喜双逢 Joy & Joy：即興双逢

有位好兄弟，不時都相約行山，話題又啱傾啱講，是日工作唔太忙，相約食晏晝飯，當然奉陪啦。由最初話食「大家樂」，變咗嚟「喜双逢」飲茶，絕對喺即興。

酒樓位於「萬邦行」內嘅老餅商場，近門口喺一排排卡位，我哋兩丁友就被安排坐晌房內挨牆死角位，雖然逼啲，但啱我喎，竄埋一角少啲人騷擾。然而，由於啲枱櫈排到密密麻麻，所以，整體都喺嘈啲。

環境一室鮮紅，就連點心紙都喺紅色，感覺有點娘。食物有齊晒點心、小食、推介、甜點、炒粉麵，並登晒價錢，不過，定價真喺幾貴吓。

鹹脆花生 $20

每份收廿蚊，現成貨，無乜美味可言，絕對喺過橋濕腳酒樓賺硬你嘅技倆，其實，小弟就最唔鍾意中菜館呢啲經營手法。茶芥收$18位，一樣偏貴，唯一就喺有碟XO醬，之但喺，唔喺個個客都喜歡食XO醬囉，查實碟XO醬都幾好食，鹹鹹鮮鮮而微辣。

水晶瑩鮮蝦餃 $58

去唔少酒樓食籠蝦餃皇，貴極都喺三十五蚊左右，呢度一籠4粒就盛惠$58。佢哋嘅蝦餃無話特別大隻，餃皮亦未至於晶瑩剔透，但壓紋工整，餃皮唔黏牙，而啲鮮蝦餡真材實料，爽彈又堆到滿滿，極富鮮蝦味。

杞子燒賣王 $58

平時見放蟹籽嘅燒賣皇就多，改放粒杞子，雖然味道唔會話特別唔同，卻有種古早味。燒賣做得豐滿大粒，面層仲有啲鮮蝦，咬落又唔會一口都喺肥豬肉，鬆化爽口。

酥炸奶黃包 $42

一客3個炸奶黃包，色澤金黃均勻，咬落亦唔覺油膩，雖然啲奶黃餡唔似得啲流沙包流得咁澎湃，基本上可以話喺唔流，但奶黃餡都幾柔滑富蛋香，炸過就多份香口感。

黑松露紅米蛋白炒飯 $148

極之健康嘅一道炒飯，而且，都炒得都幾大碟。黑松露落得無手緊，所以，上枱已散發出松露幽香，飯粒分明，炒得夠爽身；除蛋白，飯內仲混有粟米、芥蘭粒添。

「喜双逢」走嘅喺貴價路線，定價直逼酒店中菜廳，但跟環境、服務都未喺去到同一個水平，感覺都喺偏貴。然而，食物喺做得不錯，點心水準紮實，但卻唔會有咩太大驚喜，同等價錢，晌中環可以有好多選擇。

個人評分
味道：8/10
環境：7/10
服務：8/10
抵食：6/10
平均每人消費：HK$200

餐廳資料：
喜双逢 Joy & Joy
中環皇后大道中33號萬邦行2樓211號舖
2810 5366