2018年7月24日星期二

Girlboss by Master Kama:波士飯局

女波士當然遇上過啦,不過,咁耐以嚟,小弟都喺咁唔好彩,遇人不淑,未試過有好下場。但喺,是夜同表姨甥女嚟到「Girlboss by Master Kama」補祝佢生日,結果就有個好下場,食咗餐唔錯嘅晚飯。
餐廳嘅環境絕對喺好少女,因為一室都喺夢幻粉紅,所以,是夜所見,都喺以女生為多。如有得三幾個人,最搶手喺入門口左邊嘅馬蹄位,空間大啲,又自成一角,而且,皮梳化椅睇落都好坐啲。
有咩菜式,一大張A3紙印晒出嚟,仲兼喺一張落單紙,好似考試剔格仔咁。種類包括沙律、是日餐湯、前菜、主菜、意大利麵、意大利飯、 漢堡、薄餅、熱鍋及兒童餐,都有頗多選擇。此外,亦有一款自由組合嘅二人餐「Bossy Royal Set」($338)及指定菜式嘅一人餐「Girl Power Set」($138)。
特別提一提個「Bossy Royal Set」,真喺幾划算, 包咗兩客沙律 / 餐湯(全份)、兩客前菜(半份)、一客主菜(全份)、兩客意粉 / 意飯 / 漢堡 / 薄餅(半份),部份菜式可加錢升級,但需留意部份菜式喺以半份計,不過包咗咁多嘢,夠飽之餘,仲可以試到多啲嘢添。唯一美中不足,喺個餐唔包飲品,需另外散叫。溫提一下,星期六、日、公眾假嘅晚市喺無供應呢個二人餐,明顯喺搵嚟吸引平日客,唔怪得今晚都只喺星期二晚都爆場啦。
飲品方面,佢哋就提供較多特色飲品,有沙冰、梳打、茶品、啤酒、雞尾酒、咖啡……等等。如果點套餐或其他散點菜式,可以有得加錢配飲品嘅優惠就好喇。
沙律 / 餐湯類共有7款,從中可揀兩客,我哋嘅策略就喺揀啲有廚師推介嘅公仔,或者,單價較高嘅菜式,當然,都要合大家口味嘅,結果就揀咗兩款沙律。
bowl蟹肉牛油果蘋果青瓜沙律(散點$43)
以玻璃樽裝住啲沙律,外觀精緻型格,睇名就知有咩食材,包括蟹肉、牛油果粒、青蘋果片、青瓜粒及羅馬生菜,只喺加點橄欖油,最正喺蟹肉唔少喎,且挺鮮甜,用料無欺場,整體予人感覺清爽開胃。
bowl三文魚柚子檸檬玻璃杯沙律 (散點$43)
另一款沙律同樣以玻璃樽裝住,但食法就唔一樣,喺要先冚蓋搖勻後嚟食,又幾別出心裁喎。對比起上面個蟹肉沙律,呢個反而味道突出啲及層次豐富啲,大概喺因為加入西柚肉及檸檬汁,仲有紫洋蔥及黑橄欖所致。但有一點落差,菜名嘅柚子喺指紅肉嘅西柚,而唔喺預期白肉嘅日本柚子,哈哈。
下一站喺前菜,足有15款選擇,亦可選兩客,不過就喺半份嘅份量,而下面所顯示嘅單價參考,就當然喺全份嘅份量吧!另一特別之處,就喺有型到連同其中一款主食(薄餅),以高茶嘅三層架華麗登場。
bowl龍蝦芝士玉子燒(散點$88)
呢道芝士玉子燒可以揀龍蝦或黑松露,揀前者心理上就好似抵啲。件玉子燒真喺做得幾好,啲蛋漿煎得嫩滑,甚富蛋味,夾住軟滑嘅芝士,認真唔錯,只恨得幾粒仔龍蝦肉囉。店員刻意提提盡快食,怕啲蛋攤凍就無咁滑,貼心嘅提示。
bowl龍蝦芝士雞翼(散點$78)
咪諗住雞翼裡面釀入龍蝦及芝士,英文菜名已打住Lobster Cheese Sauce,不過,為免啲客諗多咗,個菜名叫龍蝦芝士「汁」雞翼就會好啲喇。雞翼本身炸得香脆不膩,淋上龍蝦汁,卻意外喺刨出片片巴馬臣芝士,唔喺求其糝啲芝士粉,有誠意,芝士嘅香氣亦有濃郁啲。
主菜類就共有6款供選擇,個海鮮拼盤既喺廚師推介,晌唔使加錢底下,又喺相對貴少少嘅菜式,自自然然就揀佢。
bowlBoss’s Seafood Platter 海鮮拼盤(散點$138)
雖然無期望啲咩貴價海鮮,但百零蚊貨仔,有鮮蝦、珍珠貝、魷魚同炒蜆,放滿一大碟,配以自家調製嘅雞尾汁及蘋果醋,又算唔錯喎。啲海鮮都喺煮熟晒,啱啲唔食得生嘢嘅朋友,幾款海鮮都食到鮮味,唔喺雪藏貨色,最好食喺啲鮮蝦同魷魚,前者頗爽口,後者柔韌有咬口。
意粉 / 意飯 / 漢堡 / 薄餅類可以揀兩客(半份),先睇睇意粉 / 意飯類,有12款,小弟向來較喜歡揀意大利飯,因較考到師傅手勢,所以,就揀咗一客意大利飯。
bowl波爾多紅酒燉牛面肉燴意大利飯(散點$108)
個意大利飯做得似模似樣,飯粒亦夠濕潤,只喺略嫌少咗意大利飯嗰份咬口感,較似台式嘅燉飯咁;不過,咪睇啲牛面肉「黑孟孟」,其實好好食,軟腍,帶有微微紅酒香。
而漢堡 / 薄餅類,選擇亦唔少,有8款菜式,呢度就由表姨甥女負責揀,佢話食漢堡比較麻煩,所以,就揀咗一客廚師推介嘅龍蝦薄餅。
bowl意式龍蝦海鮮薄餅(散點$168)
半份嘅份量啱晒兩個人食,但心想,全份嘅話可能唔喺好大件。話雖以龍蝦為賣點,不過,龍蝦肉真喺唔多,海鮮料亦少,最多就喺啲芝士,不過,整體嘅味道都算唔錯,個餅底如果仲脆啲就更理想。
bowlThunderstorm $58
啲沙冰呀、梳打呀一類飲品,除咗芒果、菠蘿,荔枝就喺小弟另一心水,不過,好難想像以荔枝及桃做出嚟嘅沙冰叫「Thunderstorm」,而唔喺「Snowball」或「Summer Ice」之類,但一送到上枱,就明點解。一身烏黑如陰天嘅感覺,非常大杯,估計喺加入竹炭粉啩?入口勁荔枝味,但桃哋就久奉,然而,質感幾好,打得細滑,唔會飲到碎冰粒。
bowlYellow Submarine $58
表姨甥女嘅黃色潛艇,以芒果及雜莓沙冰組成,底下亦明顯見到有少少雜莓沙冰,不過,飲落都喺以芒果味為主導,的確,芒果味濃郁,入口冰涼解暑,面層仲有大大粒鮮芒果肉添。
綜合嚟講,Girlboss嘅菜式比較多元化,不拘一國,但稍稍以意大利菜為主導,食物水準唔錯,亦注入不少新意,招呼亦好到位,店員殷勤有笑容,唔知喺咪當我哋喺「波士」咁招呼呢?

個人評分
味道:8/10
環境:8/10
服務:8/10
抵食:7/10
平均每人消費:HK$280

餐廳資料:
Girlboss by Master Kama
荃灣大壩街4-30號荃灣廣場4樓432號舖
3583 1867

沒有留言:

發佈留言