2018年7月22日星期日

皇玥餅藝 iPastry:匠心傳承,流出經典!

就快又到中秋佳節,又喺各大商戶、食肆推出月餅搶佔先機之時,早前入咗荃灣做咗「阿茂」,有幸跟葉永華大師傅學整餅,佢喺邊個?葉師傅入行50多年,任職半島酒店嘉麟樓點心部主管超過30年,於80年代不甘傳統,以西式嘅奶皇做餡,配以牛油皮做餅皮,久經試驗及改進,匠心獨運首創出迷你奶皇月餅,將月餅帶入了「奶皇時代」,可謂月餅界泰斗。
呢日晏晝,就到咗「皇玥餅藝」嘅大本營,學整最簡單嘅迷你奶皇月餅,當然,有師傅做咗好多準備功夫,我哋主要嘅工序都喺包餡、搓形、落模、甩模……等等,再加上佢從旁指點,真喺零失敗。關於個「製作過程」就唔講太多嘞,貼少少製作花絮出嚟分享吓。
焗完出嚟,小弟嘅成品都見得吓人,至少,烘得金黃,字紋清晰,再切開睇睇,都做到皮薄而餡料包得平均,入口個餅底仲有啲脆口。配杯大紅袍,絕配啦! 
以下,就順便介紹埋「皇玥餅藝」嘅另外兩款招牌出品「經典流心雙輝月餅」($338),同樣喺奶皇月餅,但就做出流心效果,分別喺:流心芝麻月餅及流心奶皇月餅,唔止好食,仲包裝富心思,不得不介紹一下。以金銅色為主調,已顯出一份高雅,盒外套上雕空祥雲花紋紙套,盡顯中國傳統剪紙工藝之精粹,再細看禮盒,透過紙料巧妙精製,竟做出獨特皮革理紋,揉合現代設計品味,真喺別具一格,送禮夠晒體面。而且,個禮盒之後可作為小手飾盒或精品箱,有可持續再用嘅概念,不會用完即棄,可謂花盡心思。
打開內盒,附有一張小單張,唔單止有介紹「皇玥餅藝」,當然唔少得介紹埋葉師傅啦,而盒內分別有4個流心芝麻月餅及4個流心奶皇月餅,所有月餅100%香港製造,品質保證。
更備註葉師傅嘅溫馨提示,最佳食法,就喺預熱焗爐150°C,加熱5分鐘就最好。
流心芝麻月餅以高質素嘅黑芝麻磨製,所以,入口確喺芝麻味幾香濃,而芝麻流心又做出絲絲柔滑,令人食落口感更有層次,而外層牛油皮既薄且酥香,烘一烘,餅底有烤脆咗嘅感覺,實在令人回味。
流心奶皇月餅同樣做得有水準,研製出嘅流心奶黃餡,流心餡口感軟滑,入口富奶味,又帶點鹹蛋黃嘅香氣,中間嘅奶皇入口即化,整體甜而不膩,一口氣食多幾個都唔怕會滯。
如果想試師傅手藝,暫未有實體店,但已可以直接上佢哋網址預訂(www.ipastry.com.hk),非常簡單方便。除奶皇系月餅之外,仲有傳統嘅蓮蓉月餅添!

個人評分
味道:9/10
環境:- /10
服務:- /10
抵食:- /10
平均每人消費:HK$338

餐廳資料:
皇玥餅藝 iPastry
2216 0522
www.ipastry.com.hk

沒有留言:

發佈留言