2018年7月17日星期二

炑八韓烤 MeokBang Korean BBQ & BAR:賞心悅炑

雖然近來不時食韓國嘢,但韓燒似乎好耐無食喇,立時有少少癮起嘅感覺,於是約埋親友食番餐。地點由我決定,為咗唔好令佢哋失望,梗喺搵間食過知質素嘅穩陣啲啦,加上就大家方便往返,最好喺尖沙咀區嘞,結果,就揀咗太興廣場嘅「炑八韓烤」,翻查番,原來小弟對上一次幫襯「炑八」已經喺3年前嘅事,唔睇又唔覺添。
餐廳佔二樓整層,雖然無刻意走個圈,但從門口往內一望,地方頗大,枱與枱之間都幾有距離感,感覺闊落,有4人圓枱,亦有2人、4人卡位,更有可組合成嘅大長枱,人多人少嚟都可以圍爐共聚。而抽油煙喺採用上抽式,效果還算不俗,至少食完都唔會覺得一頭「煙」周身燒烤味。
bowl醃蘿蔔、韓式泡菜、大豆芽、薯仔(免費)
食韓國嘢一大特色就喺前菜,餐都未點店員就先送上4款前菜,等你邊食邊諗吓叫咩烤肉。幾款前菜都各有個性,做得好食,而蘿蔔片最得小弟歡心,因為以酸醋醃漬,清爽酸香,除淨食,更可以用嚟夾烤肉,平衡一下油膩最好不過;泡菜亦都出色,爽脆,辣度輕盈,啱我唔食太辣嘅客人。最正嘅喺,所有前菜都歡迎無限添加,實在大方。
bowl香橙西柚油醋沙律(免費)
「炑八」嘅另一特別就喺有免費沙律,唔喺一碟仔,而喺一大碗呀,慷慨萬分,其實,就算你話已計入成本在內,讓客人都感覺好好多。沙律菜好爽脆,香橙及西柚味道酸香,真喺好適合夏天享用。唯挑剔位喺落醋太多,有啲嗆喉嘅感覺。
揭開餐牌,選擇非常之多,為方便客人選擇,已經分門別類顯示清楚,由牛肉、韓牛拼盤、豬肉、雞肉、海鮮,到野菜籃,有圖有價錢,清晰不過。
此外,其他韓食,如醬油蟹、韓式煎餅、炸雞、湯類、飯類、麵類……等等,亦一應俱全,唔使怕淨喺得烤肉咁寡。
最後兩版喺甜品、飲品及酒水類,雖然,韓國餐廳一般都會擺支大凍水晌枱客人自斟自飲,但食韓燒,就如食BBQ,點可以唔飲啲汽水或梳打嚟解吓熱氣呀!
bowl魔法梳打 $36
有咩魔法?其實喺蝶荳花梳打,當倒入附上嘅檸檬汁,就會由藍色漸漸變為如魔幻般嘅紫色,煞是好睇。蝶荳花本身喺無乜味,故見杯內仲有數片檸檬,整體飲落冰涼清爽。
bowl菠蘿梳打 $36
食住韓燒點可以唔飲住啲冰凍嘢飲點得,多款梳打中,小弟較鍾情菠蘿多啲啫。其實喺梳打水加入菠蘿糖漿同罐頭菠蘿粒嘅成品,唔會抱有過多期望,都喺但求一刻涼快就已足夠。
正值炎夏,店家乘勢推出咗新嘅套餐,亦喺店員嘅極力推介。揀咗「夏日奇幻燒烤套餐」,賣$588,包咗6款肉類及海鮮,仲有一客冷麵,話就話二人餐,但加埋啲前菜、沙律,之後,再叫多客甜品,3個人食都無問題。
正所謂工欲善其事,必先利其器,所以,晌枱上就會搵到即棄圍裙,最有心思喺裝住圍裙個袋,原來喺俾人袋手機,同晚可以避免衣衫及手機被濺到油污。
此外,鋼鉗、鉸剪、海鹽、大醬(辣豆瓣醬)、生菜……等韓燒開餐必需品,亦都一一備妥。
bowl爐邊蛋 / 芝士粟米
晌食前菜、沙律期間,店員已靜悄悄為我哋預備好爐邊烤泡菜蛋及芝士粟米,睇見都好吸引,其實,呢兩樣都唔喺咩新鮮事喇,不過,依然覺得好食。前者,烤蛋啱啱好,口感軟綿綿,底部有啲焦脆,蛋香中有啲泡菜味;後者,待芝士溶得七七八八就可以食,芝士拉出一絲絲嘅效果,而粟米又清甜。
喺時候講番啲烤肉嘞,一整份燒烤拼盤以長木盒呈上,仲放少少乾冰晌一角營造霧幻,實在好有效果。而拼盤包括厚切五花腩、春川辣雞肉、霜降牛小排、厚切牛舌、大蝦及紅魚扒,肉類嘅色澤紅潤,海鮮就有光澤,極度吸引。
bowl厚切五花腩
「厚切」唔喺浪得虛名,件五花腩成吋厚,又長又大件,由於喺豬肉,需要燒熟啲,所以,燒嘅時間梗要耐啲。一路燒,就散發陣陣油香。淨食就一定要叫番句膽固醇萬歲,始終有超過一半喺脂肪,但確喺油香四射。所以,跟手就搵啲生菜、大豆芽、泡菜,加點大醬包住食,感覺無咁膩之外,味道嘅層次又豐富啲。
bowl春川辣雞肉
五花腩就食其原汁原味,呢道春川辣雞肉就經辣粉醃過,而且,醃得入味,燒過後,就仲更加惹味,肉質亦都嫩滑。唯落鹽重手咗少少,味道有啲偏鹹,所以,更加需要搵啲生菜包住食嚟「溝淡」番少許。
bowl霜降牛小排
「霜降」真喺無花無假,睇睇外觀,啲牛小排嘅油花多而平均分佈,由於薄薄一片,輕輕辣兩辣兩面就得,入口充滿油香,卻又唔喺好油膩咋喎,口感鬆軟到不得了,極具質素嘅牛小排。
bowl厚切牛舌
佢哋叫得厚切,認真無欺場,繼件五花腩,呢件牛舌厚到成件扒咁。再者,小弟就喜歡牛舌喺厚切,因為較有咬口,薄切就變得另一番風味。燒過嘅牛舌再剪開細件,一口一件,沾丁點海鹽,食落吊起牛舌獨有嘅「羶味」,口感又柔韌,正呀喂。
bowl大蝦
上文都講明呢個喺二人餐,但唔知點解唯獨大蝦嘅數量喺單數,不過,唔緊要,3個人夠分就得喇。啲蝦好新鮮,燒之前啲色澤好有光澤,燒後蝦肉十分爽彈,沾點海鹽就更能突出到蝦肉嘅鮮甜味。
bowl紅魚扒
比較少聽到嘅魚種,但老實講,小弟對魚嘅知識亦好淺薄。捉錯時間,應該燒完五花腩後就烤魚扒,因為五花腩滲出嘅油份用嚟烤魚就最好。幸好,手勢搭夠,不過,都一件煎得靚仔,另一件就少煙甩皮甩骨。紅魚扒肉質幾嫩滑,而魚味亦幾濃郁,確喺一款唔錯嘅魚種。

bowl乾冰八爪魚冷麵
「乾冰」只喺營造效果,實際個水冷麵都有加入少少冰塊,故此,食完韓燒,再嚟呢道水冷麵,真喺極有消「暑」作用。麵條本身幾有韌性,除有幾片八爪魚之外,仲有酸蘿蔔片、青瓜、雞蛋,份量十足,3-4人分享就啱啱好。
個套餐本身無包甜品,但我仲記上次幫襯嘅時候,試過其「炑八豆粉紅豆冰沫」,大碗抵食,既可以甜點作結,又可以再降降溫。但晌枱角見到,原來有一款夏日限定冰沫「西瓜冰沫」,賣相吸引,材料豐富,啱晒「些牙」啦。怪唔之得,餐廳內掛滿晒西瓜彩旗啦!
bowl西瓜冰沫 $68
跟相一樣,成個西瓜咁上,而且,堆到滿一滿成座山咁,夠晒霸氣。西瓜冰沫比我想像中好好喎,尤其食完烤肉,再食西瓜粒、雲呢嗱雪糕及底下嘅牛奶冰沫(綿綿冰),完全令個人清新番晒,暑氣全消。我見介紹話冰沫內有韓式小年糕,幾驚真喺有,覺得有啲古怪咁囉,最後喺無嘅,而且,就連瓜殼內嘅果肉都被我哋刮光刮淨食晒添。
食埋個甜品,就為今餐劃上滿足又稱心嘅句號。事隔3年多,再嚟都無令人失望,食材嘅質素毋庸,定價亦都合理,而且,店員嘅招呼幾到位,喺碗水冷麵太早上。對比起上次嚟,進步不少,令人刮「炑」相看。

個人評分
味道:8/10
環境:8/10
服務:8/10
抵食:8/10
平均每人消費:HK$280

餐廳資料:
炑八韓烤 MeokBang Korean BBQ & BAR
尖沙咀金馬倫道5號太興廣場2樓
2723 7313

沒有留言:

發佈留言