2018年6月23日星期六

藍象泰國餐廳 Blue Elephant Thai Brasserie:向海.藍

趁住個博物館証6月底到期,作為最後衝刺,就趁個星期六晏晝去一轉剛翻新嘅太空館。其實兩個月前就去過一次,點知揸証都要網上預約,真麻煩,查實當時見人流唔多。今回做足準備,預約好晒1:00-3:00pm時段,整整睇咗個半鐘,根本人就唔多,但就算喺咁,都唔會再俾人入,制度疆化到不得了。呻完,最好搵啲好嘢食緩和一下心情,三點幾最好就下午茶,知道海港城嘅「 藍象泰國餐廳」定價唔平,不過,見佢推出咗「高茶」,只喺賣$168(二人份),又試得過吓喎。
「藍象」門口正正有間屈臣氏及萬寧,有好多國內遊客買葯、買奶粉,所以,堆到成門口都喺人來人往。不過,入到餐廳內,又喺另一番景象,一室憂鬱藍,配木地板、木枱、木椅,卻有份優雅感。
另一邊挨窗用餐區,換上布梳化椅及啡色系嘅地毡,感覺會有少少唔同。唯可惜是日天氣麻麻,陰陰雨雨,少咗燦爛陽光嘅透射。
由於一心嚟食個Afternoon High Tea Set,所以,主餐牌就無乜睇過。而個二人套餐,所包嘅食物唔少,共9樣,但咪諗住會食得你好飽,因為樣樣嘢都細細件。
確實有唔少客人都點呢個下午茶餐,一個接一個出「籠」,故此,等咗大概15min左右先輪到我哋。整個餐嘅食物以半邊金雀籠盛載,分為3層,不少食物都做得的骰可愛,賣相別緻。理論上都喺由鹹點食到甜點,即喺下層食到上層。
bowl下層:香脆蝦餅、泰式春卷、泰式比利時炸蝦
鹹點方面,第一個觀感喺「孤寒」,因為蝦餅、春卷、炸蝦都喺得一件,只喺蝦餅及春卷一開二,睇落似二人份,當時亦無為意對比吓其他食評,炸蝦應該喺有無兩件。之不過,3樣嘢都做得不賴,蝦餅彈牙而有蝦味;春卷香脆不膩,餡料惹味;炸蝦鮮爽,裡面混有少少芝士,正!附上嘅泰式甜酸醬,酸香細緻,去膩醒胃。
bowl中層:柚子蟹肉沙律卷、馬可、皇家宮殿蒸餃子
以檳榔葉嚟做沙律卷,小弟都喺第一次試,個香味都幾太7特,捲住唔少柚子肉及蟹肉,清爽好味喎;馬可,好陌生嘅名字,其實喺慢煮花生軟糖配鮮菠蘿,香香甜甜都幾得意;蒸餃子絕對喺造型取勝,鴿子造型精緻,餡料香香辣辣,加咗唔少香料,好有泰國風。
bowl上層:提拉米蘇杯、泰式辣朱古力餅、班蘭撻
最後喺到甜品時間,3款甜品,以後兩者好食又有特色,朱古力餅似件慕絲蛋糕,口感非常幼滑,嗒落有啲辣勁,好過癮;班蘭撻撻殼鬆脆,最突出喺啲班蘭味夠強勁,清甜;相後,個人覺得提拉米蘇杯唔得,入口同食忌廉相差無幾,糝咗唂咕都無用。
bowl即磨咖啡
諗住普普通通叫杯咖啡,卻有啲驚喜,原因喺用上瑞士Movenpic呢個品牌嘅咖啡豆,雖然唔喺話好飲到曉飛,但沖泡出嚟嘅咖啡夠醇香就毋庸置疑,再者,啲牛奶有加熱過,喺有誠意嘅表現。
bowl鮮榨菠蘿汁 +$20
果然堅喺鮮榨,皆因果汁面打到有啲泡,而啲菠蘿味清甜且自然,入口微涼,唔會太冰,夠晒我老婆。
間中同老婆行吓博物館、嘆吓高茶,輕輕鬆鬆渡過一個輕省周末,既可調節吓心情,亦可以回吓氣。

個人評分
味道:8/10
環境:8/10
服務:7/10
抵食:7/10
平均每人消費:HK$100

餐廳資料:
藍象泰國餐廳 Blue Elephant Thai Brasserie
尖沙咀廣東道3-27號海港城港威商場3樓3303號舖
2328 2328

沒有留言:

發佈留言