2018年6月10日星期日

洛煮意 Kaylaism:洛在其中

又有啲嘢搵表哥交收,所以,順道約佢食餐晏,因為表姪女仲考緊試,故此就無約佢一家,只喺同表哥兩支公撐吓枱腳而已。隨心晌網上亂點,搵到「洛煮意」,純粹見人貼出嘅「香烤蜜糖芝士牛肉三文治」賣相吸引。
餐廳位於旺角「新之城」商場內嘅地鋪,地方唔大,加上裝上落地玻璃,一眼就睇晒成間餐廳喺點。一室以白色為主調,米白色皮梳化椅襯灰白雲石枱,裝修簡約,卻帶有幾分小清新。
雖然鋪仔細細,細閱主餐牌,發覺選擇甚多,尤其啲飲品,頗有特色。主食以意大利麵為主(分海鮮、肉食及素食),但仲包括沙律、小食、三文治、漢堡、甜點……等等。
不過,都喺午餐最划算,15 款選擇,定價只喺$42-$78,包基本餐飲,不過,可以加錢轉配特飲,又可加錢配小食,定價一樣相宜。
如想食得豐富啲都無問題,餐牌後仲有款「午市意粉材料自由加配」選項,10多款材料,分唔同價錢,加多加少都由自己話事,極盡彈性。
bowl香烤蜜糖芝士牛肉三文治 $78
由於填滿厚厚嘅鹹牛肉,所以,睇起嚟好有睇頭。其實,拆解番出嚟就喺西多士拼碎牛治嘅變奏,包身唔喺就咁方包,喺好似西多咁處理,再加上蜜糖,自然更香口;而內餡除咗有鹹牛肉,仲有半溶嘅芝士、蕃茄及生菜,味道豐富。唯食起嚟比較麻煩,因為啲碎牛肉一切就散開,如果搵手拎起嚟食,由於加咗蜜糖,會「黐立立」。
bowl香煎牛柳配野菌紅酒汁 $69
因為唔知件牛柳嘅份量喺點,所以,就加意粉底(+$8),點知原來加底喺非常之多,而且,啲意粉煮得有水準,夠咬口,啲野菌紅酒汁滲埋落好,好食;表哥想食得豪啲,額外加原隻虎蝦(+38),爽就喺爽口,不過,呎吋唔算話好巨型,比一般大蝦大隻少少,所以,事後覺得嗌兩款小食仲性價比高喔!然而,啲牛柳做得幾好,燒得外層帶點焦脆,肉質軟腍,肉味香濃,唯把餐刀就唔喺好得,切起嚟唔喺好夠利。
bowl紫薯奶蓋 +$18
表哥都喜歡試試啲新嘢,紫薯拼奶蓋嘅組合對佢嚟講絕對喺新嚐試,佢就覺得杯嘢好唔錯,頗有紫薯嘅香味。
bowl芒果奶蓋 +$18
小弟本來想揀沙冰,但見有微咳,就改飲芒果奶蓋,奶蓋打得厚身綿蜜,個芒果汁底都幾清甜,拌勻啲奶蓋,有一絲絲幼滑。
bowl卡布奇諾蛋糕 $42
本來想試試個提拉米蘇及朱古力脆脆蛋糕,但竟然此刻午市只得一款卡布奇諾蛋糕,退二求其次都試吓。賣相頗精緻,仲添加咗藍莓、食用玫瑰及唧上朱古力漿。整體味道確喺幾層次,中層啲咖啡慕絲好柔滑,唯啲海綿蛋糕卻喺有點乾,明顯喺隔夜貨色卻處存得唔好所致。
同表哥某程度都性格有啲似,都喺樂天知命,安於自己處境嘅人,既來之,則安之,所以,話題都幾投契。是日一齊輕輕鬆鬆食餐飯,簡簡單單,都可以樂在其中!

個人評分
味道:7/10
環境:7/10
服務:8/10
抵食:7/10
平均每人消費:HK$150

餐廳資料:
洛煮意 Kaylaism
旺角亞皆老街65號新之城地下G20號舖
2323 2480

沒有留言:

發佈留言