕」其實都喺同屬一類，大多數會由台灣店引用，同樣喺音譯，不過，由於海綿蛋糕食起嚟好似一陣風咁輕綿，所以，借用埋個意譯，改為「戚風」感覺聽起嚟就更高檔。

個人評分
味道：8/10
環境：7/10
服務：8/10
抵食：7/10
平均每人消費：HK$42

餐廳資料：
柏景餅店 Park Deli
尖沙咀廣東道33號中港城皇家太平洋酒店園景翼2樓
2738 2382