2018年6月9日星期六

多味吉 Kirugisu:味吉.羊一

呢間「多味吉」喺住晌葵涌區嘅老友介紹,佢話喺佢嘅秘點飯堂,原來因無他嘅,啲串燒即點即燒,定價親民,小店就更加要撐。是夜趁住返小組,順道走訪一下,試試喺咪咁堅。
踏入餐廳內,地方確喺唔大,絕對喺小店嚟,右邊喺廚房,左邊得3張二人枱,一眼乜都睇晒。而最搶眼喺牆上嘅壁畫,雖然喺啲鬼鬼怪怪,但甚有畫功。
嚟得「多味吉」就一定喺為燒烤而來,有啲咩食?一張A4落單紙就睇晒,包括海鮮類、蔬菜類、小食類、肉類,亦有啲即叫即燒飯品套餐(即喺包飲品),種類近80款,極之多選擇,而且,定價確喺非常貼地。最貼心喺大部分串燒嘅味道可以揀唔辣、香辣、麻辣或沙嗲。
全店兩位女士撐起間店,又招呼,又燒烤,仲要收拾,最感受到小店嘅誠意唔單喺每串都慢慢燒,用心做,而且,更標示唔落味精,用上天然香料。此外,小店有嘅更喺人情味,偶然見到呢幕,專燈留起啲鐵罐俾拾荒嘅阿婆,而且,更順口問埋阿婆食唔食嘢,或者阿婆覺得唔好意思,鐵罐就要晒,食物就未領情嘞。
bowl日式蒲燒鰻魚串 $14
一串插得滿滿嘅鰻魚件,雖然肉地稍薄,不過入口非常油潤甘香,個蒲燒汁好濃郁,而且,灑咗好多木魚絲及白芝麻,味道更香、更有層次。
bowl黯然燒大腸串 $14
「黯然」絕對喺吸引我嘅原因,睇睇食完感覺會唔會好黯然。有別一圈一圈嘅豬大腸,大腸切成條形,亦去走晒多餘嘅肥膏,所以,入口亳無肥膩感,外皮脆口,咬落又煙煙韌韌,口感非常過癮。
bowl鹽燒虎蝦 $15、燒韭菜 $10
再嚟喺打孖上嘅鹽燒虎蝦及燒韮菜,燒得幾靚仔,睇見都吸引。
先試啲韭菜,要咗香辣口感,所以,入口帶點微微辣香,又似有燒孜嘅味道。而燒得惹味之餘,唔會乾,保持到水份,韭菜本身嘅味道亦頗清甜。
虎蝦又燒又如何?簡簡單單單嘅鹽燒,已吊出蝦鮮味,兼且肉質幾爽彈,用料不賴。
bowl燒香草羊架飯 $58
啲飯餐見幾抵,又可以用嚟墊吓肚,所以,揀咗最心水嘅羊架飯。由於啲羊架即燒,入口熱辣辣,加上沾滿香草,夠晒入味外,且有炭火香,肉色仲帶嫩紅,燒得啱啱好;飯量好多,兩個人,再加啲串燒就非常好,而一客飯有兩支架,啱啱方便「些牙」。睇餐牌一支羊架都要賣$25,個飯餐有兩支架都喺賣$58(包埋飲品),十分划算。
bowl竹蔗茅根(飯餐)+$6
雖然唔喺自家製嘅出品,但本地品牌鴻福堂出品都算喺個保證。支嘢飲雪得夠凍,入口清潤,一口嘢食,一啖嘢飲,不知幾爽。
bowl燒孜然羊架 $25
啲羊架確然高質素,又抵依,再試多支燒孜然羊架。同店長傾開,佢話做單賣嘅羊架部位會靚啲,做飯餐嘅羊架多數喺啲頭尾位,呎吋會細啲,但試完兩者,飯餐嘅羊架一啲都唔失禮喎。至於呢支孜然羊架都好得,夠厚肉,份量足,燒到焦香,燒孜味非常突出,又富肉汁,好掂喎。羊羶味唔太重,相信大部人都接受到。
bowl椒鹽三文魚骨腩(免費)
店長既親民,又好人,上都都講過會問候吓拾荒婆婆食唔食啲嘢,突然間問我有啲新嘢想唔想試,仲要喺免費喎,無乜理由拒絕啫。個三文魚骨腩其實肉唔多,但充滿椒鹽香,伴汽水、啤酒都正。不過,同店長想法一樣,大家都覺得油膩咗啲,伴一件檸檬角,加粒蕃茜,變得好睇又好食喇!
有睇開卡通片嘅朋友(唔喺後生嗰班),相信唔少人都睇過「伙頭智多星」,主角天才小廚師「味吉陽一」次次都喺創意無限,雖然劇情喺浮誇啲,但勝在有驚喜。今晚嚟到「多味吉」,浮誇嘅喺幅壁畫,但啲串燒確喺有驚喜,尤其兩款羊架,好得,「羊一」以表示羊架喺小弟嘅第一心水串燒!最後提提大家,呢度星期日唔開,記緊唔好摸門釘。

個人評分
味道:9/10
環境:6/10
服務:9/10
抵食:8/10
平均每人消費:HK$75

餐廳資料:
多味吉 Kirugisu
葵涌大隴街151號葵都大廈地下1號舖
5363 6641

沒有留言:

發佈留言